អាមេរិកប្រកាសកិច្ចព្រមព្រៀងទទួលយកជនភៀសខ្លួនជាប់ឃុំនៅអូស្ត្រាលី
អស់រយៈពេលបួនឆ្នាំហើយ ដែលពួកគេត្រូវជាប់ក្នុងមណ្ឌលឃុំឃាំង ! ជនភៀសខ្លួន ដែលអូស្ត្រាលី បានដាក់ទោសឱ្យជាប់នៅលើកោះកណ្តាលមហាប៉ាស៊ីហ្វិក ជិតបានរួចខ្លួនហើយ។ រដ្ឋាភិបាលក្រុងកង់បេរ៉ា នៅតែមិនព្រមទទួលយកពួកឱ្យចូលទឹកអូស្ត្រាលីដដែល ប៉ុន្តែគឺអាមេរិកជាអ្នកផ្តល់សំណាងឱ្យពួកគេទៅរស់នៅលើទឹកដីសហរដ្ឋ។ នៅថ្ងៃអាទិត្យទី ១៣វិច្ឆិកានេះ អាមេរិក បានចុះប្រកាសកិច្ចព្រមព្រៀងជាប្រវត្តិសាស្ត្រជាមួយអូស្រ្តាលីទទួលយកជនភៀសខ្លួន។ គិតត្រឹមថ្ងៃនេះ មានជនជាប់ទោស១៦១៦នាក់ ក្នុងចំណោមពីរពាន់ជាប់ឃុំនៅកោះណូរ៉ុ និងម៉ានុស បានសិទ្ធិជាជនភៀសខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
អូស្ត្រាលីមាននយោបាយអន្តោប្រវេសន៍ដាច់ខាតបំផុត មិនខ្វល់នឹងការរិះគន់ណាទាំងអស់ ! រដ្ឋាភិបាលចម្រុះកាន់អំណាចបានស្បថថានឹងមិនឱ្យជនអន្តោប្រវេសន៍ខុសច្បាប់ណាម្នាក់ រត់តាមទូកឆ្លងសមុទ្ទអាចដាក់ជើងជាន់ដីអូស្ត្រាលីបានឡើយ។ ពាក្យសន្យាដែលអូស្ត្រាលីធ្វើបានសម្រេចមែន ! នៅឆ្នាំ២០១២ ក្រុងកង់បេរ៉ា បានដាក់ពង្រាយនាវាយោធា ដើម្បីចាំចាប់និងរុញទូករត់ពន្ធអន្តោប្រវេសន៍កុំឱ្យចូលដែនទឹកអូស្ត្រាលី និងចាប់បានអន្តោប្រវេសន៍ប្រមាណ២ពាន់នាក់ ទៅដាក់ឃុំនៅលើកោះតូចៗក្នុងមហាសមុទ្ទប៉ាស៊ីហ្វិក។
ក្នុងពេលជាប់លើកោះ ជនអន្តោប្រវេសន៍ទាំងនោះ ត្រូវបានចាត់ទុកជាអ្នកទោស ! សំណុំនេះត្រូវនាំទៅដល់អង្គការសហប្រជាជាតិជាញយដង ដែលជំរុញឱ្យអូស្ត្រាលីត្រូវ រកដំណោះស្រាយ។ កាលពីកន្លងឆ្នាំទៅ អូស្រ្តាលីរកឃើញកិច្ចព្រមព្រៀងជាមួយកម្ពុជា តែពេលនោះមានជនអន្តោប្រវេសន៍តែបីនាក់ប៉ុណ្ណោះព្រមទៅកម្ពុជា។ ប៉ុន្តែសម្រាប់ថ្ងៃនេះ គឺសហរដ្ឋអាមេរិកជាអ្នកព្រមទទួលយកជនភៀសខ្លួនអូស្ត្រាលីទាំងនោះ បើមិនទាំងអស់ ក៏មួយភាគធំដែរ។
ជាមួយកិច្ចព្រមព្រៀងអូស្ត្រាលី-អាមេរិកនេះ មជ្ឈមណ្ឌលឃុំឃាំងជនភៀសខ្លួន នៅកោះម៉ានុស នៃប្រជុំកោះប៉ាពូអាស៊ីនូវែលហ្គីណេ នឹងត្រូវបិទ ប៉ុន្តែមណ្ឌលលើកោះណូរ៉ុ នៅរក្សាដដែល។ ដំណឹងនេះជាក្តីសង្ឃឹមដ៏ធំធេងសម្រាប់ជនភៀសខ្លួន លើកលែងតែអ្នកខ្លះដែលមិនអាចមានសំណាងបានទៅជួបជុំគ្រួសារឡើយ ព្រោះអូស្ត្រាលីបដិសេធដាច់ខាតនិងជារហូតការសុំរស់នៅជួបជុំគ្រួសារ។
ជាងនេះទៅទៀត រដ្ឋាភិបាលអូស្ត្រាលីបានព្រមានទុកជាមុនហើយស្រេច ប្រឆាំងនឹងចរន្តអន្តោប្រវេសន៍ខុសច្បាប់ថ្មី កុំឱ្យសង្ឃឹមថារត់ភៀសខ្លួនមកឱ្យអូស្រ្តាលីចាប់ អាចនឹងបានទៅរស់នៅអាមេរិកឱ្យសោះ។ ក្រុងកង់បេរ៉ា បានប្រមូលនាវាយ៉ាងច្រើនសន្ធឹកសន្ធាប់ ពុំធ្លាប់យកមកដាក់ត្បាតតាមបណ្តោយព្រំដែនជាមួយប្រទេសឥណ្ឌូណេស៊ី ដើម្បីងាយរុញច្រានពួកគេត្រលប់ទៅវិញ។ នាយករដ្ឋមន្ត្រីអូស្ត្រាលីបានបញ្ជាក់យ៉ាងច្បាស់ៗថាជនភៀសខ្លួនថ្មីៗ មិនត្រូវបានរាប់បញ្ជូលទៅក្នុងកិច្ចព្រមព្រៀងទទួលអន្តោប្រវេសន៍ជាមួយនឹងក្រុងវ៉ាស៊ីនតោនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ