អាមេរិកប្រកាសពីការស្លាប់មេអង្គការរដ្ឋអ៊ីស្លាមនៅប៉ាគីស្ថាន និងនៅអាហ្វហ្កានីស្ថាន
នៅថ្ងៃសុក្រ ទី១២ សីហា ក្រសួងការពារជាតិអាមេរិកបានប្រកាសឲ្យដឹងពីការស្លាប់ជន Hafez Saïf មេអង្គការរដ្ឋអ៊ីស្លាមនៅប្រទេសប៉ាគីស្ថាន និងនៅអាហ្វហ្កានីស្ថាន។ ជន Saïf ត្រូវបានស្លាប់ដោយគ្រាប់កាំជ្រួចបាញ់ចេញពីយន្តហោះដ្រូនអាមេរិកកាលពីថ្ងៃទី២៦ កក្កដាកន្លងទៅនៅក្នុងខេត្តអាហ្វហ្កានីស្ថាន Nangarhar។ ការសម្លាប់បានភេរវជន Saïf ជាសក្ខីកម្មថ្មីមួយទៀតដែលបញ្ជាក់ពីឆន្ទៈរបស់ទីក្រុងវ៉ាស៊ីតោនក្នុងការបន្តយុទ្ធនាការប្រយុទ្ធប្រឆាំងនឹងចលនាភេរវនិយមអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ជាមួយនឹងការស្លាប់មេអង្គការរដ្ឋអ៊ីស្លាម Hafez Saïf ដោយយន្តហោះដ្រូនអាមេរិកក្នុងទឹកដីអាហ្វហ្កានីស្ថាននាំគេនឹកឃើញពីការស្លាប់អតីតមេចលនាឧទ្ទាមតាលីបង់ Mollah ដោយយន្តហោះដ្រូនអាមេរិកដូចគ្នាក្នុងខែឧសភាកន្លងទៅ។ កាលពី ១ឆ្នាំមុន អាមេរិកធ្លាប់បានគិតថា យន្តហោះដ្រូនរបស់ខ្លួនបានសម្លាប់ជន Hafez Saïf បាត់ទៅហើយ តែទីបំផុត គឺទើបតែនៅថ្ងៃទី២៦ កក្កដាកន្លងទៅថ្មីៗនេះទេដែលទើបសម្លាប់ជន Hafez Saïf បានជាផ្លូវការ។ ទីក្រុងវ៉ាស៊ីនតោនសង្ឃឹមថា ការកំចាត់បានមេអង្គការរដ្ឋអ៊ីស្លាមប្រចាំនៅប៉ាគីស្ថាន និងនៅអាហ្វហ្កាស្ថានរូបនេះជាបច្ច័យមួយយ៉ាងសំខាន់ក្នុងការទប់ស្កាត់ការអភិវឌ្ឍន៍របស់បណ្តាញភេរវនិយមអន្តរជាតិនៅក្នុងតំបន់។
សូមជម្រាបជូនថា អង្គការរដ្ឋអ៊ីស្លាមដែលកំពុងជួបការលំបាកខ្លាំង និងបាត់បង់ទឹកដីមួយភាគធំនៅក្នុងប្រទេសស៊ីរី និងអ៊ីរ៉ាក់បាននិងកំពុងព្យាយាមពង្រីកឥទ្ធិពល និងស្វែងរកជម្រកថ្មីនៅកន្លែងផ្សេង ពិសេសនៅក្នុងទឹកដីអាហ្វហ្កានីស្ថាន និងប៉ាគីស្ថាន។ តែដោយលំបាកក្នុងការកាន់កាប់ទីតាំងមួយច្បាស់លាស់ ពួកនេះបង្វែរគោលដៅបង្កភេរវកម្មសម្លាប់មនុស្ស ដូចយ៉ាងនៅពីមុខមន្ទីរពេទ្យមួយក្នុងប្រទេសប៉ាគីស្ថានកាលពីថ្ងៃចន្ទ ទី៨ សីហាដែលបណ្តាលឲ្យមានមនុស្សស្លាប់៧៣នាក់ និងភេរវកម្មក្នុងទីក្រុងកាប៊ូល ប្រទេសអាហ្វហ្កានីស្ថានកាលពីថ្ងៃទី២៣ កក្កដាដោយបណ្តាលឲ្យមាននុស្សស្លាប់ជាច្រើននាក់។
យ៉ាងណាក៏ដោយ និងទោះបីជាអង្គការរដ្ឋអ៊ីស្លាមព្យាយាមបញ្ចុះបញ្ចូលពួកឧទ្ទាមតាលីបង់មួយចំនួនឲ្យចូលរួមជាមួយខ្លួនក៏ដោយ ក៏គេសង្កេតឃើញថា តាលីបង់នៅបន្តជាចលនាឧទ្ទាមដែលកំពុងបន្តសោយរាជ្យ និងកំពុងមានឥទ្ធិពលខ្លាំងនៅក្នុងតំបន់ដដែល។ តាំងពីការចាកចេញរបស់កម្លាំងទ័ពអូតង់ និងអាមេរិកពីទឹកដីអាហ្វហ្កានីស្ថានមក រដ្ឋាភិបាលទីក្រុងកាប៊ូលកំពុងជួបការលំបាកខ្លាំងក្នុងការប្រឈមមុខនឹងពួកឧទ្ទាមតាលីបង់ដោយខ្លួនឯង។ តែការកំចាត់បានមេអង្គការរដ្ឋអ៊ីស្លាម Hafez Saïf ដោយយន្តហោះដ្រូនអាមេរិកក្នុងទឹកដីអាហ្វហ្កានីស្ថានពេលនេះជាសក្ខីកម្មមួយដែលបញ្ជាក់ថា អាមេរិកមិនបានបោះបង់ចោលរដ្ឋាភិបាលអាហ្វហ្កានីស្ថានទាំងស្រុងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ