តើកូរ៉េខាងជើងមានគ្រាប់បែកនុយក្លេអ៊ែរប៉ុន្មានគ្រាប់ហើយ
មជ្ឈមណ្ឌលស្រាវជ្រាវមួយរបស់អាមេរិក បានប្រកាសឲ្យដឹងថា នារយៈពេល១៨ខែចុងក្រោយនេះ កូរ៉េខាងជើង អាចផលិតបានគ្រាប់បែកនុយក្លេអ៊ែរចំនួន៦គ្រាប់បន្ថែមទៀតឬក៏លើសនេះផង។ ហើយបើគិតសរុប កូរ៉េខាងជើង អាចមានគ្រាប់បែកនុយក្លេអ៊ែររហូតដល់ ២១គ្រាប់ឬក៏ច្រើនជាងនេះ។
ចុះផ្សាយនៅថ្ងៃ៖
ស្តាប់ - ០១:៥១
មជ្ឈមណ្ឌលស្រាវជ្រាវអាមេរិក ហ៊ានអះអែងបែបនេះដោយផ្អែកទៅលើកំណើនបរិមាណសារធាតុ ភ្លុយតូនីញ៉ូមនិងអ៊ុយរ៉ាញ៉ូមដែលត្រូវបានកូរ៉េខាងជើងផលិតនៅក្នុងមជ្ឈមណ្ឌលនុយក្លេអ៊ែរនៅ Yongbyon ភាគខាងជើងទីក្រុងព្យុងយ៉ាង។
កាលពីចុងឆ្នាំ ២០១៤ មជ្ឈមណ្ឌលស្រាវជ្រាវមួយរបស់អាមេរិក (ISIS),បានវាយតម្លៃថាកូរ៉េខាងជើងអាចមានគ្រាប់បែកនុយក្លេអ៊ែររវាង១០គ្រាប់ទៅ១៦គ្រាប់ប៉ុណ្ណោះ។
ចាប់តាំងពីពេលនោះមក កូរ៉េខាងជើង ផលិតគ្រាប់បែកនុយក្លេអ៊ែរបានបន្ថែមរវាងបួនទៅ៦គ្រាប់ទៀត ហើយបើគិតសរុប កូរ៉េខាងជើង អាចមានគ្រាប់បែកពី១៣ទៅ២១គ្រាប់ឬក៏ច្រើនជាងនេះ-នេះជាការបញ្ជាក់របស់មជ្ឈមណ្ឌលស្រាវជ្រាវមេរិកមួយកាលពីម្សិលមិញ។
ការគន់គិតបែបនេះ គឺ ដោយយោងទៅលើការបាញ់សាកល្បងគ្រាប់នុយក្លេអ៊ែររបស់កូរ៉េខាងជើងកាលពីថ្ងៃទី៦មករា។
ម្យ៉ាងទៀតកាលពីសប្តាហ៍មុនអគ្គលេខាធិការនៃអង្គការថាមពលបរិមាណូអន្តរជាតិ AIEA បានប្រកាសប្រាប់ ថាបើតាមការវិភាគរូបភាពផ្កាយរណប ក្រុងព្យុងយ៉ាងប្រហែលជាបានដាក់ឲ្យដំណើរការឡើងវិញនូវរោងចក្រនុយក្លេអ៊ែររបស់ខ្លួននៅYongbyon។
ភស្តុតាងនានាដែលទីភ្នាក់ងារ (IAEA) បានទទួលនោះ គឺសុទ្ធស៊ឹងជាសកម្មភាពដែលទាក់ទងទៅនឹងការចំរាញ់សារធាតុភ្លុយតូនីញ៉ូមនៅមជ្ឈមណ្ឌលនុយក្លេអ៊ែរ Yongbyon ដូចជាចលនាយាន្តយន្តចំហាយចំហាយនៃទឹកក្តៅនិងការដឹកជញ្ជូនសម្ភារៈ។
ក្នុងពេលនេះ ដោយគ្មានអ្នកជំនាញអាចចុះទៅដល់ផ្ទាល់ក្នុងទឹកដីកូរ៉េខាងជើង គេអាចតាមដានសង្តេតកម្មវីធីនុយក្លេអ៊ែរព្យុងយ៉ាងដោយរំពឹងតែរូបភាពនៃផ្កាយរណបប៉ុណ្ណោះ-នេះជាការបញ្ជាក់បន្ថែមរបស់ប្រធានទីភ្នាក់ងារថាមពលបរិមាណូអន្តរជាតិ AIEA
នៅក្នុងសន្និសីទកាសែតមួយនៅក្រុងវីយែនប្រទេសអួទ្រិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ