ហ្វីលីពីនចម្រូងចម្រាសនឹងជំហរស្រវាអោបចិនរបស់លោកឌុយទែរតេ
“ខ្ញុំសូមប្រកាសផ្តាច់សម្ព័ន្ធភាពជាមួយអាមេរិក » ! នេះជាប្រសាសន៍របស់លោកឌុយទែរតេ យ៉ាងក្តែងៗ ព្រលាត់បង្ហាញចេតនាដែលមានពិតៗក្នុងចិត្ត ថាហ្វីលីពីនសម្រេចងាកពីសហរដ្ឋអាមេរិក ទៅក្រសោបអោបយកចិន។ ពាក្យមួយឃ្លានេះ បានទទួលការស្វាគមន៍ ទះដៃអបអរ ជាកិច្ចបិទបញ្ចប់ដំណើរទស្សនកិច្ចរយៈពេលបួនថ្ងៃ នៅទីក្រុងប៉េកាំង ប្រកបដោយមោទនៈ។ ប៉ុន្តែ នៅក្នុងប្រទេសវិញ ប្រតិកម្មប្រឆាំងមានមិនខ្វះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
សម្រាប់បក្សនយោបាយឆ្វេងនិយម ដែលជាបក្សកាន់អំណាចនៅហ្វីលីពីនបច្ចុប្បន្ន ការលែងលះជាមួយនឹងសហរដ្ឋអាមេរិក គឺសេចក្តីសម្រេចចិត្តដ៏សមហេតុផល ! តំណាងជាអគ្គលេខាបក្សបានពន្យល់ថា “ប្រធានាធិបតីហ្វីលីពីនយើងមុនៗ គឺជាអាយ៉ងរបស់អាមេរិក ឬខ្លះទៀត ជាអ្នកស្មោះស្ម័គ្រខ្លាំងនឹងអាមេរិក។ យើងផ្តល់ទឹកដីទទួលឱ្យទាហានអាមេរិកឈរជើង ប៉ុន្តែគ្មានទាញបានប្រយោជន៍អ្វីបន្តិចសោះ !”។
ផ្ទុយទៅវិញ អតីតទីប្រឹក្សាសន្តិសុខជាតិរបស់រដ្ឋាភិបាលហ្វីលីពីនមុន លោក Roilo Golez យល់ថា ការព្រាត់ប្រាសចេញពីសហរដ្ឋអាមេរិក ជាជម្រើសដ៏ប្រថុយប្រថានបំផុត។ សម្រាប់លោក តើគេអាចប្តូរសម្ព័ន្ធមិត្តដែលមានភក្តីភាពនឹងគ្នាអស់ពេល៧០ឆ្នាំ ដើម្បីទៅស្រវ៉ាចាប់មិត្តថ្មីដែលឈ្លានពានតំបន់សេដ្ឋកិច្ចជាតិយើង និងដែលយើងមិនដឹងអំពីបំណងពិតរបស់គេទៅកើត ?! ។ សេដ្ឋកិច្ចជាតិទាំងមូលនឹងត្រូវរងគ្រោះថ្នាក់អំពីផ្តាច់សម្ព័ន្ធមេត្រីភាពជាមួយអាមេរិកនេះ។ អាមេរិកជាដៃគូពាណិជ្ជកម្មដ៏ចំបងរបស់ហ្វីលីពីន គ្មាននរណាអាចគិតដល់សោះថាហ្វីលីពីនអាចកាត់ផ្តាច់ ឬងាកបែកពីដៃគូមួយនេះ ! ពិតជាការបាត់បង់ដ៏ធំ !
នៅក្នុងការស្ទង់មតិ ដែលផ្សព្វផ្សាយជាសាធារណៈ មុនពេលលោកប្រធានាធិបតីហ្វីលីពីន ធ្វើដំណើរទៅដល់ក្រុងប៉េកាំង បានឱ្យដឹងថា មានប្រជាពលរដ្ឋហ្វីលីពីនភាគច្រើនមិនទុកចិត្តលើចិនទេ តែទុកចិត្តខ្លាំងលើសហរដ្ឋអាមេរិក។ នេះជាសញ្ញាបញ្ជាក់ថាឥទ្ធិពលវប្បធម៌មានទម្ងន់ធ្ងន់ណាស់នៅហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ