កិច្ចព្រមព្រៀងជាប្រវត្តិសាស្រ្តស្តីពីការបង្កើតតំបន់ជម្រកពិសេសសំរាប់សត្វ និងរុក្ខជាតិនៅមហាសមុទ្រអង់តាក់ទិក
ប្រទេសចំនួន២៤និងសហភាពអឺរ៉ុប បន្ទាប់ពីបានចចារគ្នាអស់រយៈពេលជាច្រើនឆ្នាំកន្លងមក ទើបសម្រេចបានកិច្ចព្រមព្រៀងជាប្រវត្តិសាស្ត្រមួយនៅថ្ងៃសុក្រ២៨តុលានេះនៅប្រទេសអូស្រ្តាលី។ ជាកិច្ចព្រមព្រៀង ដើម្បីបង្កើតតំបន់ពិសេសមួយសម្រាប់ទុកជាជម្រករបស់សត្វនិងរុក្ខជាតិសមុទ្រចំរុះនៅក្នុងមហាសមុទ្រអង់តាក់ទិក ដែលមានផ្ទៃក្រឡាប្រវែង ១ លាន៥សែន៥ម៉ឺនគីឡូម៉ែត្រការ៉េ។ ប្រព័ន្ធបរិស្ថានក្នុងតំបន់ពិសេសនេះនឹងត្រូវគេគាំពារថែរក្សាចាប់ពីអំណេះតទៅដោយមានការហាមនេសាទក្នុងរយៈពេលដ៏វែង។
ចុះផ្សាយនៅថ្ងៃ៖
ស្តាប់ - ០១:៥០
រួមប្រជុំគ្នានៅ Hobart ក្នុងប្រទេសអូស្ត្រាលី សមាជិករបស់គណៈកម្មការដើម្បីការអភិរក្សធនធានសមុទ្រមហាសមុទ្រ អង់តាក់ទិក បានសម្រេចចិត្តហាមនេសាទក្នុងរយៈពេល៣៥ឆ្នាំនៅក្នុងតំបន់ការពារបរិស្ថានសំរាប់សត្វសមុទ្រនៅ Ross ដែលជាឆកសមុទ្រដ៏ធំធេងមួយនៅខាងមហាសមុទ្រប៉ាស៊ីហ្វីកនិងដែលស្ថិតនៅក្រោមយុត្តាធិការ នូវែលហ្សេឡង់។ គំរោងអភិរក្សធនធានសមុទ្រនេះ ត្រូវបានស្នើឡើងដោយសហរដ្ឋអាមេរិកនិងនូវែលហ្សេឡង់។ រុស្ស៊ីបន្ទាប់ពីបានបដិសេធ៥ដងរួចមក នៅទីបំផុតបានសុខចិត្តយល់ព្រមចុះហត្ថលេខាលើគម្រោងបង្កើតតំបន់ការពារសត្វសមុទ្រនេះដែរ។
យោងតាមរដ្ឋមន្ត្រីក្រសួងការបរទេសនូវែលហ្សេឡង់ លោក Murray McCully តំបន់ជម្រកសត្វសមុទ្រនេះ មានផ្ទៃក្រឡាជាង១លាន៥សែន៥ម៉ឺនគីឡូម៉ែត្រការ៉េ ដែលក្នុងនោះ ផ្ទៃសមុទ្រទំហំ ១លាន១២សែនគីឡូម៉ែត្រការ៉េ ត្រូវបានគេហាមនេសាទក្នុងរយៈពេល៣៥ឆ្នាំ។ ម្យ៉ាងទៀត ក្រុមអ្នកវិទ្យាសាស្ត្រនិងអ្នកការពារបរិស្ថាន បានវាយតម្លៃថា ការបង្កើតដែនពិសិដ្ឋដើម្បីការអភិវឌ្ឈសត្វសមុទ្រ គឺជាសេចក្តីសម្រេចចិត្តជាប្រវត្តិសាស្ត្រមួយ។ ក្រៅពីកិច្ចការអភិរក្សលើតំបន់ ក្រុមអ្នកវិទ្យាសាស្ត្រ កាន់តែមានលទ្ធភាពច្រើនថែមទៀតក្នុងការសិក្សាស្រាវជ្រាវរបស់ខ្លួននៅលើផលប៉ះពាល់នៃការផ្លាស់ប្តូរអាកាសធាតុ-នេះជាការគូសបញ្ជាក់បន្ថែមរបស់ក្រុមអ្នកវិទ្យាសាស្ត្រ។
គួររំលឹកថា មហាសមុទ្រអង់តាក់ទិក គឹជាតំបន់ទីជម្រកបរិស្ថានដ៏ពិសេសបំផុតមួយពីព្រោះវាជាទីសម្បូរទៅដោយសត្វនិងរុក្ខជាតិសមុទ្រចំរុះចំនួនជាង១ម៉ឺនជំពូកនិងដែលកំពុងតែត្រូវបានទទួលការគំរាមកំហែងកាន់តែខ្លាំងឡើងៗដោយសារការអភិវឌ្ឈន៍ជលផលនិងការដឹកជញ្ជូនតាមផ្លូវសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ