មនុស្សជំនិតម្នាក់របស់អតីតប្រធានាធិបតីហ៊ូជីនតាវត្រូវតុលាការកាត់ទោសដាក់គុកអស់មួយជីវិត
លោក Ling Jihua ទីប្រឹក្សាជំនិតមួយរូបរបស់អតីតប្រធានាធិបតីចិន ហ៊ូជីនតាវ ត្រូវបានតុលាការកាត់ទោសដាក់ពន្ធនាគារអស់មួយជីវិតពីបទប្រព្រឹត្តអំពើពុករលួយលួចយកព័ត៌មានសម្ងាត់របស់រដ្ឋដោយខុសច្បាប់និងការរំលោភអំណាច-នេះបើយោងតាមការផ្សាយរបស់ទូរទស្សន៍រដ្ឋចិនCCTV នៅថ្ងៃចន្ទ៤កក្កដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
លោក Ling Jihua ត្រូវអស់បុណ្យស័ក្តិបន្ទាប់ពីការលេចធ្លាយរឿងអាស្រូវមួយក្រោយពីការស្លាប់កូនប្រុសរបស់គាត់កាលពីខែមីនាឆ្នាំ២០១២ក្នុងគ្រោះថ្នាក់រថយន្ត។ ក្នុងពេលមានគ្រោះថ្នាក់ កូនប្រុសរបស់លោក Ling បានបើករថយន្ត ដ៏ថ្លៃបំផុតមួយម៉ាក Ferrari ដោយមានអមដំណើរដោយយុវនារីអាក្រាតពីររូប។
ដោយសារតែការលេចធ្លាយរឿងអាស្រូវនេះហើយ បានជាលោក Ling Jihua ខកខានលែងបានឈានជើងចូលទៅក្នុងការិយាល័យនយោបាយរបស់គណបក្សកុម្មុយនិស្តចិននៅឆ្នាំ២០១២ដែរ។
ក្នុងអាយុ៦០ឆ្នាំ លោក Ling Jihua បានទទួលសារភាពទោសរបស់ខ្លួននិងបានសំរេចចិត្តមិនប្តឹងតវ៉ាទៅសាលាឧទ្ធរណ៍ទេ។ មិនតែប៉ុណ្ណោះ លោក Ling និងភរិយាគាត់ ក៏បានទទួលស្គាល់ទោសរបស់ខ្លួនដែរជាអាទិ៍ការ ស៊ីសំណូកសូកប៉ាន់ដែលមានទឹកប្រាក់ប្រមាណជា៧៧លានយ័ន្ត ឬ ប្រមាណ ជា១០លាន៤សែនអឺរ៉ូ-នេះបើយោងតាមកាសែតផ្លូវការរបស់ចិនដដែល។
ចំណែកមតិសាធារណៈជនចិនវិញ ក៏មានការទាស់ចិត្តជាខ្លាំងណាស់ ដោយបានចោទសួរខ្លួនឯងថា តើកូនប្រុសរបស់មេដឹកនាំចិននោះ បានលុយមកពីណា ដើម្បីអាចទិញរថយន្តម៉ាក Ferrari តម្លៃជាង៧០ម៉ឺនអឺរ៉ូនោះ ?
គួររំលឹកថា លោក Ling Jihua នៅឆ្នាំ២០០៧ លោក មានឋានៈជានាយកការិយាល័យកិច្ចការទូទៅរបស់គណៈកម្មាធិការកណ្តាលនៃគណបក្សកុម្មុយនិស្តចិនដ៏មានឥទ្ធិពលនោះ បានរំលោភអំណាចរបស់ខ្លួននាពេលកាន់កាប់មុខតំណែងដ៏ខ្លឺមនេះ ដើម្បីលួចយកព័ត៌មានសម្ងាត់របស់រដ្ឋដោយខុសច្បាប់។
សូមបញ្ជាក់ថា គណបក្សកុម្មុយនិស្តចិន ធ្លាប់បានជូនដំណឹងកាលពីខែកក្កដាឆ្នាំមុន អំពីការដកហូតលោក Ling Jihua ចេញពីជួរគណបក្សរបស់ខ្លួនដោយសារតែលោក Ling បានជាប់ចោទពីបទបានប្រព្រឹត្តបទល្មើសលើវិន័យនយោបាយរបស់រដ្ឋចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ