អង្គការសហប្រជាជាតិ ៖ កូរ៉េខាងជើងដាក់មីនតាមព្រំដែនជាមួយកូរ៉េខាងត្បូង
កូរ៉េខាងជើងបាននិងកំពុងបង្កប់មីន ក្រោមដី ថ្មីៗទៀត នៅក្នុងតំបន់គ្មានយោធា ដែលខណ្ឌចែកកូរ៉េខាងជើងពីខាងត្បូង។ នេះបើតាមទីបញ្ជាការដ្ឋានអង្គការសហប្រជាជាតិនៅកូរ៉េ ដែលមានភារៈឃ្លាំមើលបទឈប់បាញ់ ព្រមព្រៀងដោយកូរ៉េខាងទាំងពីរ ដើម្បីបិទបញ្ចប់សង្គ្រាម នៅឆ្នាំ១៩៥៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ទីបញ្ជាការដ្ឋានអង្គការសហប្រជាជាតិ នៅកូរ៉េ បានមើលឃើញយោធាកូរ៉េខាងជើង កំពុងដាក់ពង្រាយបង្កប់គ្រាប់មីន នៅតាមបណ្តោយច្រាំងភាគខាងជើងស្ពាន “គ្មានថ្ងៃត្រលប់”។ ហើយអង្គការបានចេញសេចក្តីថ្លែងការណ៍មួយ ធ្វើការថ្កោលទោស យ៉ាងចាស់ដៃ យោធាប្រជាមានិតកូរ៉េខាងជើង ដោយបានគូសបញ្ជាក់ថា គ្រាប់មីន និងជាតិផ្ទុះ នៅលើ និងក្បែរស្ពាន អាចបង្កគ្រោះថ្នាក់ ដល់មនុស្ស ទាំងពីរប្រទេស។
មានមនុស្សរាប់ពាន់នាក់ ភាគច្រើនជាកុមារក្នុងវ័យសិក្សា តែងនាំគ្នាឆ្លងកាត់ និងទៅទស្សនាតំបន់គ្មានកងទ័ព ដែលខ័ណ្ឌចែកកូរ៉េជាពីរ ខាងជើងនិងខាងត្បូង។ ផ្ទុយស្រឡះពីឈ្មោះហៅ “តំបន់គ្មានកងទ័ព”នេះ ជាតំបន់ដែលមានទាហានប្រចាំការច្រើនជាងគេបំផុតនៅលើពិភពលោក ជាតំបន់ដែលមានការការពារ និងបង្កប់មីនស្ទើរពេញដី។ តំបន់គ្មានកងទ័ពនេះ ត្រូវប្រើជាតំបន់ទ្រនាប់ លាតសន្ធឹងប្រវែងពីរគីឡូម៉ែត្រ ពីបន្ទាត់ព្រំដែន។
សង្គ្រាមនៅឧបទ្វីបកូរ៉េ ពីឆ្នាំ១៩៥០-៥៣ ត្រូវបានបិទបញ្ចប់ដោយបទឈប់បាញ់ តែគ្មានការចុះកិច្ចព្រមព្រៀងសន្តិភាពរវាងគ្នាទេ ដូច្នេះបើតាមភាសាបច្ចេកទេស កូរ៉េខាងជើងនិងខាងត្បូងនៅមានសង្គ្រាមនឹងគ្នាជានិច្ច។
ទីបញ្ជាការដ្ឋានអង្គការសហប្រជាជាតិ បានបដិសេធមិនធ្វើអត្ថាធិប្បាយអ្វីទាំងអស់ទាក់ទងនឹងការដាក់ពង្រាយមីននេះ ប៉ុន្តែបើតាមប្រភពយោធាមួយ ពាំពាក្យបន្តដោយភ្នាក់ងារសារព័ត៌មានកូរ៉េខាងត្បូង យ៉ុងហាប់ សកម្មភាពពង្រាយមីននេះ គឺដើម្បីទប់ស្កាត់កុំឱ្យទាហានកូរ៉េខាងជើង នៅសមរភូមិមុខលួចរត់គេចខ្លួន ទៅចុះចូលជាមួយនឹងកូរ៉េខាងត្បូងបាន។
ទំនាក់ទំនងអន្តរកូរ៉េ ពេលនេះកំពុងធ្លាក់ក្នុងភាពតានតឹងបំផុត ដោយមានរលកផ្តាច់ខ្លួនសុំជ្រកកោនជាមួយកូរ៉េសេរីច្រើន។ កាលពីថ្ងៃចន្ទ ព្យុងយ៉ាងបានគំរាមថានឹងធ្វើវាយប្រហារនុយក្លេអ៊ែរ នៅថ្ងៃទីមួយនៃសមយុទ្ធប្រចាំឆ្នាំកូរ៉េខាងត្បូង-អាមេរិក។ ហើយកាលពីថ្ងៃអាទិត្យ អ្នកទទួលខុសត្រូវក្រសួងបង្រួបបង្រួមកូរ៉េ បានលើកឡើងអំពីគ្រោះព្យុងយ៉ាងបង្កភេរវកម្ម ឬ ប្រហារជីវិតអ្នកចង់ចុះចូលនឹងសត្រូវកូរ៉េខាងត្បូងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ