កូរ៉េខាងជើងនឹងមានកម្មវិធីបាលីស្ទិកអន្តរទ្វីបក្នុងពេលឆាប់ៗមែនឬ ?
ចុះផ្សាយនៅថ្ងៃ៖
ស្តាប់ - ០៦:៣២
ជាការបាញ់សាកល្បង ប្រកបដោយជោគជ័យ។ បាញ់ចេញនាវាមុជទឹក ទៅលើផ្ទៃអាកាសសំដៅប្រទេសជប៉ុន។ ចំណោលគ្រាប់មីស៊ីល បានហោះចម្ងាយជិត៥០០គីឡូម៉ែត្រ មុននឹងធ្លាក់ទៅក្នុងដែនតំបន់ហោះហើរហាមឃាត់របស់ជប៉ុន។ ប្រតិកម្មរបស់សហគមន៍អន្តរជាតិ បានធ្លាក់មកជាបន្តបន្ទាប់ថ្កោលទោសទង្វើរបស់ព្យុងយ៉ាង។ តែសម្រាប់អ្នកឯកទេស ការបាញ់មីស៊ីលរបស់កូរ៉េខាងជើងថ្ងៃនេះ បញ្ជាក់បានយ៉ាងច្បាស់ថា កម្មវិធីមីស៊ីលបាលីស្ទិកកូរ៉េខាងជើង មានការជឿនលឿនខ្លាំង។
មីស៊ីលបាលីស្ទិក បាញ់ចេញពីនាវាមុជទឹក នៅថ្ងៃពុធនេះ ទំនងជាមីស៊ីលប្រភេទ KN-11 ដែលប្រើបច្ចេកវិទ្យាមីស៊ីលក្រោមទឹក MLBM (Submarine launched Ballistic Missile)ប្រកបដោយយុទ្ធសាស្ត្របំផុត ព្រោះការបាញ់បែបនេះ សត្រូវពិបាកចាប់ ជាងបាញ់ពីដីឆ្ងាយណាស់។
ពីមុនៗមក កូរ៉េខាងជើងបានបាញ់មីស៊ីលប្រភេទនេះ ជាច្រើនដងដែរ តែគ្មានគ្រាប់ណាមួយអាចបាញ់ឆ្លង បានហួសពី ៣០គីឡូម៉ែត្រទេ។ នៅលើកនេះ រយៈចម្ងាយរបស់ចំណោលគ្រាប់ មានប្រវែងដល់ទៅ ៤៨០គីឡូម៉ែត្រ- ធ្លាក់ក្នុងតំបន់ហាមឃាត់ហោះហើររបស់ជប៉ុន ដែលសូម្បីយន្តហោះធម្មតាក៏ត្រូវសុំការអនុញ្ញាតពីអាជ្ញាធរជប៉ុនផង។ ជាងនេះទៅទៀត បើតាមភ្នាក់ងារសារព័ត៌មានយ៉ុងហាប់កូរ៉េខាងត្បូង មុំនៃការបាញ់មានរង្វាស់ធំខ្លាំង ដែលនាំឱ្យគេអាចគុណគិតបានថា មីស៊ីលបាលីស្ទិកកូរ៉េខាងជើងនេះ អាចបាញ់បានចម្ងាយដល់ប្រមាណមួយពាន់គីឡូម៉ែត្រ បើតាមក្បួន។
នៅមានសំណួរជាច្រើនដែលអ្នកឯកទេសកំពុងស្វែងចម្លើយនៅឡើយទាក់ទងនឹងការបាញ់មីស៊ីលបាលីស្ទិកនេះ ប៉ុន្តែអ្វីដែលច្បាស់លាស់ខ្លាំង គឺកូរ៉េខាងជើងសម្រេចបានជោគជ័យ។ ព្យុងយ៉ាងកំពុងបន្តអភិវឌ្ឍប្រព័ន្ធបាលីស្ទិករបស់ខ្លួន តែភាពជឿនលឿនមានច្រើនខ្លាំងមែន។ សមត្ថភាពមីស៊ីលបាលីស្ទិកនេះ បាននិងកំពុងបង្កើនការគំរាមកំហែងនុយក្លេអ៊ែរមួយកំរិតទៀត។
បើតាមរដ្ឋមន្ត្រីក្រសួងការពារជាតិកូរ៉េខាងត្បូង នៅរវាងបីឬបួនឆ្នាំទៀត មីស៊ីសបាលីស្ទិកបាញ់ចេញនាវាមុជទឹកកូរ៉េខាងជើងអាចចេញធ្វើប្រតិបត្តិការបាន ហើយក្នុងករណីនេះព្យុងយ៉ាង ពិតជានឹងសម្រេចគម្រោងធ្វើមីស៊ីលរយៈឆ្ងាយ និងទប់ទល់បាន ក្នុងករណីមានការវាយប្រហារនុយក្លេអ៊ែរ។ អ្នកឯកទេសជាច្រើនបានមើលឃើញដូចគ្នាថា ព្យុងយ៉ាងបានធ្វើដំណើរទៅមុខខ្លាំង ក្នុងការសម្រេចផលិតមីស៊ីលអន្តរទ្វីប ដែលមានសមត្ថភាពពាំភ្លើងនុយក្លេអ៊ែរ ទៅដល់ទ្វីបអាមេរិក។
កូរ៉េខាងជើង មិនគំរាមចោល
ជាច្រើនថ្ងៃមកហើយ ដែលព្យុងយ៉ាងបានស្រែកក្តែងៗ ថាបានត្រៀមជាស្រេចនឹងធ្វើការវាយប្រហារ ជាកិច្ចការពារខ្លួន ប្រឆាំងគ្រប់ការប៉ុនប៉ុងវាយលុករបស់សត្រូវ។ ហើយតាំងពីថ្ងៃចន្ទមក អាមេរិកនិងកូរ៉េខាងត្បូង បានដឹកនាំធ្វើសមយុទ្ធរួមគ្នា ដោយមានទាហានកូរ៉េខាងត្បូង៥ម៉ឺននាក់ និងទាហានអាមេរិក២៥០០០នាក់ ចូលរួម។
បើទោះបីជាអាមេរិកនិងកូរ៉េខាងត្បូង បានអះអាងហើយ អះអាងទៀតថាសមយុទ្ធ Ulchi Freedom ធ្វើឡើងក្នុងកម្មវត្ថុហាត់ការពារខ្លួនយ៉ាងសុទ្ធសាធយ៉ាងណាក៏ដោយ ក៏សម្រាប់កូរ៉េខាងជើង សមយុទ្ធនេះ មានទម្រង់ជាលក្ខណៈត្រៀមចូលឈ្លានពាន។ ហេតុដូច្នេះហើយបានព្យុងយ៉ាងត្រូវបាញ់មីស៊ីលបាលីស្ទិកឡើង ទុកឱ្យប្រទេសជិតខាងនាំគ្នាបញ្ចេញប្រតិកម្មថ្កោលទោស និងព្រួយបារម្ភ។
ឧបទ្វីបកូរ៉េធ្លាក់ក្នុងភាពតានតឹង ខ្លាំងមិនធ្លាប់មានឡើយគិតចាប់តាំងពីឆ្នាំ១៩៧០មក ដោយនារយៈពេលប៉ុន្មានខែចុងក្រោយនេះ ព្យុងយ៉ាងបានបាញ់មីស៊ីលច្រើនដង ជាពិសេសទៅទៀត កូរ៉េខាងជើងបានកាត់ផ្តាច់គ្រប់ទំនាក់ទំនងជាមួយកូរ៉េខាងត្បូង។ មានទម្លាប់គំរាមស្រាប់ ឥលូវមានការបាញ់ដោយជាក់ស្តែង និងញយៗដងដូច្នេះ ហានិភ័យនៃការប៉ះទង្គិច ជាហថាហេតុ ឬដោយអចេតនា មានខ្ពស់ខ្លាំងណាស់។ ការជ្រុលជ្រួសតែបន្តិចបន្តួច ផ្នែកយោធា ទោះបីជាតូចតាចក្តី ក៏អាចផ្តល់ផលវិបាកធ្ងន់ធ្ងរណាស់។
ជំនួបត្រីភាគី ចិន ជប៉ុន កូរ៉េខាងត្បូង បាំងជិតដោយការបាញ់មីស៊ីលរបស់ព្យុងយ៉ាង
នៅថ្ងៃនេះ រដ្ឋមន្ត្រីការបរទេសចិន ជប៉ុន និងកូរ៉េខាងត្បូង ត្រូវបើកជំនួបត្រីភាគី ដែលគ្រប់គ្នាព្រួយខ្លាចលុបចោលទៅវិញ ដោយសារតែចិននិងជប៉ុនកំពុងតានតឹងដាក់គ្នាខ្លាំងផង។ នៅទីបំផុត ជំនួបត្រីភាគីអាចប្រព្រឹត្តទៅបាន រដ្ឋមន្ត្រីការបរទេសចិន បានមកធ្វើទស្សនកិច្ចនៅជប៉ុន ជាលើកទីមួយគិតចាប់តាំងពីឆ្នាំ២០១២មក ស្រាប់តែត្រូវមកប្រលាក់ប្រលូក បាំងជិតដោយការបាញ់មីស៊ីលរបស់កូរ៉េខាងជើងទៅវិញ។
ក្នុងពេលកំពុងស្ថិតនៅក្រុងតូក្យូ និងក្រោយពីបានជួបពិភាក្សាជាមួយសមភាគី ជប៉ុននិងកូរ៉េខាងត្បូង លោក យ៉ាង យី ប្រមុខការទូតចិន បានប្រកាសថា “ប៉េកាំងជំទាស់នឹងការអភិវឌ្ឍនុយក្លេអ៊ែររបស់កូរ៉េខាងជើង ហើយចិនប្រឆាំងនឹងការរំលោភសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ លេខ ២២៧០”។
សេចក្តីសម្រេចចិត្តដែលបានហាមឃាត់មិនឱ្យព្យុងយ៉ាងអភិវឌ្ឍកម្មវិធីបាលីស្ទិកទេ។ ប៉ុន្តែ កូរ៉េខាងជើង ហាក់មិនខ្វល់នឹងទណ្ឌកម្មរបស់ក្រុមប្រឹក្សាសន្តិសុខ ឯចំណែកចិនដែលរងការរិះគន់ពីអន្តរជាតិថាមិនបានប្រឹងទប់កូរ៉េខាងជើង ក៏ទំនងជាមិនមានឥទ្ធិពលលើព្យុងយ៉ាងដូចមុនដែរ។
កូរ៉េខាងជើងក្រោមការដឹងនាំដ៏ក្មេងខ្ចីរបស់ គីមជុនអ៊ុន ហាក់ដូចជាមុះមុតបំផុតក្នុងការសម្រេចបំណងដ៏ថ្លៃថ្លា គឺការមានអាវុធនុយក្លេអ៊ែរ។ ការវិភាគពីមុនដែលថា កូរ៉េខាងជើង តែងបង្កហេតុដើម្បីទាក់ទាញចំណាប់អារម្មណ៍ ឬជាថ្នូរនឹងសម្បទានសេដ្ឋកិច្ចឬការទូត ដូចជាលែងសូវត្រូវហើយ ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ