សមយុទ្ធរួមគ្នារវាងប៉ាគីស្ថាននិងរុស្ស៊ី ជាលើកទី១ ពីថ្ងៃ២៤កញ្ញាដល់១០តុលា
ប៉ាគីស្ថាននិងរុស្ស៊ី ធ្វើសមយុទ្ធរួមគ្នាជាលើកតំបូងចាប់ពីថ្ងៃទី២៤កញ្ញានេះទៅ នៅខណៈពេលដែលប៉ាគីស្ថាននិងឥណ្ឌា កំពុងមានភាពតានតឹងនឹងគ្នាកាន់តែធ្ងន់ធ្ងរឡើងៗ-នេះបើយោងតាមការជូនដំណឹងរបស់កងទ័ពប៉ាគីស្ថាន នៅថ្ងៃសុក្រ២៣កញ្ញា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
សមយុទ្ធរួមគ្នារវាងប៉ាគីស្ថាននិងរុស្ស៊ី ដែលគ្រោងទុកជាយូរពេលមកហើយនោះ បានចាប់ផ្តើមនៅថ្ងៃទី២៤កញ្ញានេះរហូតដល់ថ្ងៃទី១០តុលាខាងមុខ។ ជាសមយុទ្ធមួយដែលគេមើលឃើញថា ជាការខិតចូលជិតរកគ្នារវាងប៉ាគីស្ថាននិងរុស្ស៊ីនៅលើផែនការ ការពារជាតិ រវាងប៉ាគីស្ថាននិងរុស្ស៊ីដែលប្រទេសទាំងពីរ បានចុះហត្ថលេខាលើកិច្ចព្រមព្រៀង "កិច្ចសហប្រតិបត្តិការយោធាមួយ"នៅឆ្នាំ ២០១៤។
ក្រោយពេលកងទ័ពជើងអាកាសប៉ាគីស្ថាន បានធ្វើសមយុទ្ធយ៉ាងគគ្រឹកគគ្រេងនាប៉ុន្មានថ្ងៃចុងក្រោយនេះ ជាអាទិ៍យន្តហោះចម្បាំងប៉ាគីស្ថាន បានធ្វើការចុះចតនៅតាមលើដងផ្លូវ Highway នៅចន្លោះរវាងក្រុង Islamabad និងក្រុង Lahore កងទ័ពជើងគោគរុស្ស៊ី ក៏បានធ្វើដំណើរមកដល់ប៉ាគីស្ថានដែរ។
យោងតាមអ្នកវិភាគរបស់យោធាប៉ាគីស្ថាន សមយុទ្ធទាំងនេះ ជាភស្តុតាងមួយដែលបញ្ជាក់អំពីចំណង់មូស្គូនៅក្នុងការពង្រីកឥទ្ធិពលយោធាខ្លួននៅក្នុងតំបន់អាស៊ីភាគខាងត្បូង។ ចំពោះអ្នកវិភាគរូបនេះ វាគឹជារឿងធម្មតាទេដែលប៉ាគីស្ថាន ធ្វើសមយុទ្ធរួមគ្នាជាមួយនឹងរុស្ស៊ី ពីព្រោះបច្ចុប្បន្ននេះ ឥណ្ឌា បានងាករេបែរទៅរកសហរដ្ឋអាមេរិកដែរ។
គួរបញ្ជាក់ថា នៅថ្ងៃព្រហស្បតិ៍ម្សិលមិញ កងទ័ពអាកាសប៉ាគីស្ថាន បានធ្វើសមយុទ្ធមួយដែរក្រោមឈ្មោះថា « Highmark» ដោយបានបិទផ្លូវ Highway ជាច្រើនកំណាត់នៅក្រៅរដ្ឋធានី ដើម្បីរៀបចំទុកឲ្យយន្តហោះចំបាំងរបស់ខ្លួនជាច្រើនគ្រឿងធ្វើការចុះចតជាលើកទីមួយចាប់តាំងពីរយៈពេល៦ឆ្នាំកន្លងមកនេះ។
ហើយនៅមុននេះបន្តិច កងទ័ពប៉ាគីស្ថាន បានបិទដែនអាកាសនៅលើតំបន់Gilgit-Baltistan ភាគខាងជើងប្រទេស ដែលស្ថិតនៅជាប់នឹងតំបន់Cachemire។ សមយុទ្ធនាពេលនោះ បានប្រព្រឹត្តទៅនៅខណៈពេលដែលឥណ្ឌានិងប៉ាគីស្ថាន កំពុងតែមានភាពតានតឹងនឹងគ្នាកាន់តែខ្លាំងឡើងៗ ចាប់តាំងពី ២ខែកន្លងមកហើយ បន្ទាប់ពីមានការវាយប្រហារមួយប្រឆាំងទៅលើមូលដ្ឋានរបស់ឥណ្ឌាមួយនៅតំបន់Cachemire ។ នៅលើការវាយប្រហារនេះ ទីក្រុងDelhi បានចោទថា Islamabad បានលួចជួយដោយសម្ងាត់ដល់ពួកមេក្លោងដែលជាអ្នកបង្កការវាយប្រហារនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ