ប្រធានាធិបតីហ្វីលីពីនប្រកាសចេញទៅធ្វើទស្សនកិច្ចនៅចិនក្នុងពេលឆាប់ៗ
ប្រធានាធិបតីហ្វីលីពីន លោក ឌុយទែរតេ បានប្រកាសឱ្យដឹងនៅថ្ងៃអង្គារនេះ ថានឹងអញ្ជើញទៅបំពេញទស្សនកិច្ចនៅប្រទេសចិន ក្នុងពេលឆាប់ៗខាងមុខនេះ។ ទន្ទឹមនឹងការបន្តរិះគន់សហរដ្ឋអាមេរិកអតីតសម្ព័ន្ធមិត្ត លោកបានបង្ហាញក្តីសង្ឃឹមថានឹងអាចធ្វើដំណើរទៅប្រទេសរុស្ស៊ី ឆាប់ៗនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
“ចិនបានអញ្ជើញញយដងហើយ ! ហើយខ្ញុំក៏ព្រមទៅតាមការអញ្ជើញ !” នេះជាប្រសាសន៍របស់លោក ឌុយទែរតេ នៅក្នុងសុន្ទរកថាពីវិមានប្រធានាធិបតី។ ប៉ុន្តែលោកមិនបានបញ្ជាក់អំពីកាលបរិច្ឆេទនៃដំណើរទស្សនកិច្ចនេះទេ ដោយគ្រាន់តែបញ្ជាក់នឹងប្រព្រឹត្តទៅមុនការអញ្ជើញទៅប្រទេសជប៉ុន ដែលគ្រោងធ្វើពីថ្ងៃទី ២៥ ដល់២៧ តុលា បើយោងតាមប្រភពក្រុងតូក្យូ។ បន្ទាប់ពីតូក្យូ លោកទំនងជានឹងបង្ហួសទៅរុស្ស៊ី ! នេះការបន្ថែមរបស់លោកឌុយទែរតេ។
ជាច្រើនលើកច្រើនសាមកហើយ ដែលលោកឌុយទែរតេ បានទន្ទេញដដែលថាខិតទៅស្និទ្ធស្នាលជាមួយក្រុងប៉េកាំង និងម៉ូស្គូ ហើយដកខ្លួនកាន់តែឆ្ងាយឡើងៗពីសហរដ្ឋអាមេរិកដែលធ្លាប់ជាសម្ព័នមិត្តយោធាផង និងជាអតីតប្រទេសធ្វើអាណានិគមនិយមលើហ្វីលីពីនផង។
ដូចជារាល់លើក ក្រៅអំពីប្រកាសងាកទៅក្រសោបចិននិងរុស្ស៊ី លោក ឌុយទែរតេ បានធ្វើការរិះគន់ជាថ្មី នៅថ្ងៃអង្គារនេះ ចោទអាមេរិកថាក្អេងក្អាង អសមត្ថភាពទប់ស្កាត់រុស្ស៊ីមិនឱ្យយកតំបន់គ្រីមេ ពីអ៊ុយក្រែន។
ហ្វីលីពីនរបស់លោកឌុយទែរតេ ក្រឡាស់ចិត្តរិះគន់អាមេរិក ខុសពីរដ្ឋាភិបាលហ្វីលីពីនមុនៗ ក៏ព្រោះតែវ៉ាស៊ីនតោនបានបញ្ចេញប្រតិកម្មរិះគន់ខ្លាំងនយោបាយប្រយុទ្ធប្រឆាំងនឹងការជួញដូរគ្រឿងញៀន ដែលបានសម្លាប់មនុស្សអស់ប្រមាណជាង៣៣០០នាក់ គិតចាប់ពីមានរដ្ឋាភិបាលហ្វីលីពីនថ្មីមក។
លោកប្រធានាធិបតីហ្វីលីពីនមាត់ឆៅនេះ បានលុបចោលសមយុទ្ធរួមជាមួយអាមេរិក ដោយយល់ថាជាសន្ធិសញ្ញាការពារគ្នាទៅវិញទៅមក គ្រាន់តែជាលេសរបស់អាមេរិកសម្រាប់ពង្រាយវត្តមានទ័ពនៅហ្វីលីពីន និងគំរាមកាត់ផ្តាច់រាល់ទំនាក់ទំនងទ្វេភាគី។ លោកឌុយទែរតេ ធ្លាប់ជេរសម្តេចប៉ាប និងលោកអូបាម៉ា តែបានសរសើរប្រធានាធិបតីចិនលោក ស៊ីជីនពីង ថាជាមហាប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ