អាជ្ញាធរចិនឃុំមនុស្ស ១៣នាក់នៅក្រោយគ្រោះថ្នាក់ក្នុងមជ្ឈមណ្ឌលអគ្គិសនី
នៅប្រទេសចិន មួយថ្ងៃក្រោយគ្រោះថ្នាក់បាក់រលំការដ្ឋានសាងសង់នៅក្នុងរោងចក្រអគ្គីសនីមក ដែលបណ្តាលឲ្យស្លាប់មនុស្សរហូតដល់៧៤នាក់ក៏ព្រមទាំងមានអ្នករងរបួស២នាក់ អាជ្ញាធរចិន បានចាប់ឃុំខ្លួនជនចំនួន១៣នាក់។ នៅក្នុងការឃុំខ្លួនជនទាំង១៣នាក់នោះ អាជ្ញាធរ ពុំបានបញ្ជាក់ពីមូលហេតុនៃការចាប់ឃុំខ្លួនឬក៏អត្តសញ្ញាណរបស់ជនទាំងអស់នោះដែរ។ នេះបើយោងតាមការជូនដំណឹងរបស់កាសែតផ្លូវការចិននៅព្រឹកមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ក្រោយពីហេតុការណ៍បាក់រំលំការដ្ឋានសាងសង់រោងចក្រអគ្គីសនីមួយនៅខេត្ត Jiangxi ក្នុងភាគកណ្តាលនៃប្រទេសចិនមក អាជ្ញាធរ បានចាប់ឃុំខ្លួនជនចំនួន១៣នាក់តែពុំបានបញ្ជាក់ពីមូលហេតុនៃការចាប់ខ្លួនជនទាំង១៣នាក់នោះឡើយ។ លើសពីនេះ រដ្ឋអំណាចចិន ក៏មិនបានប្រាប់ឲ្យដឹងពីអត្តសញ្ញាណឬក៏ទីកន្លែងឃុំខ្លួនរបស់ជនទាំងនោះដែរ។
ចំណែកប្រតិបត្ដិការជួយសង្គ្រោះវិញ ក៏បានប្រព្រឹត្តទៅជិតចប់សព្វគ្រប់ដែរនៅវេលាចុងរសៀលនេះ។ កាសែតផ្លូវការចិនមួយ បានជូនដំណឹងប្រាប់ថា នៅក្នុងចំណោមជនរងគ្រោះស្លាប់៦៨នាក់ អ្នកដែលមានវ័យក្មេងជាងគេ អាយុ២៣ឆ្នាំ រីឯអ្នកវ័យចំណាស់ជាងគេ អាយុ៥៣ឆ្នាំ។
កាលពីយប់ថ្ងៃព្រហស្បតិ៍ អភិបាលខេត្តរងនិងមន្ត្រីចិនពីររូប នៅក្នុងឱកាសសន្និសីទកាសែតមួយ បានធ្វើការឱនលំទោនដើម្បីគោរពវិញ្ញានខ័ន្ធនៃជនរងគ្រោះទាំងអស់និងបានថ្លែងបញ្ជាក់ពីសេចក្តីសោកស្តាយយ៉ាងជ្រៀលជ្រៅរបស់ខ្លួននៅក្នុងហេតុការណ៍នេះ។ មិនតែប៉ុណ្ណោះ អភិបាលខេត្តរង ក៏បានធ្វើការសុំទោសនិងសុំចូលរួមមរណៈទុក្ខដែរជាមួយក្រុមគ្រួសារនៃជនរងគ្រោះ។
នៅថ្ងៃសុក្រនេះ ប្រជាជនចិនដែលប្រើប្រាស់បណ្តាញសង្គម បាននាំគ្នាបរិហារពីលក្ខខណ្ឌការងាររបស់ពួកកម្មករចិននៅក្នុងប្រទេសមួយដែលអាជ្ញាធរ ពុំបានខ្វល់ខ្វាយពីការអនុវត្តច្បាប់ការពារសុវត្ថិភាពកម្មករឲ្យបានត្រឹមត្រូវឡើយ។ ក្នុងន័យនេះដែរ ពលរដ្ឋចិនមួយរូបតាមរយៈបណ្តាញសង្គម បានសរសេររិះគន់ទៀតថា “ នៅលើការដ្ឋានសំណង់ដ៏ធំធេងមួយ គេឃើញមានតែកម្មករយ៉ាងសន្ធឹកសន្ធាប់ធ្វើការយ៉ាងមមាញឹក តែផ្ទុយទៅវិញ គេពុំឃើញទាល់តែសោះ វត្តមានរបស់ពួកមេកម្មករ ជាអាទិ៍ពួកប្រធានដែលទទួលបន្ទុកផ្នែកសន្តិសុខ។ នៅក្នុងស្ថានភាពបែបនេះ ពួកកម្មករចិន ក៏ជៀសពុំរួចឡើយពីគ្រោះថា្នក់បែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ