នុយក្លេអ៊ែរកូរ៉េខាងជើង៖វ៉ាស៊ីនតោន និងព្យុងយ៉ាងបានជួបគ្នាស្ងាត់ៗក្នុងប្រទេសម៉ាឡេស៊ី
នៅចុងសប្តាហ៍កន្លងទៅនេះ អតីតមន្រ្តីការទូតអាមេរិក និងមន្រ្តីជាន់ខ្ពស់កូរ៉េខាងជើងបានជួបសន្ទនាគ្នាស្ងាត់ៗនៅក្នុងទីក្រុងគូឡាឡាំពួ ប្រទេសម៉ាឡេស៊ី។ ជំនួបនេះបានធ្វើឡើង ចំពេលដែលសហគមន៍អន្តរជាតិកំពុងព្យាយាមស្វែងរកទ័ណ្ឌកម្មថ្មីដាក់លើកូរ៉េខាងជើងទាក់ទងនឹងទង្វើសាកល្បងនុយក្លេអ៊ែរ និងបាញ់សាកល្បងគ្រាប់មីស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ជាផ្លូវការ អាមេរិក និងកូរ៉េខាងជើងគ្មានទំនាក់ទំនងផ្លូវទូតរវាងគ្នាទេ តែជំនួបស្ងាត់ៗពេលនេះត្រូវបានធ្វើឡើងនៅក្នុងក្របខ័ណ្ឌនៃទំនាក់ទំនងក្រៅផ្លូវការដែលគេឲ្យឈ្មោះថា « Track ២ »។ ជាទូទៅ ជំនួបក្រៅផ្លូវការរវាងមន្រ្តីអាមេរិក និងកូរ៉េខាងជើងមួយនេះបានធ្វើនៅក្រៅទឹកដីអាមេរិក និងកូរ៉េខាងជើង ពិសេសនៅក្នុងទឹកដីអាស៊ី ដូចយ៉ាងសិង្ហបុរី ឬចិន។ នៅក្នុងជំនួបក្នុងទឹកដីម៉ាឡេស៊ីរយៈពេល ២ថ្ងៃកន្លងទៅ ភាគីអាមេរិកដឹកនាំដោយលោក Robert Galluci ចំណែកខាងភាគីកូរ៉េខាងជើងដឹកនាំដោយលោក Han Song-Ryol អនុរដ្ឋមន្រ្តីការបរទេស និងជាអតីតឯកអគ្គរដ្ឋទូតរងប្រចាំអង្គការសហប្រជាជាតិ។
សូមជម្រាបជូនថា ក្រៅពីជំនួបក្រៅផ្លូវការដែលគេឲ្យឈ្មោះថា « Track ២ » នេះ អាមេរិក និងកូរ៉េខាងជើងក៏មានកាណាល់ទូតក្រៅផ្លូវការមួយទៀតដែលគេហៅថា « កាណាល់ញូយ៉ក »។ « កាណាល់ញូយ៉ក » នេះអនុញ្ញាតឲ្យមានការដោះដូរព័ត៌មានគ្នារវាងមន្រ្តីអាមេរិក និងមន្រ្តីកូរ៉េខាងជើងនៅអង្គការសហប្រជាជាតិ។ ខណៈនេះ ភាគីអាមេរិក និងកូរ៉េខាងជើងមិនបានប្រាប់ឲ្យដឹងពីប្រធានបទ និងខ្លឹមសារនៃជំនួបស្ងាត់ៗនោះទេ តែបើយោងតាមលោក Leon Sigal អ្នកឯកទេសកូរ៉េដែលបានចូលរួមនៅក្នុងកិច្ចសន្ទនាដែរនោះឲ្យដឹងថា ភាគីទាំងពីរបាននិយាយច្រើនលើកម្មវិធីនុយក្លេអ៊ែរកូរ៉េខាងជើង។
តាមលោក Leon Sigal ដដែល ភាគីកូរ៉េខាងជើងបានបញ្ជាក់ប្រាប់ភាគីអាមេរិកជាថ្មីថា មុននឹងនិយាយដល់កម្មវិធីនុយក្លេអ៊ែររបស់កូរ៉េខាងជើង ទីក្រុងវ៉ាស៊ីនតោន និងព្យុងយ៉ាងត្រូវចុះហត្ថលេខាលើសន្ធិសញ្ញាសន្តិភាពរវាងគ្នាជាមុនសិន។ តែភាគីអាមេរិកបានឆ្លើយតបវិញដោយរម្លឹកសារជាថ្មីថា វ៉ាស៊ីនតោនអាចចុះហត្ថលេខាលើសន្ធិសញ្ញាសន្តិភាពជាមួយព្យុងយ៉ាងបាន លុះត្រាណាតែកូរ៉េខាងជើងបិទបញ្ចប់កម្មវិធីនុយក្លេអ៊ែររបស់ខ្លួនជាមុនសិន។ ការឆ្លើយឆ្លងគ្នារបៀបនេះជាសក្ខីកម្មថ្មីមួយទៀតដែលបញ្ជាក់ពីភាពមិនចុះសម្រុងគ្នា និងការមិនទុកចិត្តគ្នារវាងវ៉ាស៊ីនតោន និងព្យុងយ៉ាង។
អ្វីជាការកត់សម្គាល់ ជំនួបស្ងាត់ៗរវាងអាមេរិក និងកូរ៉េខាងជើងពេលនេះបានធ្វើឡើង បន្ទាប់ពីកូរ៉េខាងជើងបានបាញ់សាកល្បងគ្រាប់មីស៊ីលជាថ្មី និងចំពេលដែលក្រុមប្រឹក្សាសន្តិសុខកំពុងស្វែងរកទ័ណ្ឌកម្មថ្មីដាក់លើកូរ៉េខាងជើង ក្រោយពីបានសាកល្បងនុយក្លេអ៊ែរលើកទី៥ កាលពីថ្ងៃទី៩ កញ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ