ឃ្លាំងស្តុកអាវុធឥណ្ឌាមួយរងគ្រោះអគ្គីភ័យស្លាប់និងរបួសមនុស្សជាច្រើននាក់
មានស្លាប់យ៉ាងហោចណាស់ ១៧នាក់ និងរបួស១៩នាក់ នៅក្នុងគ្រោះអគ្គីភ័យដ៏សន្ធោសន្ធៅមួយ ឆេះឃ្លាំងស្តុកអាវុធយោធាមួយ នៅភាគកណ្តាលប្រទេសឥណ្ឌា។ បើតាមរូបភាពបញ្ចាំងតាមកញ្ចក់ទូរទស្សន៍ គេឃើញអណ្តាតភ្លើង ឆាបឡើងភ្លឺចិញ្ចាចពេញផ្ទៃមេឃ ទាំងកណ្តាលអាធាត្រ។ ក្រុមអ្នកសង្គ្រោះនិងពន្លត់អគ្គីភ័យធ្វើការពេញមួយយប់ទម្រាំពន្លត់បាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
ឃ្លាំងដែលរងគ្រោះអគ្គីភ័យយប់មិញនេះ ជាកន្លែងមានស្តុកទុកអាវុធ និងគ្រាប់រំសេវរាប់សិបតោន និងស្ថិតនៅមិនឆ្ងាយប៉ុន្មានពីក្រុងNagpur ភាគកណ្តាលនៃប្រទេសទេ។ ប្រជាជនរាប់ពាន់គ្រួសារ រស់នៅក្នុងភូមិក្បែរនោះ ត្រូវជម្លៀសចេញ ជាបន្ទាន់ ព្រោះខ្លាចមានការផ្ទុះគ្រាប់រំសេវបន្តពីអគ្គីភ័យ។
អគ្គីភ័យបានផ្តើមឆាបឆេះឡើង នៅម៉ោង១និង៣០នាទីរំលងអាធ្រាត្រ ហើយក្រុមពន្លត់អគ្គីភ័យ ដោយមានជំនួយពីកម្លាំងសង្គ្រោះ១០កាមីញ៉ុង អាចពន្លត់បាននៅវេលាម៉ោង៦កន្លះ ព្រឹក។ ជនរងគ្រោះបាត់បង់ជីវិត សុទ្ធសឹងជាយោធា ក្នុងនោះពីរនាក់ជានាយទាហានផង។ លោកនាយករដ្ឋមន្ត្រី ណារិដ្រា ម៉ូឌី បានផ្ញើសារតាមប្រព័ន្ធទ្វីតទ័រ សម្តែងការសោកស្តាយចំពោះការបាត់បង់ជីវិតទាហាន និងបានសុំចែករំលែកទុក្ខជាមួយគ្រួសារសព។ រដ្ឋមន្ត្រីក្រសួងការពារជាតិនឹងធ្វើដំណើរទៅពិនិត្យកន្លែងគ្រោះថ្នាក់ដោយផ្ទាល់នៅថ្ងៃនេះ។
គេនៅមិនទាន់ដឹងអំពីមូលហេតុដែលនាំឱ្យមានអគ្គីភ័យឆាបឆេះឃ្លាំងស្តុកអាវុធនិងជាតិផ្ទុះ ដ៏ធំមួយនេះទេ ប៉ុន្តែបើតាមប្រភពព័ត៌មានទូរទស្សន៍ក្នុងស្រុក អគ្គីភ័យនេះបានឆាបឆេះឡើង ក្រោយពីមានស្នូរផ្ទុះ។
គ្រោះថ្នាក់ មហន្តរាយ និងអគ្គីភ័យ ក្នុងស្ថាប័នយោធាឥណ្ឌា តែងមានកើតឡើងជាញឹកញយ។ ជាទូទៅ គឺបណ្តាលមកពីប្រព័ន្ធការពារសុវត្ថិភាពទន់ខ្សោយនិងខ្វះចន្លោះ។
កាលពីឆ្នាំ២០១៤ មានអគ្គីភ័យមួយបានផ្ទុះឡើងនៅក្នុងនាវាចម្បាំងមុជទឹក សម្លាប់នាវិកអស់ពីរនាក់។ ហើយមុននេះមួយឆ្នាំ នៅខែសីហា ២០១៣ យោធា១៨នាក់ បានស្លាប់ ក្នុងបំផ្ទុះមួយ បង្កឡើងដោយអគ្គីភ័យ ក្នុងនាវាមុជទឹកមួយផ្សេងទៀត នៅតាមបណ្តោយឆ្នេរប៊ុមបៃ។ នៅឆ្នាំ២០១០ មានអគ្គីភ័យឆេះឃ្លាំងស្តុកអាវុធនិងរំសេវយោធាឥណ្ឌាដ៏ធំបំផុតមួយ នៅក្រុងកាល់កុត្តា បំផ្លាញអាវុធនិងជាតិផ្ទុះអស់១៥០តោន តែសំណាងល្អ គ្មានមនុស្សស្លាប់។ កាលពីឆ្នាំ២០០៧ នៅកាស្មៀ អគ្គីភ័យបានកម្ទេចឃ្លាំងអាវុធមួយជាផេះ និងដុតបំផ្ទុះ គ្រាប់បែកកាំភ្លើងធំ គ្រាប់កាំភ្លើងត្បាល់ ឱ្យខ្ទាតប្រសាចធ្លាល់លើភូមិឋានប្រជាជនរស់ក្បែរនោះ ផ្តាច់ជីវិតមនុស្សយ៉ាងហោចណាស់អស់១៧នាក់ដែរ និងរបួសជាច្រើននាក់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ