អ.ស.ប.ថាកូរ៉េខាងជើងគៃបន្លំមូលនិធិដើម្បីប្រើប្រាស់ក្នុងគោលដៅយោធា
ក្រុមប្រទេសសមាជិករបស់អ.ស.ប. នៅថ្ងៃអង្គារ៍ម្សិលមិញ បានបរិហារពីការរំលោភបំពានរបស់កូរ៉េខាងជើងជាអាទិ៍ការលួចគៃបន្លំមូលនិធិអសបដែលទុកសម្រាប់ជួយសម្រាលវិបត្តិមនុស្សជាតិនៅកូរ៉េខាងជើង យកទៅប្រើប្រាស់នៅក្នុងគោលដៅយោធាដើម្បីអភិវឌ្ឈន៍កម្មវិធីនុយក្លេអ៊ែរនិងការផលិតគ្រាប់មីស៊ីលអន្តរៈទ្វីបរបស់ខ្លួនទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
សេចក្តីសម្រេចចិត្តមួយនៅក្នុងន័យនេះ ដែលស្នើឡើងដោយប្រទេសជប៉ុននិងសហភាពអឺរ៉ុប ត្រូវបានអនុម័តដោយការមូលមតិគ្នាពីសំណាក់គណៈកម្មការមួយរបស់មហាសន្និបាតអង្គការសហប្រជាជាតិទទួលបន្ទុកខាងសិទ្ធិមនុស្ស។ម្យ៉ាងទៀតសេចក្តីសម្រេចចិត្តនេះ នឹងត្រូវគេធ្វើការបោះឆ្នោតម្តងទៀត នៅខែធ្នូខាងមុខនៅក្នុងសម័យប្រជុំពេញអង្គរបស់អ.ស.ប.។
បន្ទាប់ពីការបោះឆ្នោត តំណាងនៃប្រទេសចិនដែលជាសម្ព័ន្ធមិត្តព្យុងយ៉ាងរួមទំាងរុស្ស៊ី ស៊ីរី អ៊ីរ៉ង់និងគុយបា បាននាំគ្នាធ្វើសេចក្តីថ្លែងការណ៍ច្រានចោលអត្ថបទ។
គួររំលឹកថា កូរ៉េខាងជើង ធ្លាប់បានធ្វើការសាកល្បងនុយក្លេអ៊ែរចំនួនពីរលើកនៅឆ្នាំនេះនិងបានចាប់ផ្តើមបាញ់សាកល្បងគ្រាប់មីស៊ីលអន្តរៈទ្វីបមួយចំនួនទៀត ដោយរំលោភបំពានទៅលើសេចក្តីសម្រេចចិត្តនានារបស់អង្គការសហប្រជាជាតិដែលហាមឃាត់រាល់សកម្មភាពនុយក្លេអ៊ែរឬការបាញ់ផ្លោងម៊ីស៊ីលអន្តរៈទ្វីប។ លោក Koro Bessho ឯកអគ្គរដ្ឋទូតជប៉ុន បានគូសបញ្ជាក់ថា “អាជ្ញាធរកូរ៉េខាងជើងដោយឥតខ្វល់ពីជោគវាសនារបស់ប្រជាពលរដ្ឋខ្លួនឯងនោះ បានគៃបន្លំធនធានដែលនៅមានកម្រិត យកទៅអភិវឌ្ឍអាវុធប្រល័យលោកទៅវិញ”។
ទង្វើរបស់កូរ៉េខាងជើងនេះ យោងតាមការគូសបញ្ជាក់របស់ឯកអគ្គរដ្ឋទូតជប៉ុន “គឹជាការរំលោភសិទ្ធិមនុស្ស។ រីឯប្រជាជនចំនួន១៨លាននាក់ក្នុងចំំណោមប្រជាជនកូរ៉េខាងជើងទាំងអស់ ២៥លាននាក់ កំពុងទទួលរងគ្រោះអត់ឃ្លានយ៉ាងខ្លាំងដោយសារការខ្វះខាតស្បៀងអាហារ។
សម្រាប់ឆ្នាំទីបីជាប់បន្តបន្ទាប់គ្នា សេចក្តីសម្រចចិត្តលើកនេះ ជាការលើកទឹកចិត្តក្រុមប្រឹក្សាសន្តិសុខឲ្យប្តឹងទៅតុលាការព្រហ្មទណ្ឌអន្តរជាតិពាក់ព័ន្ធស្ថានភាពនៅក្នុងប្រទេសកូរ៉េខាងជើង ក៏ប៉ុន្តែគំនិតផ្តួចផ្តើមនេះ អាចនឹងជួបឧបសគ្កដោយសារតែសិទ្ធិវេតូរបស់ប្រទេសចិន។
ម្យ៉ាងទៀត អ្នកជំនាញថ្មីរបស់អង្គការសហប្រជាជាតិទទួលបន្ទុកសិទ្ធិមនុស្សនៅក្នុងប្រទេសកូរ៉េខាងជើង លោក Tomas Quintana សញ្ជាតិ Argentine ត្រូវអញ្ជើញទៅបំពេញទស្សនៈកិច្ចនៅកូរ៉េខាងត្បូងនិងជប៉ុននាសប្តាហ៍នេះ ក្នុងអំឡុងពេលដំណើរទស្សនៈកិច្ចលើកដំបូងរបស់លោកនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ