ប៉ូលីសរកឃើញគ្រាប់បែកអាយមួយគ្រាប់នៅមិនឆ្ងាយពីស្ថានទូតអាមេរិកប្រចាំទីក្រុងម៉ានីល
នៅហ្វីលីពីន ប៉ូលីស ទើបបានដោះឆ្នួនគ្រាប់បែកអាយមួយគ្រាប់មិនអោយផ្ទុះទាន់នៅថ្ងៃចន្ទនេះដែលស្ថិតនៅចម្ងាយតែ២០០ម៉ែត្រតែប៉ុណ្ណោះពីស្ថានទូតអាមេរិកប្រចាំទីក្រុងម៉ានីលដែលប៉ូលីស បានទម្លាក់ទោសភ្លាមៗទៅលើក្រុមប្រដាប់អាវុធអ៊ីស្លាមនិយម ថាជាអ្នកប៉ុនប៉ងធ្វើអំពើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
យោងតាមប៉ូលីសហ្វីលីពីន គ្រាប់បែកអាយដែលប៉ូលីស បានបង្ក្រាបមិនអោយផ្ទុះទាន់នោះ ត្រូវបានផ្សំផ្គុំឡើងទូរស័ព្ទដៃមួយគ្រឿង ប្រដាប់សម្រាប់បំផ្ទុះមួយ ថ្មពីលដែលមានកម្លាំង៩volts មួយនិងគ្រាប់បែកមួយគ្រាប់ធុន៨១ មីលលីម៉ែត្រ។
នៅចំពោះមុខអ្នកកាសែត លោក Ronald dela Rosa មេប៉ូលីសជាតិ បានចោទប្រកាន់យ៉ាងត្រង់ៗថា ការប៉ុនប៉ងធ្វើអំពើភេរវកម្មនេះ ជាស្នាដៃរបស់ក្រុមអ៊ីស្លាមដ៏សកម្មមួយនៅប៉ែកខាងត្បូងប្រទេសនិងក្រោមឱវាទរបស់អង្គការរដ្ឋអ៊ីស្លាមជីហាត។
គម្រោងភេរវកម្មនៅថ្ងៃនេះ វាអាចជាស្នាដៃរបស់ក្រុមអ៊ីស្លាមមួយឈ្មោះ Maute ឬក៏ក្រុមចលនាAnsar Khilafa Philippines ឬក៏ជាអង្គការមួយផ្សេងទៀតដែលមានទីតាំងនៅប៉ែកខាងត្បូងប្រទេស-នេះបើយោងតាមមេប៉ូលីសហ្វីលីពីន។ គ្រាប់បែកអាយដែលអ្នកជិះ Taxi ម្នាក់ យកទៅលាក់បង្កប់នៅក្នុងធុងសម្រាមមួួយ ហើយបើសិនជាវាផ្ទុះ នោះវាអាចនឹងសម្លាប់ឬក៏ធ្វើឲ្យរងរបួសដល់មនុស្សជាច្រើនរូបដែលស្ថិតនៅក្នុងរង្វង់ប្រមាណតែ១០០ម៉ែត្រប៉ុណ្ណោះ-នេះជាការគូសបញ្ជាក់របស់មេប៉ូលីសហ្វីលីពីនដដែល។
ចំណែក ឧបករណ៍ដែលបានផ្សំផ្គុំសម្រាប់ធ្វើគ្រាប់បែក វាមានលក្ខណៈស្រដៀងគ្នាទៅនឹងគ្រាប់បែកដែលធ្លាប់បានប្រើនៅក្នុងអំពើភេរវកម្មមួយនៅតំបន់ Davao កាលពីខែកញ្ញាមុននិងបានសម្លាប់បណ្តាជនចំនួន១៥នាក់។ ប៉ូលីស បានចាប់ខ្លួនជន៣រូបកាលពីខែងតុលានិងបាន អះអាងថា ជនទាំង៣នាក់នោះ ជាសមាជិកនៃក្រុមអ៊ីស្លាម Maute។
ដោយហេតុមានអំពើភេរវកម្មនៅតំបន់ Davao នេះ ទើបប្រធានាធិបតីហ្វីលីពីន បានប្រកាសដាក់ប្រទេសនៅក្នុងភាពអាសន្ន ហើយកាលពីខែមិថុនាមុន កម្លាំងរដ្ឋាភិបាល បានវាយបង្រ្កាបយកបានជំរំហាត់ហ្វឹកហ្វឺនមួយរបស់ក្រុមMautes ។ ការវាយប្រហារគ្នានាពេលនោះ បានបណ្តាលឲ្យទាហានស្លាប់៤នាក់និងខាងយុទ្ធជនអ៊ីស្លាមMautes ស្លាប់រាប់សិបនាក់។
សូមបញ្ជាក់ថា អាជ្ញាធរហ្វីលីពីនតែងតែចាត់ទុកក្រុម Mautes នេះ ថាជាក្រុមបនឧក្រឹដ្ឋជនតូចតាចដែលល្បីឈ្មោះខាងការចាប់ជំរឹតទារយកលុយពីប្រជាជននោះ ធ្លាប់បានកាប់សម្លាប់បុគ្គលិក២រូបដែលធ្វើការនៅក្នុងរោងអារឈើមួយកាលពីខែមេសាមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ