ហ្វីលីពីន បញ្ចេញបញ្ជីខ្មៅអ្នកជាប់ពាក់ព័ន្ធនឹងគ្រឿងញៀន
ប្រធានាធិបតីហ្វីលីពីន លោក រ៉ូដ្រីហ្កោ ឌុយទែរតេ Rodrigo Duterte ដែលបានសន្យាប្រយុទ្ធប្រឆាំងគ្មានអាសូរការជួញដូរគ្រឿងញៀន បានធ្វើការចោទប្រកាន់អ្នកទទួលខុសត្រូវហ្វីលីពីន ជាង១៦០នាក់ ខ្លះជាចៅក្រម តំណាងសភា ប៉ូលិស និងយោធា ថាមានពាក់ព័ន្ធនឹងសំណុំរឿងគ្រឿងញៀន។ លោកប្រមុខរដ្ឋ បានស្នើសុំឱ្យពួកគេទាំងនោះសុខចេញសារភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ប្រធានាធិបតីហ្វីលីពីនថ្មី បានសន្យានឹងកម្ចាត់ឱ្យអស់ក្រុមឧក្រិដ្ឋជនគ្រឿងញៀន ក្នុងរយៈពេល៦ខែ។ តាំងពេលនោះមក គេរាប់ឃើញមានមនុស្សចំនួន៨០០នាក់ ដែលជាប់ចោទថាមានពាក់ព័ន្ធនឹងពួកជួញដូរគ្រឿង ត្រូវបានប្រហារជីវិត ដោយប៉ូលិស ឬដោយមនុស្សរបស់ប្រធានាធិបតី។
នៅក្នុងសុន្ទរកថាប្រចាំថ្ងៃអាទិត្យនេះ លោក ឌុយទែរតេ បានបញ្ចេញឈ្មោះ ចៅក្រម៩នាក់ និងតំណាងសភា ឬអតីតសមាជិកសភា ចំនួនជាង៥០នាក់ អភិបាលក្រុង និងតំណាងឃុំសង្កាត់ជាច្រើនរូបទៀត ថាមានប្រលាក់ប្រលូសជាមួយសំណុំរឿងគ្រឿងញៀន។ លោកប្រមុខរដ្ឋបានបញ្ជាឱ្យគេដកអង្គរក្ស ដកសិទ្ធកាន់អាវុធពីឥស្សរជនទាំងនោះ និងដោយបានស្នើសុំឱ្យពួកគេចេញមុខសារភាព ដោយគំរាមថាប្រសិនបើនរណាម្នាក់ហ៊ានប្រកែក ឬបញ្ចេញសកម្មភាពហិង្សា ឬក្រាញ នោះប៉ូលិសមានសិទ្ធិបាញ់សម្លាប់ភា្លម។
មានសំដីអសុរស និយាយផាំងៗ រហូតឡើងប្រជាប្រិយភាពខ្លាំង និងបានជាប់ឆ្នោតជាប្រធានាធិបតី លោកឌុយទែរតេ បានទទួលស្គាល់ថា អាចមានការចោទប្រកាន់ច្រលំ ចំពោះជនខ្លះ។ ប៉ុន្តែបញ្ជីខ្មៅ ដៅឈ្មោះអ្នកទទួលខុសត្រូវក្នុងរដ្ឋាភិបាលជាប់ដានគ្រឿងញៀន ទាំងជាង១៦០នាក់ រៀបចំដោយប៉ូលិស និងដោយយោធានេះ ធ្វើឡើងដោយគ្មានគិតអំពីនិន្នការនយោបាយទេ ជាក់ស្តែងសូម្បីតែមនុស្សជាមិត្តរបស់លោកប្រធានាធិបតី ក៏ជាប់ក្នុងសំណាញ់ច្បាប់ដែរ។
ក្លាយជាប្រមុខដឹកនាំប្រទេស ដោយសារកម្មវិធីសន្តិសុខមហាតឹងតែង លោក ឌុយទែរតេ បានបើកភ្លើងខៀវឱ្យប៉ូលិសកុំស្ទាក់ស្ទើរនឹងបាញ់សម្លាប់អ្នកជួញដូរគ្រឿងញៀន និងបានលើកទឹកចិត្តពលរដ្ឋឱ្យជួយសហការជាមួយរដ្ឋាភិបាលវែករកមុខឧក្រិដ្ឋជន។ លោកប្រធានាធិបតី ក៏បានច្រានចោទ និងមិនខ្វល់នឹងពាក្យរិះគន់របស់អង្គការការពារសិទ្ធិមនុស្សទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ