Samsung ខាតទាំងប្រាក់ បង់ទាំងកត្តិយស ហើយប្រឈមនឹងការប្តឹងទារសំណងជំងឺចិត្តទៀត
ចុះផ្សាយនៅថ្ងៃ៖
ស្តាប់ - ០៤:១៩
ក្រោយពីជួបភាពវឹកវរប្រកាសឈប់ផលិតទូរស័ព្ទប្រភេទ Galaxy Note7 នៅថ្ងៃនេះក្រុមហ៊ុនអាចត្រូវប្រឈមនឹងការប្តឹងផ្តល់នៅតុលាការទៀត។ ការិយាល័យមេធាវីកូរ៉េខាងត្បូងមួយបានប្រកាសនៅថ្ងៃនេះ ថានឹងដាក់បណ្តឹងរួម ក្នុងនាមអ្នកប្រើប្រាស់ទូរស័ព្ទចំនួន៥២៧នាក់ ដែលបានទិញGalaxy Note 7 ប្រឆាំងនឹងក្រុមហ៊ុនSamsung ដើម្បីទាមទារសំណងនិងជំងឺចិត្ត ជាទឹកប្រាក់ចំនួន ៥០ម៉ឺន វ៉ុន ឬ៤០៣អឺរ៉ូ។
ការិយាល័យមេធាវី Harvest Law តំណាងឱ្យអតិថិជនចំនួន៥២៧នាក់ បានដាក់ពាក្យបណ្តឹងរួមរួចហើយកាលពីថ្ងៃចន្ទ។ លោកមេធាវី Peter Koh បានពន្យល់ថា ពាក្យបណ្តឹងនេះកើតចេញពីកំហឹងដ៏ខ្លាំងឡើងៗរបស់អ្នកប្រើប្រាស់។ រហូតមកទល់នឹងថ្ងៃអង្គារទី ២៥តុលានេះ គេរាប់ឃើញមានអតិថិជនកូរ៉េខាងត្បូង ទាំងរយៗនាក់ជារៀងរាល់ថ្ងៃ ទាក់ទងមកការិយាល័យមេធាវីយើង ក្នុងនោះមានជាងបីរយនាក់ បានចុះហត្ថលេខាកាលពីថ្ងៃចន្ទ។ បើតាមមេធាវីតំណាងការិយាល័យ Harvest Law ចំនួនអ្នកដាក់ពាក្យបណ្តឹងអាចនឹងកើនឡើងដល់៣ពាន់នាក់បន្ថែមទៀត។
មូលហេតុដែលជំរុញឱ្យពួកគេឈានដល់ថ្នាក់ប្តឹងទារសំណងមកពីអតិថិជនទាំងអស់នោះរងផលប៉ះពាល់ខ្លាំង អំពីប្រតិបត្តិការប្រមូលយកទូរស័ព្ទGalaxy Note7 វិញ។ ពួកគេត្រូវបង្ខំចិត្តធ្វើបំលាស់ទីជាញយដងទៅកាន់ហាងលក់ទូរស័ព្ទ ដើម្បីដោះដូរ និងត្រូវស្វែងរកជួលឬទិញទូរស័ព្ទថ្មី ក្រោយពេលមានបម្រាមហាមឃាត់មិនយកទូរស័ព្ទSamsung ឡើងយន្តហោះ សម្រាប់ជើងហោះហើរអន្តរជាតិ។
ផលរំខានទាំងនេះ បានរុញច្រានឱ្យពួកគេដាក់បណ្តឹង ទាមទារសំណងជំងឺចិត្ត និងការប្រាក់ សម្រាប់ម្នាក់ៗ ចំនួន៥០ម៉ឺនwons (ស្មើនឹងប្រមាណ៤០៣អឺរ៉ូ)។ ជាតម្លៃសំណងដ៏តិចតួចណាស់ សម្រាប់ក្រុមហ៊ុនទំហំយក្សដូចយ៉ាងSamsung ទោះបីត្រូវគុណនឹង៥២៧នាក់ ឬ ៣ពាន់នាក់ក៏ដោយ។ គេក៏ឃើញមានការប្តឹងផ្តល់ស្រដៀងគ្នានេះដែរ កំពុងរៀបចំឡើងដែរ នៅសហរដ្ឋអាមេរិក។
ប៉ុន្តែបញ្ហាមិនមែនស្ថិតនៅត្រឹមលុយសំណងតែម្យ៉ាងទេ ! ការដែលសំខាន់នោះ គឺការខូចឈ្មោះ និងកិត្តិយស។ រូបភាពក្រុមហ៊ុនដ៏ធំ ថ្នាក់ពិភពលោក ដ៏ល្បីល្បាញនឹងត្រូវប្រលាក់ប្រលូស ទោះបីជាបណ្តឹងនោះត្រូវចាញ់ ឬត្រូវឈ្នះក៏ដោយ។ សូម្បីតែក្រុមប្រឹក្សារដ្ឋបាលរបស់ក្រុមហ៊ុនក៏មិនអាចចៀសផុតអំពីព្យុះព្យោមានេះដែរ ជាក់ស្តែងក្រោយពីបានឃើញមានបណ្តឹងថ្មីនេះ ការិយាល័យក្រុមប្រឹក្សារដ្ឋបាលបានផ្តល់អនុសាសន៍ឱ្យម្ចាស់ភាគហ៊ុនទាំងអស់ បោះឆ្នោតប្រឆាំងនឹងការតាំងតែង លោក J.Y. Lee ជាអគ្គនាយករងក្រុមហ៊ុនSamsung អេឡិចត្រូនិក។ លោកលី ដែលទំនងជាអ្នកស្នងមរតករបស់ត្រកូលក្រុមហ៊ុនផង។
សូមបញ្ជាក់ថា កាលពីដើមខែកញ្ញា ក្រុមហ៊ុនលំដាប់លេខមួយពិភពលោក ខាងផ្នែកទូរស័ព្ទ បានបង្ខំចិត្តប្រកាសប្រមូលយកទូរស័ព្ទGalaxy Note7 ចំនួន២លានគ្រឿងកន្លះ នៅទូទាំងពិភពលោក ដោយហេតុតែមានបញ្ហាថ្ម។ វិបត្តិនោះអាចនឹងត្រូវបិទបញ្ចប់ ប្រសិនបើក្រោយពីបានប្តូរគ្រឿងបំលាស់ថ្មីនិងចែកចាយលក់Galaxy Note7 ថ្មីបន្តទៀតទៅ ទូរស័ព្ទមានដំណើរការស្រួល។ ជាអកុសល មូដែលកែប្រែថ្មីនៅតែជួបបញ្ហាផ្ទុះនិងឆេះទៀត ទើបក្រុមហ៊ុនសម្រេចឈប់ផលិតតែម្តង។
តាំងពីមានហេតុការណ៍ផ្ទុះ និងឆេះ ទាំងថ្មីស្រឡាងមក ដើម្បីការពាររូបភាពរបស់ខ្លួន ក្រុមហ៊ុនSamsung បានប្រើគ្រប់មធ្យោបាយ បញ្ចុះបញ្ចូលអតិថិជនរបស់ខ្លួនឱ្យឈប់ប្រើទូរស័ព្ទប្រភេទនេះទាំងអស់ តាមរយៈការសងលុយទាំងស្រុង ឬប្តូរយកមូដែលថ្មី។ ក្រុមហ៊ុនត្រូវបង្ខំចិត្តដាក់បញ្ជររបស់ខ្លួននៅតាមអាកាសយានដ្ឋាន ដើម្បីឆ្លើយតបទៅនឹងការទាមទាររបស់ក្រុមហ៊ុនអាកាសចរណ៍ខ្លះដែលមិនអនុញ្ញាតឱ្យអ្នកដំណើរយកទូរស័ព្ទ Galaxy Note7 ចូលយន្តហោះឡើយ ដោយក្រែងមានករណីឆេះផ្ទុះជាយថាហេតុកើតឡើង។
ប៉ុន្តែគំនិតផ្តួចផ្តើមទាំងអម្បាលម៉ាននេះ មិនគ្រប់គ្រាន់ទេ ! មុននឹងឈានដល់ដំណាក់កាលផ្តាច់ប្រព័ន្ធទូរស័ព្ទGalaxy Note 7 ពីចម្ងាយតែម្តង ដើម្បីកុំឱ្យមានករណីផ្ទុះឬឆេះ កើតឡើងបន្ថែមទៀត នាំខូចឈ្មោះកាន់តែ ពេលនេះក្រុមហ៊ុនSamsung បានងាកទៅធ្វើយុទ្ធនាការពាណិជ្ជកម្មទ្រង់ទ្រាយធំ មិនធ្លាប់មានឡើយ។ ក្រុមហ៊ុនដឹងច្បាស់ណាស់ពេលនេះ ទីផ្សារប្រកួតប្រជែងចង្អៀតណាស់ ក្នុងពេលដែលSamsung កំពុងលុងវិបត្តិដូច្នេះ ក្រុមហ៊ុនទូរស័ព្ទផ្សេងទៀត ដូចជាIphone LG អាចឆ្លៀតឆក់ឱកាសបានយ៉ាងងាយ។ សម្រាប់អតិថិជនកូរ៉េខាងត្បូង ដែលនៅបន្តប្រើទូរស័ព្ទGalaxy Note7 បើសុខចិត្តប្តូរមូដែល នឹងត្រូវបានទទួលការចុះតម្លៃពាក់កណ្តាល នៅពេលទិញទូរស័ព្ទថ្មីទំនើបចុងក្រោយ Note8 ឬS8 ដែលនឹងត្រូវចេញលក់លើទីផ្សារនៅឆ្នាំក្រោយ។
កាលពី១០ថ្ងៃមុន ក្រុមហ៊ុនបានប្រកាសបង្ហាញចេតនា ចង់ផ្តល់សំណងជំងឺចិត្តប៉ះប៉ូវជាថវិកាដល់អតិថិជនកូរ៉េខាងត្បូង និងអាមេរិក (ឱ្យបង្កាន់ដៃ១០០ដុល្លារ) ដែលសុខចិត្តប្តូរយកទូរស័ព្ទម៉ាកSamsungដដែល ប៉ុន្តែនៅគ្រប់គ្រាន់ល្មមស្ងប់ចិត្តទេ។ សុខចិត្តប្តូរ បង់ខាតថវិកាហើយ ត្រូវប្រឈមនឹងការប្តឹងទារសំណងជំងឺចិត្តទៀត។ ក្នុងសំណុំរឿងGalaxy Note7 មួយ Samsung ក្រុមហ៊ុនទូរស័ព្ទដ៏ធំជាងគេនៅលើពិភពលោកនិងតំណាងឱ្យ១២%នៃផលិតផលសរុបក្នុងស្រុក បានខាតបង់យ៉ាងហោច៥ពាន់លានអឺរ៉ូ និងអាចដល់រាប់សិបពាន់លាន បើគិតបញ្ចូលទាំងតម្លៃផលិតទូរស័ព្ទ តម្លៃវិនិយោគរយៈពេល ១៨ខែចុងក្រោយ ព្រមទាំងចំណាយរបស់ក្រុមហ៊ុនខាងផ្នែកmaketingនិងពាណិជ្ជកម្ម។ តែគ្មានអ្វីត្រូវព្រួយបារម្ភខ្លាចក្រុមហ៊ុននៃដួលរលំឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ