ហុងកុងរៀបចំការបោះឆ្នោតដើម្បីឈានទៅជ្រើសរើសចៅហ្វាយក្រុងថ្មី
ដំណើរការបោះឆ្នោត ដើម្បីឈានទៅជ្រើសរើសចៅហ្វាយក្រុង ថ្មីបានចាប់ផ្តើម ហើយ នៅទីក្រុងហុងកុង។ នៅថ្ងៃអាទិត្យម្សិលមិញ មនុស្សប្រមាណ ជាង ២សែននាក់ បានទៅបោះឆ្នោតដើម្បីជ្រើសរើស គណៈកម្មាធិការមួយ ដែលនឹងតួនាទី ទៅបោះឆ្នោត បន្ត ជ្រើសរើសចៅហ្វាយក្រុងហុងកុង។ ការបោះឆ្នោតនៅថ្ងៃអាទិត្យ ធ្វើឡើងនៅតែពីរថ្ងៃក្រោយប្រមុខរដ្ឋាភិបាលហុងកុង លោកលឿង ជុនយីង ដែលមានទំនោរទៅរកក្រុងប៉េកាំងបានប្រកាសថា លោកនឹងមិនឈរឈ្មោះ នៅក្នុងការបោះឆ្នោតនាខែមីនាខាងមុខនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រុងហុងកុងនឹងបោះឆ្នោតជ្រើសរើសប្រមុខរដ្ឋាភិបាលថ្មី នៅខែមីនាឆ្នាំក្រោយ។ ហុងកុង មានប្រជាជនជាង ៧លាននាក់ ប៉ុន្តែ នៅថ្ងៃអាទិត្យ ម្សិលមិញ មានប្រជាជនហុងកុងប្រមាណ ៦ភាគរយ តែប៉ុណ្ណោះ ដែលមានសិទ្ធិទៅបោះឆ្នោតជ្រើសរើសគណៈកម្មាធិការបោះឆ្នោត ដែលនឹងមានសិទ្ធិទៅបោះឆ្នោតជ្រើសរើសអនាគតចៅហ្វាយក្រុងហុងកុង នៅឆ្នាំក្រោយ។ មនុស្សជាង២សែននាក់ ដែលអាចទៅបោះឆ្នោតនៅថ្ងៃអាទិត្យភាគច្រើនមកពីក្រុមអ្នកជំនួញ និងអ្នកមានឋានៈ តួនាទីក្នុងរដ្ឋាភិបាល ដែលត្រូវបានគេវាយតម្លៃថា មានតែងមានទំនោរទៅរកប្រទេសចិន។
ក្រុមសកម្មជនទាមទារប្រជាធិបតេយ្យនៅហុងកុង បានចាត់ទុក ការបោះឆ្នោតនៅថ្ងៃអាទិត្យថាជាការមើលស្រាលលទ្ធិប្រជាធិបតេយ្យ ព្រោះថា មានមនុស្សតែមួយក្តាប់តូចដែលអាចទៅបោះឆ្នោត។ មួយវិញទៀត ក្នុងចំណោមសមាជិកគណៈកម្មាធិការ សរុបប្រមាណ ១២០០នាក់ មានមួយភាគបីទៅហើយ ដែលនៅរក្សាកៅអីរបស់ខ្លួន ដោយមិនឆ្លងកាត់ការបោះឆ្នោត។
បើទោះបីជាប្រព័ន្ធបោះឆ្នោតបច្ចុប្បន្នត្រូវតាក់តែងឡើងដើម្បីរក្សាអំណាចរបស់ក្រុមអ្នកមាននិន្នាការទៅរកក្រុងប៉េកាំង បក្សប្រឆាំងសង្ឃឹមថា នឹងអាចបង្កើនវត្តមានរបស់ក្រុមខ្លួន នៅក្នុងគណៈកម្មការ ដើម្បីអាចមានសិទ្ធិជ្រើសរើសប្រមុខរដ្ឋាភិបាលហុងកុងមួយ ដែលគិតគូរដល់សេដ្ឋកិច្ចរបស់ហុងកុង និងមិនសូវរណបខ្លាំងនឹងទីក្រុងប៉េកាំង។
សូមបញ្ជាក់ថា កាលពីឆ្នាំ ២០១២ ដោយមានសារមានសំឡេងច្រើនរបស់ក្រុមប្រឆាំង ចៅហ្វាយក្រុងបច្ចុប្បន្ន លោកលឿង ជុនយីងបានទទួលសំឡេងឈ្នះ យ៉ាងប្រភិតប្រផើយ ប្រមាណ ៦៨៩ ក្នុងចំណោមសំឡេងសរុប១២០០។ យ៉ាងណាក៏ដោយ លោកលឿង ជុនយីងក៏នឹងមិនបារម្ភខ្លាចធ្លាក់នោះដែរ។ លោកលឿង ជុនយីង ដែលធ្លាក់កូដ បាត់ប្រជាប្រិយភាពតាំងពីបាតុកម្មប្រឆាំងប៉េកាំង នៅឆ្នាំ ២០១៤ បានប្រកាស កាលពីថ្ងៃសុក្រ ថា នឹងមិនឈរឈ្មោះ សម្រាប់អាណត្តិក្រោយនោះទេ។ ក្រុមអ្នកប្រជាធិបតេយ្យ និងអ្នកទាមទារឯករាជ្យឲ្យហុងកុង វិញ ដែលឃើញក្រុមអ្នកតំណាងរបស់ខ្លួន នៅសភា ត្រូវបានអាជ្ញាធរចាប់ខ្លួន បានសំដែងក្តីបារម្ភថា បើទោះបីជាលោកលឿង ដែលជាមនុស្សរបស់ប៉េកាំង លែងឈរឈ្មោះ ប៉ុន្តែ ថ្នាក់ដឹកនាំម្នាក់ទៀត ដែលគាំទ្រចិន នឹងចូលមកជំនួសលោកលឿងដដែល គឺនឹងគ្មានអ្វីផ្លាស់ប្តូរទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ