ចិនគ្រោងរៀបចំដំណើរកម្សាន្តតាមកប៉ាល់ទៅកាន់ប្រជុំកោះ Spratleys
ប្រទេសចិនគ្រោងរៀបចំឲ្យមានដំណើរកម្សាន្តតាមកប៉ាល់ទៅកាន់ប្រជុំកោះ Spratleys ឲ្យបាននៅមុនដំណាច់ឆ្នាំ ២០២០ នេះបើយោងតាមកាសែតផ្លូវការចិនចុះផ្សាយនៅថ្ងៃពុធ២២មិថុនា។ ប្រជុំកោះ Spratleys ដែលស្ថិតនៅក្នុងសមុទ្រចិនខាងត្បូង កំពុងត្រូវបានប្រទេសជិតខាងចិនមួយចំនួនឈ្លោះប្រកែកគ្នាយ៉ាងតឹងសសៃកដើម្បីដណ្តើមយកកម្មសិទ្ធិលើតំបន់នោះរៀងៗខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ប្រទេសចិន ចាត់ទុកទីប្រជុំកោះ Spratleys នៅក្នុងសមុទ្រចិនខាងត្បូង ថាជាដែនអធិបតេយ្យរបស់ខ្លួនជានិច្ច។ ហើយ នៅអំឡុងប៉ុន្មានឆ្នាំចុងក្រោយនេះ ចិនថែមទាំងបានសាងសង់កោះសិប្បនិមិត្ត ជាច្រើនកន្លែងទៀតនៅលើកោះ Spratleys ដោយមិនខ្ចីអើ់ពើចំពោះប្រទេសជិតខាងខ្លួនដូចជាវៀតណាមនិងហ្វីលីពីន ដែលទាមទារថាតំបន់នោះជាដែនកម្មសិទ្ធិរបស់ប្រទេសពួកគេដែរ។
ទន្ទឹមនេះ ភ្នាក់ងារទេសចរចិននានា បានផ្សព្វផ្សាយពាណិជ្ជកម្មរួចទៅហើយដើម្បីស្វែងរកអតិថិជនណាដែលប្រាថ្នាចង់ទៅដើរលេងកំសាន្តនៅកោះ Paracels ភាសាកុកងឺ ហៅកោះ Xisha ដែលជាប្រជុំកោះមួយទៀតនៅភាគខាងជើងសមុទ្រចិនខាងត្បូង។ ជាតំបន់កោះដែលប្រទេសវៀតណាម ទាមទារជានិច្ចថាជាដែនដីរបស់ខ្លួនដែរ។ ម្យ៉ាងទៀត នៅតំបន់ទេសចរនោះ គឺមានតែពលរដ្ឋចិនប្រជាមានិតប៉ុណ្ណោះគត់ដែលអាចធ្វើដំណើរទៅលេងកំសាន្តបាន។
ចំំណែកដំណើរកម្សាន្តទៅប្រជុំកោះ Spratleys វិញ ក៏កំពុងតែត្រូវបានគេធ្វើការសិក្សា
ដែរ-នេះជាការគូសបញ្ចាក់របស់កាសែតផ្លូវការចិនជាភាសាអង់គ្លេសឈ្មោះ China Daily នៅថ្ងៃពុធ២២មិថុនា។ កាសែត China Daily ដែលបានដកស្រង់ចេញពីឯកសារ មួយផ្សព្វផ្សាយដោយអាជ្ញាធរខេត្តហៃណាន់ ។ ហៃណាន់ ខេត្តកោះដ៏សំខាន់មួយនៅភាគខាងត្បូងប្រទេសចិននិងក៏ជាទីដែលកប៉ាល់នឹងត្រូវចេញដំណើរ។ យោងតាមកាសែតដដែលនេះ អ្នកទទួលខុសត្រូវម្នាក់ទទួលបន្ទុកក្នុងវិស័យទេសចរនៅហៃណាន់ បានអះអាងដែរថា ប្រជុំកោះ Spratelys នេះ គឹជាគោលដៅទេសចរថ្មីមួយរបស់ប្រទេសចិន។
ចំណែក អ្នកនាំពាក្យរបស់ក្រសួងការបរទេសចិនវិញ ក៏បានបញ្ជាក់ដែរថា” ខ្លួនពុំបានដឹងព័ត៌មានអ្វីទេពីគម្រោងការនេះ" ដោយគ្រាន់តែបានអះអាងបញ្ជាក់វិញថា “គម្រោងការរៀបចំដំណើរកំសាន្តទៅកាន់ប្រជុំកោះ Spratelys នេះ វាក៏ពុំមែនជាការអ្វីចំឡែកនោះទេ ពីព្រោះ Spratelys ស្ថិតនៅក្រោមសមត្ថកិច្ចរបស់ខេត្ត Hainan"។
គួររំលឹកថា វៀតណាម ម៉ាឡេស៊ី តៃវ៉ាន់ ព្រុយណេនិងហ្វីលីពីន សុទ្ធស៊ឺងជាបណ្តាប្រទេសដែលកំពុងតែមានជម្លោះជាមួយប្រទេសចិននៅក្នុងការដណ្តើមទាមទារទឹកដីនៅទីប្រជុំកោះ Spratelys រៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ