បារាំងទាមទារឲ្យវៀតណាមដោះលែងសកម្មជនសិទ្ធិមនុស្ស៤រូប
នៅឱកាសដំណើរទស្សនៈកិច្ចផ្លូវរដ្ឋរបស់លោក François Hollande ប្រធានាធិបតីបារាំងនៅវៀតណាម ប្រទេសបារំាង បានទាមទារឲ្យអាជ្ញាធរវៀតណាម ដោះលែងសកម្មជនការពារសិទ្ធមនុស្ស៤រូប នេះបើយោងតាមប្រភពជិតដិតប្រធានាធិបតីបារាំងនៅថ្ងៃពុធ៧កញ្ញានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
សកម្មជនការពារសិទ្ធមនុស្សវៀតណាមទាំង៤រូបនោះ មាន ម្នាក់ជាសកម្មជនការពារសាសនាកាតូលីក ម្នាក់ទៀតជាស្ថាបនិកនៃគណបក្សនយោបាយមួយ ដែលក្នុងប្រទេសនេះមានគណបក្សកុម្មុយនិស្តតែមួយគត់ជាអ្នកដឹកនាំប្រទេស ម្នាក់ទៀតជាសកម្មជនប្រយុទ្ធប្រឆាំងទល់នឹងអំពើដកហូតកម្មសិទ្ធដីធ្លីតាមអំពើចិត្តនិងអ្នកសរសេរប្លុកមួយរូប។
នៅក្នុងចំណោមសកម្មជនការពារសិទ្ធិមនុស្សទាំង៤រូបនោះ មានម្នាក់ជាស្រ្តីភេទ។
អាជ្ញាធរវៀតណាម បានផ្តន្ទាទោសសកម្មជនទាំង៤រូបដាក់គុកក្នុងរយៈពេលដ៏យូរឆ្នាំ -នេះបើយោងតាមប្រភពខាងលើដដែល តែដោយគ្មានបញ្ចេញអត្តសញ្ញាណរបស់សកម្មជនទាំងនោះឲ្យដឹងឡើយ។
នៅមុនពេលដំណើរទស្សនៈកិច្ចរបស់លោក ហ្រ្វង់ស័រ ហូឡង់នេះ អង្គការក្រៅរដ្ឋាភិបាលចំនួន៣ ដែលក្នុងនោះមាន អង្គការសហព័ន្ធអន្តរៈជាតិបន្ទុកខាងការពារសិទ្ធមនុស្ស(FIDH) បានទាមទារឲ្យលោកហូឡង់លើកនិយាយពីបញ្ហាសិទ្ធមនុស្សជាមួយវៀតណាមនៅក្នុងលិខិតចំហរមួយរបស់ខ្លួននិងក៏បានអះអាងបញ្ចាក់ផងដែរពីការព្រួយបារម្ភរជាពន់ពេករបសខ្លួននៅលើបញ្ហារំលោភសិទ្ធមនុស្សនេះ។
ចំណែកលោកស្រី Cammille Blanc ដែលជាប្រធានអង្គការការពារសិទ្ធមនុស្សឈ្មោះ”Amnesty International” របស់បារាំងវិញ នៅក្នុងសេចក្តីជូនដំណឹងមួយរបស់ខ្លួន បានបញ្ចេញប្រតិកម្មថា” បញ្ហាសិទ្ធិមនុស្សពុំត្រូវឲ្យគេជាន់ឈ្លីស្រេចតែអំពើចិត្តដើម្បីប្តូរនឹងកិច្ចព្រមព្រៀងពាណិជ្ជកម្មនោះទេ ដោយលោកស្រីបានលើកឡើងផងដែរពីបញ្ហាសន្តិសុខ។
លោកប្រធានាធិបតីបារាំងវិញ ជាសាធារណៈធ្លាប់បានថ្លែងពីបញ្ហាសិទ្ធមនុស្សពីរបីម៉ាត់ដែរនៅឱកាសទស្សនកិច្ចរបស់លោកនៅវៀតណាម ហើយលោកក៏បានអះអាងបញ្ជាក់ដែរថា លោកមានការយកចិត្តទុកដាក់ខ្លាំងនៅលើបញ្ហានីតិរដ្ឋ”។
បន្ទាប់ពីបានបំពេញទស្សនកិច្ចនៅហាណូយកាលពីថ្ងៃអង្គារម្សិលមិញមក លោកប្រធានាធិបតីបារាំង នៅថ្ងៃពុធនេះ បានជួបប្រាស្រ័យជាមួយបណ្តាអ្នកដឹកនាំក្រុមហ៊ុនបារាំងដែលទើបបង្កើតថ្មីថ្មោងនិងសហគ្រាសបារាំងផ្សេងៗទៀតនៅហូជីមីញក៏ព្រមទាំងវិទ្យាស្ថានវះកាត់បេះដូងមួយដែលជានិមិត្តរូបនៃកិច្ចសហប្រតិបត្តិការជាមួយវៀតណាមនៅលើវិស័យវិជ្ជសាស្ត្រ។
សូមបញ្ជាក់ថាវិទ្យាស្ថានបេះដូងនេះ ដែលត្រូវបានបង្កើតឡើងនៅឆ្នាំ១៩៩២ដោយសាស្រ្តាចារ្យវិជ្ជបណ្ឌិតបារាំង លោក Alain Carpentier ជារចនាសម្ព័នវះកាត់បេះដូងលើកទីមួយរបស់បារាំងនៅក្នុងប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ