G២០ សន្យាជួយលើកស្ទួយកំណើនសេដ្ឋកិច្ច ក្រោយអង់គ្លេសដើរចេញពីអឺរ៉ុប
រដ្ឋមន្ត្រីក្រសួងហិរញ្ញវត្ថុ ប្រធានធនាគារកណ្តាល នៃក្រុមប្រទេសមានសេដ្ឋកិច្ចលូតលាស់ខ្លាំងជាងគេទាំង២០ដំបូងនៅលើពិភពលោក ឬហៅកាត់ថា ហ្សេ២០ បានសន្យាជាថ្មី នៅថ្ងៃអាទិត្យ នាឱកាជំនួបប្រជុំនៅក្រុងឆេងឌូ ប្រទេសចិន ថានឹងខិតខំទ្រទ្រង់កំណើនសេដ្ឋកិច្ចពិភពលោក និងសហការគ្នាបញ្ចេញសកម្មភាពឱ្យបានកាន់តែប្រសើរឡើង ដើម្បីប្រឈមនឹងភាពមិនច្បាស់លាស់ទាំងឡាយ ដែលបណ្តាលមកពីអង់គ្លេសដើរចេញពីអឺរ៉ុប។
ចុះផ្សាយនៅថ្ងៃ៖
គិតតាំងពីអង់គ្លេសបានបោះឆ្នោតប្រជាមតិដើរចេញពីអឺរ៉ុបមក នេះជាលើកទីមួយដែលក្រុមប្រទេសហ្សេ២០ បានជួបប្រជុំគ្នា ត្រៀមរៀបចំជំនួបកំពូលហ្សេ២០នៅខែកញ្ញាខាងមុខ។ ចង់មិនចង់ ជំនួបប្រជុំនេះត្រូវផ្តោតខ្លាំងតែទៅរកដំណោះឱ្យបញ្ហាសេដ្ឋកិច្ចពិភពលោក ដែលកំពុងស្ថិតក្នុងស្ថានភាពមិនជាក់លាក់ បណ្តាលមកការសម្រេចដើរចេញពីអឺរ៉ុបរបស់អង់គ្លេស។ អភិបាលធនាគារជប៉ុនបានថ្ងូចថ្ងូរថា Brexit ជាប្រធានបទដ៏ចំបង នៃរបៀបវារៈប្រជុំ។រដ្ឋមន្ត្រីក្រសួងហិរញ្ញវត្ថុអង់គ្លេសក៏បានអញ្ជើញមកចូលរួមនឹងគេដែរ ដែលជាឱកាសសម្រាប់ហ្សេ២០បញ្ជាក់សួរអំពីកាលវិភាគនៃការចរចាលែងលះជាមួយអឺរ៉ុប។
Brexit នាំសេដ្ឋកិច្ចពិភពលោកឱ្យកាន់តែមិនជាក់លាក់
សម្រាប់ហ្សេ២០ ការដើរចេញពីអឺរ៉ុបរបស់អង់គ្លេស Brexit មិនមែនត្រឹមរុញច្រានឱ្យអឺរ៉ុបស្ថិតក្នុងភាពឃ្លេងឃ្លោងប៉ុណ្ណោះទេ តែបានគំរាមកំហែងដល់សេដ្ឋកិច្ចពិភពលោកតែម្តង និងធ្វើឱ្យសេដ្ឋកិច្ចពិភពលោកធ្លាក់ក្នុងភាពមិនប្រាកដប្រជាកាន់តែខ្លាំងឡើង។ ភាពមិនជាក់លាក់នេះ អាចនឹងត្រូវបន្តអូសបន្លាយរហូតទាល់តែអង់គ្លេសនិងអឺរ៉ុប ចរចាលែងលះគ្នាចប់សព្វគ្រប់។ ចំណែកអង្គការមូលនិធិរូបិយវត្ថុអន្តរជាតិ យល់ថាការការគំរាមកំហែងសេដ្ឋកិច្ចពិភពលោករីកធំធាត់ជារៀងរាល់ថ្ងៃ ជាពិសេសគឺបណ្តាលមកពីBrexit និងភេរវកម្មនេះឯង។ ដូច្នេះក្រុមប្រទេសហ្សេ២០ ត្រូវតែនាំគ្នាបង្កើន បំប៉ោងចំណាយសាធារណៈដើម្បីទ្រទ្រង់កំណើនសេដ្ឋកិច្ចពិភពលោកដែលទាបស្រាប់។ កំណើនសេដ្ឋកិច្ចដែលFMI ព្យាករថានឹងធ្លាក់ចុះមកត្រឹម ៣,១%នៅឆ្នាំ២០១៦ និង៣,៤%នៅឆ្នាំ២០១៧ តែភាពសង្ស័យបណ្តាលមកពីBrexit កំណើនសេដ្ឋកិច្ចនឹងកាន់តែធ្លាក់ចុះបន្ថែមទៀតជាក់ជាមិនខាន។
តែទោះជាយ៉ាងដូច្នេះក្តី ក៏ក្រុមរដ្ឋមន្ត្រីហិរញ្ញវត្ថុហ្សេ២០ និងអភិបាលធនាគារកណ្តាល ចង់ផ្តល់សារប្រកបដោយទំនុកចិត្តមួយដល់ពិភពលោក។
បើតាមគម្រោងសេចក្តីថ្លែងការណ៍រួម ដែលជាលទ្ធផលនៃជំនួបប្រជុំហ្សេ២០នៅប្រទេសចិន ចេញផ្សាយជាសាធារណៈនៅថ្ងៃនេះ បានបញ្ជាក់ថា ក្រុមប្រទេសជាសមាជិកសហភាពអឺរ៉ុប មានជំហរត្រឹមត្រូវ អាចប្រឈមបានយ៉ាងស្វាហាប់នឹងផលវិបាកសេដ្ឋកិច្ចឬហិរញ្ញវត្ថុនៃBrexit។ ហើយហ្សេ២០បានត្រៀមខ្លួន មុនលទ្ធផលប្រជាមតិអង់គ្លេសចង់ដើរចេញពីអឺរ៉ុបទៅទៀត។ ជំនួបប្រជុំនេះ ខ្វល់ខ្វាយខ្លាំងតែលើទម្រង់នៃការបំបែកអង់គ្លេសពីអឺរ៉ុបប៉ុណ្ណោះ។
ហ្សេ២០បានប្រើគ្រប់វិធានការសម្រាប់រំញោចទំនុកចិត្ត និងកំណើនសេដ្ឋកិច្ច។ វិធានការនោះ គ្មានអ្វីអំពីភាពដាច់ខាត ជំនះឧបសគ្គនយោបាយ រូបិយវត្ថុ ថវិកា និងរចនាសម្ព័ន្ធ ជាលក្ខណៈដោយឡែក និងជាលក្ខណៈរួម ដើម្បីសម្រេចកម្មវត្ថុតែមួយ គឺមានកំណើនសេដ្ឋកិច្ចខ្លាំង ជាយូរអង្វែងនិងសមភាព។
ហ្សេ២០ ខ្វល់ពី Brexit ជាងចិន
ថ្វីបើកាលពីនៅក្នុងជំនួបមុនៗ ក្រុមហ្សេ២០នាំគ្នាព្រួយបារម្ភខ្លាំងលើចិន តែនៅលើនេះម្ចាស់ផ្ទះហាក់ដូចជាមិនសូវរងគំនាបទេ។
តាំងពីថ្ងៃបើកទ្វារជំនួបប្រជុំដំបូងភ្លាមមក ភាគីចិនជាម្ចាស់ផ្ទះ បានអះអាង និងអំពាវនាវឱ្យពិភពលោកចាំបាច់ត្រូវតែបង្កើនកិច្ចសហប្រតិបត្តិការអន្តរជាតិ ដើម្បីទ្រទ្រង់កំណើនសេដ្ឋកិច្ច។ លោកនាយករដ្ឋមន្ត្រីចិន បានប្រកាសថា ពិភពលោកត្រូវការស្វែងរកក្បាលម៉ាស៊ីនថ្មីសម្រាប់អូសទាញកំណើនសេដ្ឋកិច្ច។ តាំងពីយូរឆ្នាំមកហើយ ចិន ដែលជាមហាអំណាចបានតួនាទីនេះ ប៉ុន្តែចិនមិនអាចទទួលបន្ទុកតែម្នាក់ឯងបានឡើយ។
នយោបាយផ្តល់សន្ទុះសេដ្ឋកិច្ចក្នុងទ្រង់ទ្រាយធំរបស់ប៉េកាំង ក្រោយវិបត្តិហិរញ្ញវត្ថុអន្តរជាតិឆ្នាំ២០០៨ បានអនុញ្ញាតឱ្យបានក្លាយជាទន្ទល់សេដ្ឋកិច្ចពិភពលោក ព្រោះក្រុមប្រទេសលោកខាងលិចងើបឡើងវិញយ៉ាងត្រដាបត្រដួស។ ប៉ុន្តែពីរឆ្នាំចុងក្រោយ សេដ្ឋកិច្ចចិនបានបន្ថយល្បឿនគួរឱ្យព្រួយបារម្ភ។ កាលពីខែមករា ភាគហ៊ុននិងលុយយ័នបានដាំក្បាលចុះយ៉ាងខ្លាំង គួរឱ្យតក់ស្លុតខ្លាចចិនធ្លាក់ក្នុងវិបត្តិហិរញ្ញវត្ថុ។ តាំងពីពេលនោះមក ទីផ្សារភាគហ៊ុនចិនក៏ងាប់ស្តូក តែអ្នកវិនិយោគលែងភ័យ សកម្មភាពសេដ្ឋកិច្ចហាក់កំរើកឡើងវិញ។ បើតាមការព្យាកររបស់អង្គការមូលនិធិរូបិយវត្ថុអន្តរជាតិ កំណើនសេដ្ឋកិច្ចចិន នៅតែម្តុំ៦,៦% ប៉ុណ្ណោះ។
ប៉ុន្តែថ្វីបើអន្តរកាលកំណែទម្រង់សេដ្ឋកិច្ចចិនអាចធ្វើឱ្យសេដ្ឋកិច្ចទន់ខ្សោយរបស់ពិភពលោក កាន់តែផុតផើយមែន តែគឺបញ្ហាBrexitទេដែលជាគ្រាប់មីនបំបែកក្តីសង្ឃឹមមិនឱ្យពិភពលោកបានស្គាល់កំណើនសេដ្ឋកិច្ចដូចការគិតបាននោះ។ នេះជាការព្រមានរបស់FMI ទៅកាន់រដ្ឋមន្ត្រីក្រសួងហិរញ្ញវត្ថុហ្សេ២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ