Standard & Poor’s៖ចំណាត់ការប្រឆាំងគ្រឿងញៀនរបស់លោកឌុយទែរតេកំពុងគំរាមសេដ្ឋកិច្ច និងស្ថាប័នប្រជាធិបតេយ្យ
នៅថ្ងៃពុធ ទី២១ កញ្ញា ទីភ្នាក់ងារវាយតម្លៃហានិភ័យបំណុលដែលហៅកាត់ជាភាសាអង់គ្លេសថា Standard & Poor’s បានចាប់អារម្មណ៍លើចំណាត់ការសម្លាប់មនុស្សរបស់លោកប្រធានាធិបតីហ្វីលីពីនឌុយទែរតេនៅក្នុងយុទ្ធនាការប្រយុទ្ធប្រឆាំងនឹងគ្រឿងញៀន។ Standard & Poor’s ទង្វើបង្រ្កាបគ្រឿងញៀនដោយសម្លាប់មនុស្សឆាប់ៗរបស់លោកឌុយទែរតេកំពុងគំរាមកំហែងលើវិស័យសេដ្ឋកិច្ច និងស្ថាប័នប្រជាធិបតេយ្យ។ ការព្រមានរបស់ Standard & Poor’s បានធ្លាក់មក ចំពេលដែលលោកឌុយទែរតេបានដៀមដាមដាក់សភាអឺរ៉ុប បន្ទាប់ពីសភាអឺរ៉ុបបានថ្កោលទោសទង្វើសម្លាប់រង្គាលរបស់លោកឌុយទែរតេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ទីភ្នាក់ងារ Standard & Poor’s មិនជំទាស់នឹងនយោបាយបំបាត់គ្រឿងញៀនដែលកំពុងគ្របដណ្តប់ខ្លាំងលើប្រទេសហ្វីលីពីនទេ តែមិនយល់ស្របនឹងចំណាត់ការកណ្តាប់ដៃដែក និងជ្រុលហួសហេតុរបស់លោកប្រធានាធិបតីឌុយតែរតេ។ នៅពេលនេះ Standard & Poor’s បន្តរក្សាពិន្ទុស្ថានភាពសេដ្ឋកិច្ចរបស់ហ្វីលីពីន តែបានគូសបញ្ជាក់ពីចំណុចខ្សោយមួយចំនួននៃនយោបាយរបស់រដ្ឋាភិបាលលោកឌុយទែរតេ។ អ្វីដែលStandard & Poor’s បានចាប់អារម្មណ៍ខ្លាំងជាងគេនោះ គឺការដែលលោកឌុយទែរតេបានរឹតបន្តឹងច្បាប់ និងសណ្តាប់ធ្នាប់ដែលញុះញង់ឲ្យមានឃាតកម្មក្រៅប្រព័ន្ធតុលាការ។
Standard & Poor’s បានយល់ឃើញថា វិធានការរបស់លោកឌុយទែរតេរបៀបនេះអាចនឹងធ្វើឲ្យប៉ះពាល់ដល់ការគោរពនីតិរដ្ឋ សិទ្ធិមនុស្ស សេរីភាពសារព័ត៌មាន និងស្ថាប័នប្រជាធិបតេយ្យផ្សេងទៀត។ សូមជម្រាបជូនថា លោកឌុយទែរតេដែលបានជាប់ឆ្នោតប្រធានាធិបតីហ្វីលីពីនក្នុងខែឧសភា បានសន្យាកំចាត់ការជួញដូរគ្រឿងញៀនឲ្យអស់ពីប្រទេស ទោះបីជាត្រូវបង់ថ្លៃប៉ុន្មានក៏ដោយ។ គ្រាន់តែកាន់តំណែងបានប៉ុន្មានខែ មានមនុស្សប្រមាណជា ៣ ០០០នាក់ត្រូវបានសម្លាប់ ក្នុងនោះ មាន ១ភាគ៣សម្លាប់ដោយប៉ូលិស។ ក្រៅពីបញ្ជាឲ្យប៉ូលិស និងទាហានសម្លាប់អ្នកជួញដូរគ្រឿងញៀន លោកឌុយទែរតេក៏បានបើកដៃឲ្យប្រជាជនហ្វីលីពីនសម្លាប់អ្នកជួញដូរគ្រឿងញៀនដោយខ្លួនឯងដែរ។
ចំណាត់ការរបស់លោកឌុយទែរតេបានទទួលរងការរិះគន់ ទិតៀននិងថ្កោលទោសយ៉ាងខ្លាំងពីប្រទេសបស្ចិមលោក។ តែលោកឌុយទែរតេដែលគេស្គាល់ជាប្រធានាធិបតីមាត់ដាច ចូលចិត្តប្រើសម្តីថ្លោសក៏មិនញញើតនឹងឆ្លើយតបដោយសម្តីជេរប្រមាថចំពោះបុគ្គល ប្រទេស ឬស្ថាប័នអន្តរជាតិណាដែលលូកដៃចូលក្នុងកិច្ចការផ្ទៃក្នុងរបស់ហ្វីលីពីន។ លោកឌុយទែរតេបានប្រមាជតាំងពីប្រមុខសង្ឃកាតូលិកសម្តេចប៉ាបហ្រ្វង់ស័រ រហូតដល់លោកប្រធានាធិបតីអាមេរិកអូបាម៉ាថាជាកូនមីសំផឹង។ ថ្មីៗចុងក្រោយនេះ លោកឌុយទែរតេបានលើកចង្អុលដៃឲ្យក្តសហភាពអឺរ៉ុបដែលទើបថ្កោលទោសលើទង្វើរបស់លោក។
ទន្ទឹមគ្នានេះ លោកឌុយទែរតេក៏បានប្រកាសបន្តយុទ្ធនាការបោសសំអាតគ្រឿងញៀនរយៈពេល ៦ខែបន្ថែមទៀតដោយលោកយល់ឃើញថា បញ្ហាគ្រឿងញៀនដែលហ្វីលីពីនកំពុងជួបប្រទះសព្វថ្ងៃមានលក្ខណៈធ្ងន់ធ្ងរជាងអ្វីដែលលោកបានរង់ចាំទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ