ប៉ាគីស្ថានបរិហារលើការវាយប្រហាររបស់ទ័ពឥណ្ឌាលើតំបន់ Cachemire
នៅថ្ងៃព្រហស្បតិ៍ ទី២៩ កញ្ញា ប្រទេសប៉ាគីស្ថាន តាមរយៈលោកនាយករដ្ឋមន្រ្តីណាវ៉ា ស្ហារីស្វបានថ្កោលទោសលើការវាយប្រហាររបស់កងទ័ពឥណ្ឌាលើដែនដី Cachemire របស់ខ្លួន។ ប្រតិកម្មរបស់លោកស្ហារីស្វបានកើតមានឡើង បន្ទាប់ពីឥណ្ឌាបានបើកការវាយប្រហារនៅតាមបណ្តោយព្រំដែនដែលចែកតំបន់ Cachemire ជាពីរនៅរំលងអធ្រាត្រយប់ថ្ងៃពុធឆ្លងចូលព្រលឹមថ្ងៃព្រហស្បតិ៍ ទី២៩ កញ្ញា។ នៅក្នុងប្រតិបត្តិការសឹកនោះ មានស្លាប់ទាហានប៉ាគីស្ថានចំនួនពីរនាក់ និងរបួស ៩នាក់ផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
តើឥណ្ឌា និងប៉ាគីស្ថានដែលជាមហាអំណាចនុយក្លេអ៊ែរដូចគ្នាកំពុងត្រៀមធ្វើសង្រ្គាមនឹងគ្នាជាថ្មីឬ?។ នេះជាសំណួរដែលនៅមិនទាន់មានចម្លើយទេ អ្វីដែលគេដឹង ស្ថានការណ៍រវាងអតីតបងប្អូនបង្កើតទាំងពីរហាក់ដូចជាកំពុងឡើងតានតឹងនារយៈពេលចុងក្រោយនេះ ពិសេសតាំងពីមានការវាយប្រហារលើមូលដ្ឋានយោធាឥណ្ឌាក្នុងតំបន់ Cachemire ឥណ្ឌាកាលពី ១០ថ្ងៃមុនដែលបានផ្តាច់ជីវិតទាហានឥណ្ឌាចំនួន ១៨នាក់។ នៅក្នុងសន្និសីទកាសែតនាថ្ងៃព្រហស្បតិ៍ ទី២៩ កញ្ញា លោកឧត្តមសេនីយ៍ឯកឥណ្ឌា Ranbir Singh បានថ្លែងថា ប្រតិបត្តិការយោធាចូលតំបន់ Cachemire ប៉ាគីស្ថាន ជាប្រតិបត្តិការវះស្នាមរបួសលើក្រុមភេរវជនដែលមានបំណងចូលទៅបង្កភេរវកម្មក្នុងតំបន់ Cachemire ឥណ្ឌា។
ចំណែកអ្នកទទួលខុសត្រូវម្នាក់ក្នុងរដ្ឋាភិបាលឥណ្ឌាដែលមិនព្រមបញ្ចេញឈ្មោះបាននិយាយប្រាប់ AFP ថា ប្រតិបត្តិការយោធាឥណ្ឌាបានចាប់ផ្តើមនៅរំលងអធ្រាត្រយប់ថ្ងៃទី២៨ និងបញ្ចប់នៅម៉ោង ៨ព្រឹកថ្ងៃទី២៩ កញ្ញា និងថា ការវាយប្រហារនោះបានឆ្លងចូលតំបន់ Cachemire ប្រមាណពី ២ ទៅ ៣គីឡូម៉ែត្រពីខ្សែព្រំដែនចែកតំបន់ Cachemire ជាពីរ។ នៅក្នុងប្រតិបត្តិការយោធាឥណ្ឌានោះ មានស្លាប់ទាហានប៉ាគីស្ថានចំនួន ២នាក់ និងរបួស ៩នាក់ផ្សេងទៀត។ ប្រតិកម្មភ្លាមៗពីប៉ាគីស្ថាន ទីក្រុងអ៊ីស្លាម៉ាបាតបានបរិហារលើការវាយប្រហារឆ្លងដែនរបស់ឥណ្ឌា ហើយលោកនាយករដ្ឋមន្រ្តីប៉ាគីស្ថានណាវ៉ា ស្ហារីស្វបានថ្កោលទោសលើការវាយប្រហារនោះ។
សូមជម្រាបជូនថា នៅក្រោយការវាយប្រហារលើមូលដ្ឋានទ័ពឥណ្ឌាដែលបានបណ្តាលឲ្យស្លាប់ទាហានឥណ្ឌាចំនួន ១៨នាក់កាលពី ១០ថ្ងៃមុន លោកនាយករដ្ឋមន្រ្តីឥណ្ឌាណារ៉េនដ្រា ម៉ូឌីបានសន្យាសងសឹកចាស់ដៃលើក្រុមជនដៃដល់។ ទន្ទឹមគ្នានេះ លោកម៉ូឌីក៏បានចោទប៉ាគីស្ថានចំមុខថាជាប្រទេសគាំទ្រ និងនាំចូលពួកភេរវជន។ ក្រៅពីចំណាត់ការលើប៉ាគីស្ថានតាមសមរភូមិ ឥណ្ឌាក៏បានចាត់វិធានការតាមផ្លូវទូតដោយបានលប់ចោលការចូលរួមជំនួបកំពូលតំបន់ដែលគ្រោងរៀបចំក្នុងទឹកដីប៉ាគីស្ថាននាខែតុលាខាងមុខ។
គួររម្លឹកជូនថា ឥណ្ឌា និងប៉ាគីស្ថានកំពុងបន្តដណ្តើមគ្នាកាន់កាប់តំបន់ Cachemire តាំងពីតំបន់មួយនេះបានពុះចែកគ្នាក្នុងឆ្នាំ ១៩៤៧។ ជម្លោះដែលមកដល់ពេលនេះបានបណ្តាលឲ្យមានមនុស្សស្លាប់ជាច្រើនពាន់នាក់ ក្នុងនោះមានភាគច្រើនជាជនស៊ីវិលស្លូតត្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ