ចិន-កូរ៉េខាងជើង

នុយក្លេអ៊ែរកូរ៉េខាងជើង៖ចិនបើកការស៊ើបអង្កេតលើធនាគារកូរ៉េខាងជើងមួយ

ចិនបានបើកការស៊ើបអង្កេតលើធនាគារកូរ៉េខាងជើងមួយដែលជាប់សង្ស័យផ្តល់លុយទៅឲ្យរដ្ឋាភិបាលក្រុងព្យុងយ៉ាងក្នុងការអភិវឌ្ឍកម្មវិធីនុយក្លេអ៊ែរ នេះជាព័ត៌មានដែលបានចុះផ្សាយដោយកាសែតប្រចាំថ្ងៃមួយនៅកូរ៉េខាងត្បូងឈ្មោះ JonngAng ចេញផ្សាយនាថ្ងៃចន្ទ ទី២៦ កញ្ញានេះ។ ព័ត៌មានមួយនេះបានធ្លាក់មក បន្ទាប់ពីចិន និងអាមេរិកបានព្រមព្រៀងសហការណ៍គ្នាលើគ្រប់វិស័យដើម្បីដាកគំនាបលើកូរ៉េខាងជើងដែលកំពុងផ្គើនសហគមន៍អន្តរជាតិតាមរយៈការសាកល្បងនុយក្លេអ៊ែរ និងការបាញ់គ្រាប់មីស៊ីលអន្តរទ្វីប។

ចុះផ្សាយនៅថ្ងៃ៖ 26/09/2016 - 12:14កែប្រែថ្ងៃទី៖ 26/09/2016 - 16:56

ជំនួបរវាងលោកនាយករដ្ឋមន្រ្តីចិនលី ខឺជាំង (រូបឆ្វេង) និងលោកប្រធានាធិបតីអាមេរិកអូបាម៉ាកាលពីថ្ងៃទី១៩ កញ្ញានាឱកាសមហាសន្និបាតអង្គការសហប្រជាជាតិក្នុងទីក្រុងញូយ៉ក អាមេរិក REUTERS/Kevin Lamarque

ដោយ៖ គួច គន្ធារ៉ា

ផ្សាយពាណិជ្ជកម្ម

ធនាគារកូរ៉េខាងជើងដែលរដ្ឋអំណាចចិនកំពុងបើកការស៊ើបអង្កេតនោះមានឈ្មោះថា Kwangson Banking Corporation ដែលមានសាខាមួយស្ថិតក្នុងស្រុក Dandong ដែលជាស្រុករបស់ចិនស្ថិតជាប់ព្រំដែនជាមួយកូរ៉េខាងជើង នេះបើយោងតាមព័ត៌មានចុះផ្សាយដោយកាសែតប្រចាំថ្ងៃនៅកូរ៉េខាងត្បូង JoongAng។ ប្រភពច្បាស់ការមួយដែលដឹងលំអិតរឿងកិច្ចការជំនួញរបស់កូរ៉េខាងជើងបានរាយការណ៍ប្រាប់កាសែត JoongAng ថា លោករី អ៊ីលហូ ប្រធានសាខាធនាគារ Kwangson Banking Corporation ប្រចាំស្រុក Dandong បានត្រឡប់ចូលទឹកដីកូរ៉េខាងជើងបណ្តោះអាសន្ន តែរូបអនុប្រធានសាខាកំពុងជាប់អង្កេតរបស់រដ្ឋអំណាចចិន។

ក្រៅពីថ្នាក់ដឹកនាំរបស់ធនាគារ ការស៊ើបអង្កេតរបស់ចិនក៏សំដៅលើបុគ្គលិករបស់ធនាគារជាជនជាតិកូរ៉េខាងជើងដែលកំពុងរស់នៅក្នុងទឹកដីចិនដែរ។ ចិនកំពុងសង្ស័យថា ថ្នាក់ដឹកនាំរបស់ធនាគារកូរ៉េខាងជើងនោះបានផ្តល់លុយឲ្យរដ្ឋាភិបាលក្រុងព្យុងយ៉ាងក្នុងការទិញអាវុធ និងសម្ភារៈមួយចំនួនទាក់ទងនឹងកម្មវិធីនុយក្លេអ៊ែរ។ សូមជម្រាបជូនថា នេះមិនមែនជាលើកដំបូងទេដែលធនាគារកូរ៉េខាងជើងបានជាប់សង្ស័យឃុបឃិតជាមួយក្រុងព្យុយ៉ាងក្នុងកម្មវិធីនុយក្លេអ៊ែរ។ កាលពីឆ្នាំ ២០០៩ ធនាគារមួយនេះក៏ស្ថិតក្នុងផ្ទាំងស៊ីបនៃការសង្ស័យរបស់ក្រសួងសេដ្ឋកិច្ចអាមេរិកពីបទរត់ពន្ធគ្រឿងសព្វាវុធ ពិសេសការទិញបច្ចេកវិទ្យាក្នុងគោលដៅស៊ីវិល និងយោធា។

គួររម្លឹកជូនថា នៅក្នុងជំនួបរវាងលោកនាយករដ្ឋមន្រ្តីចិនលី ខឺជាំង និងលោកប្រធានាធិបតីអាមេរិកអូបាម៉ាកាលពីថ្ងៃទី១៩ កញ្ញានាឱកាសមហាសន្និបាតអង្គការសហប្រជាជាតិក្នុងទីក្រុងញូយ៉ក អាមេរិក និងចិនបានព្រមព្រៀងសហការណ៍គ្នាលើគ្រប់វិស័យដើម្បីដាកគំនាបលើកូរ៉េខាងជើងដែលទើបបានសាកល្បងនុយក្លេអ៊ែរលើកទី៥ ប្រកបដោយជោគជ័យក្នុងថ្ងៃទី៩ កញ្ញា។ ផ្ទាំងស៊ីបអាទិភាពរបស់ចិន និងអាមេរិក គឺសំដៅលើក្រុមហ៊ុនឯកជន ឬរដ្ឋបរទេសណាដែលបានឲ្យលុយទៅរបបក្រុងព្យុងយ៉ាងក្នុងការអភិវឌ្ឍកម្មវិធីនុយក្លេអ៊ែរ និងគ្រាប់មីស៊ីលអន្តរទ្វីប៕