ជប៉ុនបន្តបង្កើនថវិកាការពារជាតិ
រដ្ឋាភិបាលជប៉ុននៅថ្ងៃព្រហស្បតិ៍ នេះបានអនុម័តសេចក្តីព្រាងកញ្ចប់ថវិកាជាតិ សម្រាប់ឆ្នាំក្រោយ ដែលនៅក្នុងនោះ ខ្ទង់ចំណាយសម្រាប់វិស័យការពារ ត្រូវបានរដ្ឋាភិបាលដំឡើងបន្ថែមឲ្យដល់ ៤២ពាន់លានអឺរ៉ូ។ ជប៉ុនបានបង្កើនថវិកាកងទ័ព ក្នុងកាលៈទេសៈមួយដែលចិនកំពុងពង្រីកឥទ្ធិពលយោធា ក្នុងតំបន់ ហើយនិងការគំរាមកំហែងរបស់កូរ៉េខាងជើង ដែលបានបាញ់សាកល្បងគ្រាប់បែក និងមីស៊ីលចម្ងាយឆ្ងាយ ម្តងជាពីរដង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ក្នុងរយៈពេល៥ឆ្នាំ ជាប់ៗគ្នា រដ្ឋាភិបាលជប៉ុនបានដំឡើង ជាបន្តបន្ទាប់ ថវិកាសម្រាប់វិស័យការពារជាតិ។ ទៅតាមសេចក្តីព្រាងថវិកាជាតិសម្រាប់ឆ្នាំ២០១៧ និង២០១៨ ថវិកាកងទ័ព នឹងត្រូវដំឡើង បន្ថែម ១,៤% គឺប្រមាណ ៤២ពាន់លានអឺរ៉ូក្នុងមួយឆ្នាំ។
ការដំឡើងមិនឈប់ ថវិកាសម្រាប់វិស័យការពារជាតិ បានសបញ្ជាក់ឲ្យឃើញពីការប្តេជ្ញាចិត្តរបស់រដ្ឋាភិបាលជប៉ុន ដែលចង់ពង្រឹងសមត្ថភាពកងទ័ព ដែលកន្លងមកត្រូវបានរដ្ឋធម្មនុញ្ញដាក់កំហិតឲ្យដើរតួនាទីត្រឹមស្វ័យការពារជាតិ។ បច្ចុប្បន្ននេះ ជប៉ុនគឺស្ថិតនៅក្នុងស្ថានភាពប្រុងប្រៀបខ្លួន ជានិច្ច ដើម្បីត្រៀមប្រឈមរាល់ការវាយប្រហាររបស់គ្រាប់មីស៊ីលកូរ៉េខាងជើង ដែលនៅតែក្នុងឆ្នាំ២០១៦នេះ បានបាញ់សាកល្បងគ្រាប់បែកនុយក្លេអ៊ែរ២ពីរដង និងគ្រាប់មីស៊ីលដល់ទៅ២០ដង។ តាមក្រសួងការពារជាតិជប៉ុន ជាមួយនឹងកញ្ចប់ថវិកាថ្មី ក្រសួងចង់ពង្រឹងប្រព័ន្ធខែលមីស៊ីល តាមរយៈការអភិវឌ្ឍជាមួយអាមេរិក ដើម្បីបង្កើតមីស៊ីលដែលមានសមត្ថភាពតាមដានចាប់សញ្ញាមីស៊ីលរបស់គូសត្រូវ។
ជាមួយនឹងការដំឡើងបន្ថែមថវិកាកងទ័ព ដល់កម្រិតមួយខ្ពស់មិនធ្លាប់មាន រដ្ឋាភិបាលជប៉ុនចង់ផងដែរ ពង្រឹងសមត្ថភាពការពារដែនទឹករបស់ខ្លួន នៅសមុទ្រចិនខាងកើត។ តាមក្រសួងការពារជាតិជប៉ុន គេបានចំណាយថវិកាសម្រាប់ប្រតិបត្តិការទ័ពអាកាស និងជើងទឹក ដែលមាននាទីការពារតំបន់ដីកោះរបស់ជប៉ុន។ ដីកោះដែលជប៉ុនចង់សំដៅ គឺកោះគ្មានមនុស្សរស់នៅ សេនកាគូ ដែលស្ថិតនៅក្រោមការគ្រប់គ្រងរបស់ជប៉ុន ប៉ុន្តែ ដែលចិនទាមទារជាទឹកដីរបស់ខ្លួន។
រដ្ឋាភិបាលជប៉ុន កាលពីថ្ងៃពុធម្សិលមិញ បានប្រកាសបង្កើនថវិកា១២% សម្រាប់ពង្រឹងសមត្ថភាពឆ្មាំសមុទ្រ ដើម្បីទប់ទល់នឹងចិន ដែលចេះតែបញ្ជូនកប៉ាល់ចូលក្បែរកោះសេនកាគូរបស់ជប៉ុន។ ជាមួយនឹងកញ្ចប់ថវិកាថ្មី ជប៉ុនគ្រោងនឹងទិញបន្ថែមនាវាល្បាតថ្មី ២គ្រឿង ហើយនិងរើសបញ្ចូលឆ្មាំសមុទ្រ២០០នាក់បន្ថែមទៀត។
តាំងពីឆ្នាំ ២០១២ នាវាល្បាតជប៉ុន ជួបប្រទះសឹងតែរាល់ថ្ងៃ កប៉ាល់ចិនដែលបានបើករំលោភចូលក្នុងដែនជប៉ុន ក្បែរកោះសេនកាគូ។ លោកនាយករដ្ឋមន្រ្តីជប៉ុន បានលើកឡើងយ៉ាងដូច្នេះ ដើម្បីបញ្ជាក់ពីការសម្រេចចិត្តរបស់រដ្ឋាភិបាលដែលចង់ដំឡើងថវិកាសម្រាប់វិស័យការពារជាតិ។
សូមបញ្ជាក់ថា តាំងពីចូលកាន់តំណែងជានាយករដ្ឋមន្រ្តីជប៉ុន លោកស្ហ៊ីនហ្សូ អាបេ មកពីក្រុមអភិរក្សនិយម បានជំរុញឲ្យមានកំណែទម្រង់រដ្ឋធម្មនុញ្ញ ដើម្បីផ្លាស់ប្តូរ មុខមាត់ថ្មីរបស់កងទ័ពជប៉ុន។ ឆ្នាំ២០១៦នេះ ឆ្នាំលើកដំបូងបង្អស់ ចាប់តាំងពីចប់សង្រ្គាមលោកលើកទី ២ ដែលកងទ័ពជប៉ុនអាចមានសិទ្ធិទៅធ្វើអន្តរាគម ប្រយុទ្ធ នៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ