មនុស្សជំនិតរបស់លោកស្រី ប៉ាក់ គុនហេត្រូវតុលាការចោទប្រកាន់ជាបន្តបន្ទាប់
បន្ទាប់ពីចោទប្រកាន់មនុស្សជំនិតពីរនាក់ របស់លោកស្រីប្រធានាធិបតី ប៉ាក់ គុនហេ តុលាការកូរ៉េខាងត្បូង បានសម្រេចនៅថ្ងៃអាទិត្យនេះ បន្តចោទប្រកាន់អតីតទីប្រឹក្សា ហើយនិងអតីតរដ្ឋមន្រ្តីវប្បធម៌ពីររូបផ្សេងទៀត របស់លោកស្រីប៉ាក់ គុនហេ ក្នុងក្របខ័ណ្ឌនៃការស៊ើបអង្កេតទៅលើការឃុបឃិត ប្រព្រឹត្តអំពើពុករលួយ ដែលមានស្រ្តី ឆយ ស៊ុនស៊ីលជាម្ចាស់ដើមរឿង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
រឿងអាស្រូវពុករលួយ រំលោភអំណាច បានរីកមុខកាន់តែធំ នៅកូរ៉េខាងត្បូង។ នៅពីរថ្ងៃក្រោយលោកស្រីប្រធានាធិបតីកូរ៉េខាងត្បូង ត្រូវសភាបោះឆ្នោតទម្លាក់ អតីតទីប្រឹក្សាសេដ្ឋកិច្ច របស់លោកស្រី ហើយនិងអតីតអនុរដ្ឋមន្រ្តីវប្បធម៌ម្នាក់ទៀត ត្រូវបានតុលាការ ចោទប្រកាន់នៅថ្ងៃនេះ គឺបន្ថែមពីលើជនសង្ស័យបីរូប ដែលតុលាការបានចោទប្រកាន់ ដែលនៅក្នុងនោះមានឆយ ស៊ុនស៊ីល មិត្តជិតស្និទ្ធរបស់លោកស្រីប៉ាក់ គុនហេ។
តាមទីភ្នាក់ងារព័ត៌មានកូរ៉េខាងត្បូង យុនហាប់ លោកឆូ វ៉ុនដុង អតីតទីប្រឹក្សាសេដ្ឋកិច្ចរបស់លោកស្រីប៉ាក់ គុនហេត្រូវបានរដ្ឋអាជ្ញាចោទប្រកាន់ថា បានធ្វើតាមលោកស្រីប្រធានាធិបតីដើម្បីដាក់គំនាបទៅលើក្រុមហ៊ុនឯកជន CJ groupe។ រដ្ឋអាជ្ញាកូរ៉េខាងត្បូងបានចោទប្រកាន់ផងដែរ អតីតអនុរដ្ឋមន្រ្តីវប្បធម៌គីម ឆុង ពីបទរំលោភអំណាច ប្រើឥទ្ធិពលរបស់ខ្លួនដើម្បី ជំរុញឲ្យក្រុមហ៊ុនរដ្ឋចុះកិច្ចសន្យាជាមួយមូលនិធិរបស់លោកស្រី ឆយ ស៊ុនស៊ីល មិត្តជំនិតរបស់លោកស្រីប៉ាក់ គុនហេ។
ទៅតាមប្រព័ន្ធផ្សព្វផ្សាយរបស់កូរ៉េខាងត្បូង រដ្ឋអាជ្ញានៅតែដាក់ការចោទប្រកាន់លោកស្រីប្រធានាធិបតីប៉ាក់ គុនហេ ថាបានដើរតួនាទី ឃុបឃិត ក្នុងរឿងអាស្រូវពុករលួយរបស់លោកស្រីឆយ ស៊ុនស៊ីល។ ប៉ុន្តែ លោកស្រី ប៉ាក់ គុនហេ ដែលបើទោះបីជាត្រូវសភាបោះឆ្នោតទម្លាក់ អស់អំណាចពីក្នុងដៃ កាលពីថ្ងៃសុក្រក៏ពិតមែន ក៏នៅតែមានឈ្មោះជាប្រធានាធិបតី រហូតដល់ការសម្រេចចុងក្រោយរបស់តុលាការធម្មនុញ្ញ។
ក្នុងពេលរង់ចាំការសម្រេចរបស់តុលាការធម្មនុញ្ញ លោកស្រីនៅតែទទួលបានអភ័យឯកសិទ្ធិ ទៅតាម រដ្ឋធម្មនុញ្ញ ដែលបានចែងថា គេមិនអាច ចោទប្រកាន់ ប្តឹងផ្តល់ព្រហ្មទណ្ឌប្រមុខដឹកនាំ ដែលកំពុងកាន់អំណាចបានទេ លើកលែងតែរឿងបះបោរ ក្បត់ជាតិតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ