ព្យុងយ៉ាងអំពាវនាវឱ្យលោក ដូណាល់ ត្រាំ ប្តូរទស្សនវិស័យនុយក្លេអ៊ែរចំពោះកូរ៉េខាងជើង
លទ្ធផលនៃការបោះឆ្នោតប្រធានាធិបតីអាមេរិក បានបង្កការភ្ញាក់ផ្អើលកក្រើកពិភពលោក។ ប្រតិកម្មនិងសារអបអរ លោក ដូណាល់ត្រាំ បានជាប់ជាប្រធានាធិបតីទី ៤៥របស់សហរដ្ឋអាមេរិក បានធ្លាក់មកជាបន្តបន្ទាប់យ៉ាងរដឹក ខ្លះជាសារលាយលំដោយក្តីព្រួយបារម្ភផង។ នៅថ្ងៃព្រហស្បតិ៍នេះ កូរ៉េខាងជើង ក៏មិនបាននៅស្ងៀមដែរ។ ព្យុងយ៉ាងចេញព្រមានប្រធានាធិបតីជាប់ឆ្នោត និងរដ្ឋាភិបាលអាមេរិកថ្មី គួរតែរាប់អានប្រទេសមាននុយក្លេអ៊ែរទៅ។ សម្រាប់កូរ៉េខាងជើង នយោបាយគ្មាននុយក្លេអ៊ែររបស់អាមេរិក ជាចេតនាឆ្ពិនភ្នែកហួសសម័យហើយ។
ចុះផ្សាយនៅថ្ងៃ៖
ស្តាប់ - ០១:៤៨
នៅក្នុងទំព័រកាសែតរបស់បក្សកុម្មុយនិស្ត បក្សតែមួយគត់នៅកូរ៉េខាងជើង និងដែលជាការឆ្លុះបញ្ចាំងជំហររបស់រដ្ឋាភិបាល គេមិនឃើញមានសរសេរឈ្មោះប្រធានាធិបតីអាមេរិកទើបជាប់ឆ្នោតថ្មី ដូណាល់ ត្រាំទេ ប៉ុន្តែ តាំងពីប៉ុន្មានថ្ងៃមកហើយដែលកូរ៉េខាងជើង បានដំឡើងសំឡេង កាន់តែខ្លាំងឡើងៗ ស្នើសុំឱ្យវ៉ាស៊ីនតោន ប្តូរទស្សនៈវិស័យចំពោះកូរ៉េខាងជើង។
“រដ្ឋាភិបាលអូបាម៉ា បានសាកល្បងធ្វើអ្វីដែលនាំអសន្តិសុខនិងគ្រោះថ្នាក់ដល់ទ្វីបអាមេរិក ! សំណល់នេះបានធ្លាក់បន្ទុកទៅឱ្យរដ្ឋាភិបាលថ្មី ជាអ្នកប្រឈមនឹងរដ្ឋនុយក្លេអ៊ែរ » នេះជាអ្វីដែលមានសរសេរក្នុងទំព័រកាសែតបក្ស។ កាសែតបានបញ្ជាក់ទៀតថា ថ្នាក់ដឹកនាំអាមេរិក គួរតែធ្វើតាមសំដីរបស់លោកJames Clapper ថាអាចមានការត្រូវរ៉ូវគ្នាជាទូទៅមួយដោយព្រមទទួលស្គាល់កូរ៉េខាងជើងជាប្រទេសនុយក្លេអ៊ែរ។ ក្តីសង្ឃឹមរបស់អាមេរិកចង់ឃើញកូរ៉េខាងជើងរំសាយកម្មវិធីនុយក្លេអ៊ែរជាក្តីស្រមៃក្នុងអតីតកាលប៉ុណ្ណោះ។
សូមបញ្ជាក់ថា កាលពីចុងខែតុលាកកន្លងទៅ អ្នកសម្របសម្រួលភ្នាក់ងារសម្ងាត់អាមេរិក លោក James Clipper បានប្រកាសអំពីបរាជ័យនៃការបញ្ចុះបញ្ចូលរបបព្យុងយ៉ាងឱ្យបោះបង់កម្មវិធីនុយក្លេអ៊ែរ។ រដ្ឋាបាលអូបាម៉ា មានជំហរដាច់ខាតមិនព្រមចរចាជាមួយកូរ៉េខាងជើងឡើយដរាបណា ប្រទេសមួយនេះមិនព្រមបោះបង់នុយក្លេអ៊ែរ។
ចំណែកលោកដូណាល់ ត្រាំវិញ នៅក្នុងអំឡុងពេលឃោសនា លោកមិនបានផ្សព្វផ្សាយផែនការអ្វីច្បាស់លាស់ទាក់ទងនឹងនយោបាយជាមួយកូរ៉េខាងជើងឡើយ គ្រាន់តែបានព្រលយមាត់ថា លោកបើកចំហចំពោះការចរចាជាមួយនឹងមេដឹកនាំព្យុងយ៉ាង គីម ជុងអ៊ុន និងបានបង្ហើបចេតនាចង់ដកទ័ពអាមេរិកចេញពីកូរ៉េខាងត្បូងផង។ ប៉ុន្តែគ្រាន់តែបានជាប់ឆ្នោតភ្លាម លោកបានទូរស័ព្ទទៅលោកស្រី ប៉ាក់ គុនហេ ប្រធានាធិបតីកូរ៉េខាងត្បូង ដើម្បីបញ្ជាក់អំពីកិច្ចសន្យារបស់អាមេរិក ក្នុងក្របខ័ណ្ឌសម្ព័ន្ធសន្តិសុខជាមួយសេអ៊ូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ