នាយករដ្ឋមន្រ្តីជប៉ុនក្រាលកម្រាលព្រំទទួលប្រធានាធិបតីរុស្ស៊ី
ចុះផ្សាយនៅថ្ងៃ៖
ស្តាប់ - ០៦:១៤
ប្រធានាធិបតីរុស្ស៊ី លោកវ្លាឌីមៀរ ពូទីនបានផ្តើមទស្សនកិច្ចផ្លូវរដ្ឋ នៅប្រទេសជប៉ុន។ នៅជប៉ុន ប្រមុខដឹកនាំរុស្ស៊ី ត្រូវចូលរួមក្នុងជំនួបកំពូលរុស្ស៊ី ជប៉ុន ដែលផ្តោតទៅលើជម្លោះប្រជុំកោះគូរីល ដែលបានបំពុលទំនាក់ទំនងរុស្ស៊ី ជប៉ុន រហូតធ្វើឲ្យប្រទេសទាំងពីរមិនអាចចុះសន្ធិសញ្ញាសន្តិភាពជាមួយគ្នា។
ក្នុងរយៈពេល១១ឆ្នាំចុងក្រោយ នេះជាលើកទី ១ ដែលប្រធានាធិបតីរុស្ស៊ី លោកពូទីនដាក់ជើងជាន់ទឹកដីជប៉ុន។ ទស្សនកិច្ចផ្លូវរដ្ឋ របស់ប្រមុខដឹកនាំរុស្ស៊ី នៅជប៉ុន ជាលទ្ធផលនៃនយោបាយស្រទន់របស់នាយករដ្ឋមន្រ្តីជប៉ុន លោកស្ហ៊ីនហ្សូ អាបេ ដែលធ្លាប់ជួបពិភាក្សា យ៉ាងតិច ១៥ដង ជាមួយប្រមុខដឹកនាំកំពូលរបស់ក្រេមឡាំង ក្នុងរយៈពេល៤ឆ្នាំចុងក្រោយនេះ។ ចង់ដោះស្រាយជម្លោះដណ្តើមដីប្រជុំកោះគូរីលជាមួយរុស្ស៊ី។
នៅមុនជំនួបជាមួយប្រធានាធិបតីរុស្ស៊ី លោកនាយករដ្ឋមន្រ្តីជប៉ុន ស្ហ៊ីនហ្សូ អាបេ ធ្លាប់បានសន្យាថា នឹងខំប្រឹងដោះស្រាយជម្លោះប្រជុំកោះគូរីល ដើម្បីទុកជាដានក្នុងប្រវត្តិសាស្រ្តទំនាក់ទំនងរុស្ស៊ី និងជប៉ុន។ កាលពីខែកញ្ញា លោកអាបេដែលបានទៅបំពេញទស្សនកិច្ចនៅទីក្រុងម៉ូស្គូធ្លាប់បាននិយាយទៅកាន់លោកប្រធានាធិបតីរុស្ស៊ីថា លោកបានកំណត់ខ្លួនឯងហើយថា នឹងខំប្រឹងប្រើអស់កម្លាំងកាយចិត្ត ដើម្បីជំរុញទំនាក់ទំនងល្អរវាងរុស្ស៊ី និងជប៉ុន។ ដើម្បីចាក់គ្រឹះ ពង្រឹងទំនាក់ទំនងជាមួយរុស្ស៊ី លោកនាយករដ្ឋមន្រ្តីអាបេ បានដើរផ្ទុយស្រឡះពីនយោបាយជាប្រពៃណីរបស់ជប៉ុន ដោយសុខចិត្តធ្វើសម្បទាន ទាមទារយកកោះតែពីរ ប៉ុណ្ណោះ ក្នុងចំណោមកោះ៤នៃប្រជុំកោះគូរីល ពីរុស្ស៊ី។ លើសពីនោះ លោកអាបេបានបង្ហើបពីសហការសេដ្ឋកិច្ចដែលមានតម្លៃ មួយពាន់ ពាន់លានយេន ស្មើនឹង ៨,១៥ពាន់លានអឺរ៉ូ។ នៅថ្ងៃព្រហស្បតិ៍ លោកអាបេបានទទួលលោកពូទីននៅខេត្តណាហ្កាតាវ ដែលមានផ្ទះគ្រួសាររបស់លោក។
នៅមុនដំណើរទស្សនកិច្ចទៅកាន់ជប៉ុន លោកវ្លាឌីមៀរ ពូទីនបាននិយាយប្រាប់អ្នកកាសែតជប៉ុនថា លោកចាប់អារម្មណ៍សំណើរបស់លោកនាយករដ្ឋមន្រ្តី ជប៉ុន ប៉ុន្តែ ជាមួយគ្នានោះ លោកក៏មិនចង់រំលោភការទុកចិត្តរបស់ប្រជាជនរុស្ស៊ី។ ពាក្យមួយឃ្លាបង្ហាញថា លោកពូទីនច្បាស់ជានឹងមិនធ្វើសម្បទាន យល់ព្រមចែកដីប្រជុំកោះគូរីលទៅឲ្យជប៉ុនវិញដែរ។
២៥ឆ្នាំមកហើយ ដែល ជប៉ុន និងរុស្ស៊ីបានចរចាគ្នា ដើម្បីរកដំណោះស្រាយឲ្យជម្លោះដណ្តើមទឹកដីរវាងប្រទេសទាំងពីរ ពោលគឺចាប់តាំងពីសហភាពសូវៀត ដួលរលំ ម្ល៉េះប៉ុន្តែ ការចរចារាល់លើកត្រូវបរាជ័យ។
នៅឆ្នាំ ១៩៥៦ ថ្នាក់ដឹកនាំរុស្ស៊ីធ្លាប់បានសន្យាយល់ព្រមប្រគល់កូនកោះ ពីរ របស់ប្រជុំកោះគូរីល(កោះShikotan និងHabomai)ទៅឲ្យជប៉ុនវិញ ជាថ្នូរជាមួយនឹងការចុះហត្ថលេខាលើសន្ធិសញ្ញាសន្តិភាពជាមួយជប៉ុន។ ប៉ុន្តែ ជប៉ុនមិនព្រម គឺចង់បានប្រជុំកោះគូរីលទាំង៤ដែលជប៉ុនបានចោទរុស្ស៊ីថា បានរឹបអូសយកទៅគ្រប់គ្រងខុសច្បាប់ នៅពេលជប៉ុនចាញ់សង្រ្គាមលោកលើកទី២។
សម្រាប់អ្នកជំនាញខាងទំនាក់ទំនងរុស្ស៊ី និងជប៉ុន កិច្ចព្រមព្រៀងស្តីពីប្រជុំកោះគូរីលជារឿងដែលពិបាកនឹងចេញរួច។ ប៉ុន្តែ រុស្ស៊ី និងជប៉ុនទំនងអាចនិយាយត្រូវរ៉ូវគ្នា ដោយដាក់ប្រជុំកោះ គូរីល ក្នុងការអភិវឌ្ឍរួមគ្នា ដូចជាបង្កើតតំបន់សេដ្ឋកិច្ចជប៉ុន នៅលើប្រជុំកោះគូរីលដែលស្ថិតនៅក្រោមការគ្រប់គ្រងរដ្ឋបាលរបស់រុស្ស៊ី។
រុស្ស៊ីបច្ចុប្បន្ន រឹតតែមិនចង់បាត់បង់ដីកោះគូរីលមួយជម្រៀកណាទេ។ ក្នុងពេលប្រឈមមុខជាមួយប្រទេសលោកខាងលិច ជាពិសេស អាមេរិក ប្រជុំកោះគូរីលជាតំបន់យុទ្ធសាស្រ្ត យោធា និងសេដ្ឋកិច្ចសម្រាប់ទីក្រុងម៉ូស្គូ។ ប្រជុំកោះគូរីល មិនត្រឹមតែជាតំបន់សម្បូរឧស្ម័ន លោហៈកម្រ និងត្រីសម្រាប់អ្នកនេសាទរុស្ស៊ីតែប៉ុណ្ណោះទេ ប៉ុន្តែ វាជាទីតាំងយុទ្ធសាស្រ្តយោធាសំខាន់សម្រាប់នាវាមុជទឹករុស្ស៊ី ដែលចង់គេចចេញពីរ៉ាដា អាមេរិក និងចង់ធ្វើដំណើរចូលទៅក្នុងមហាសមុទ្រប៉ាស៊ីហ្វិក។
ជម្លោះប្រជុំដីកោះគូរីល ដែលជាឆ្អឹងទទឹងក មិនឲ្យប្រទេសជិតខាងទាំងពីរ អាចចុះសន្ធិសញ្ញាសន្តិភាពជាមួយគ្នា។ លោកប្រធានាធិបតីរុស្ស៊ីធ្លាប់បាននិយាយហើយថា គ្មានសន្ធិសញ្ញាសន្តិភាព ជាមួយគ្នា ប្រទេសទាំងពីរមិនអាចទុកចិត្ត និងចាប់ដៃធ្វើការជាមួយគ្នាបានទេ។
ជប៉ុនត្រូវការចងដៃគូជាមួយរុស្ស៊ី ដើម្បីបន្សាបឥទ្ធិពលរបស់ចិននៅក្នុងតំបន់
នៅក្នុងកាលៈទេសៈ បច្ចុប្បន្ន ដែលភូមិសាស្រ្តនយោបាយប្រែប្រួល ប្រទេសទាំងពីរត្រូវការគ្នាទៅវិញ ទៅមក។ បើទោះបីកំពុងជាប់ឈ្លោះជាមួយរុស្ស៊ីក្នុងរឿងប្រជុំកោះគូរីល ប៉ុន្តែ ជប៉ុន ត្រូវបង្ខំចិត្ត ងាកទៅរកចាប់ដៃ ជាមួយរុស្ស៊ី ដើម្បី អាចប្រឈមមុខជាមួយចិន ដែលចេះតែពង្រីកឥទ្ធិពលទាំងយោធា និងសេដ្ឋកិច្ចរបស់ខ្លួន នៅក្នុងតំបន់។ ជប៉ុនត្រូវងាកទៅត្រូវរ៉ូវជាមួយ រុស្ស៊ី ក្នុងកាលៈទេសៈដែលអនាគត ប្រធានាធិបតីអាមេរិក លោកដូណាល់ ត្រាំ បានបង្ហាញជំហរចង់ដោះដៃ បោះបង់ចោលយុទ្ធសាស្រ្តអាមេរិកនៅអាស៊ី។
ជប៉ុនចាប់ដៃជាមួយ រុស្ស៊ី គឺដើម្បីកុំឲ្យរុស្ស៊ី ក្លាយជាមិត្តផ្តាច់មុខ របស់ចិន។ ជប៉ុនបារម្ភថា ចិននឹងអាចប្រើ ខ្ចីដៃ រុស្ស៊ី ដែលត្រូវការចិន ដើម្បីដង្ហើមសេដ្ឋកិច្ចរបស់ខ្លួន យកមកគំរាម ទាំងផ្នែកសេដ្ឋកិច្ច និងយោធាដាក់ជប៉ុន។ ដោយសម្រាលភាពតានតឹងជាមួយរុស្ស៊ី ជប៉ុនក៏នឹងអាចជៀសផុតពីការដាក់គំនាបផ្នែកយោធា ទាំងពីជើង និងពីខាងត្បូង ពោលគឺទាំងពីខាងរុស្ស៊ី និងចិន ក្នុងពេលតែមួយ ព្រោះថា រឿងនេះធ្លាប់មានម្តងហើយ នៅពេលដែលចិន និងរុស្ស៊ីដែលចងសម្ព័ន្ធភាពជាមួយគ្នា បានធ្វើសមយុទ្ធរួមគ្នា និងបានបញ្ជូនយន្តហោះចម្បាំង និងនាវាល្បាតចូលក្នុងដែនទឹកជប៉ុន ទាំងពីខាងជើង និងខាងត្បូងជប៉ុន។
មួយវិញទៀត ជប៉ុនត្រូវសហការជាមួយរុស្ស៊ី ដើម្បីត្រៀមជៀសវាង កុំឲ្យការដឹកជញ្ជូនផ្នែកថាមពលរបស់ខ្លួន ត្រូវអាក់ខាន នៅចិនធ្វើព្យុះ ធ្វើផ្គនៅសមុទ្រចិនខាងត្បូង។
ងាកមកមើលរុស្ស៊ីវិញ បើប្រៀបធៀបនឹងជប៉ុនដែលទន្ទឹងរង់ចាំច្រើនពីជំនួបកំពូលរុស្ស៊ី ជប៉ុន រុស្ស៊ីវិញ គឺសង្ឃឹមចង់បានតិចតួចពីជំនួបកំពូលជាមួយជប៉ុន។ រុស្ស៊ីចង់បានតែម្យ៉ាងគឺជំរុញផ្នែកសេដ្ឋកិច្ចរបស់ខ្លួន ដែលកំពុងរងការដាក់ទណ្ឌកម្មពីប្រទេសលោកខាងលិច ដោយសាររឿងរុស្ស៊ីភ្ជាប់ទឹកដីគ្រីមេរបស់អ៊ុយក្រែន។ គេរំពឹងថា នឹងមានកិច្ចព្រមព្រៀងជាង៣៥ ដែលផ្តោតសំខាន់ទៅលើការដោះដូរផ្នែកថាមពល និងបច្ចេកវិទ្យានឹងត្រូវ ប្រទេសទាំងពីរចុះហត្ថលេខានៅក្នុងជំនួបកំពូលរុស្ស៊ី និងជប៉ុន នៅទីក្រុងតូក្យូ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ