ទស្សនកិច្ចជាប្រវត្តិសាស្ត្រ របស់នាយករដ្ឋមន្ត្រីជប៉ុននៅ Pearl Harbor
ចុះផ្សាយនៅថ្ងៃ៖
ស្តាប់ - ០៦:០៥
នាយករដ្ឋមន្ត្រីជប៉ុន លោក ស្ហ៊ីនហ្សូ អាបេ ដែលល្បីថាជាមេដឹកនាំអ្នកជាតិនិយមបំផុតនោះ កំពុងបំពេញទស្សនកិច្ច នៅកោះហាវៃ សហរដ្ឋអាមេរិក រយៈពេលពីរថ្ងៃ ពីថ្ងៃទី២៦ និង ២៧ធ្នូ។ ជាដំណើរទស្សនកិច្ចប្រកបដោយនិម្មិត្តរូប និងដើម្បីផ្សះផ្សា ដោយនៅថ្ងៃស្អែក លោកអាបេ និង លោក អូបាម៉ា នឹងអញ្ជើញទៅគោរពវិញ្ញាណក្ខន្ធជនរងគ្រោះ នៅ Pearl Harbor ផ័លហាប័រ ដែលជប៉ុនបានវាយប្រហារលើទ័ពអាមេរិក កាលពីថ្ងៃទី ៧ ធ្នូ ១៩៤១។
លោក ស្ហ៊ីនហ្សូ អាបេ បានក្លាយជានាយករដ្ឋមន្ត្រីជប៉ុនទីមួយ ដែលបានអញ្ជើញទៅដល់ Pearl Harbor ដែលធ្លាប់ជាសមរភូមិ កាលពី៧៥ឆ្នាំមុន ដោយកងទ័ពអធិរាជជប៉ុន បានធ្វើការវាយប្រហារ ដ៏ភ្ញាក់ផ្អើលលើមូលដ្ឋានទ័ពអាមេរិក។ នៅព្រលឹម ថ្ងៃទី ៧ ធ្នូ ឆ្នាំ១៩៤១ មេទ័ពជប៉ុន ប្រកាសបញ្ជាយន្តហោះទម្លាក់គ្រាប់បែកលើបន្ទាយអាមេរិក ដែលទាហានកំពុងលង់លក់នៅឡើ ប្រតិបត្តិការ មួយប្រាវដំបូង បានសម្លាប់ទាហានអាមេរិកអស់ជិត ២៥០០នាក់។ គឺដោយសារការវាយប្រហារដល់ផ្ទះនេះហើយ ដែលជំរុញឱ្យសហរដ្ឋអាមេរិកសម្រេចចូលប្រលូកក្នុងសង្គ្រាមលោកលើកទីពីរនៅអាស៊ីប៉ាស៊ីហ្វិក និងបានទៅទម្លាក់គ្រាប់បែកបរមាណូនៅហ៊ីរ៉ូស្ហ៊ីម៉ា និងណាវ៉ាហ្សាគី ដើម្បីបិទបញ្ចប់សង្គ្រាម។
លោកអាបេ បានចាត់ទុកដោយផ្ទាល់មាត់លោកថា ដំណើរទស្សនកិច្ចនេះ ជាការសន្យាសម្រាប់អនាគត ជាការផ្សះផ្សាការទូត រវាងអតីតគូសត្រូវក្នុងសង្គ្រាមដែលក្លាយមកជាមិត្តដ៏ស្និទ្ធល្មួត។
នៅថ្ងៃអង្គារស្អែក លោកនាយករដ្ឋមន្ត្រីជប៉ុន នឹងត្រូវជួបជាមួយលោកប្រធានាធិបតីអាមេរិក នៅមុខកន្លែងតម្កល់សពទាហានអាមេរិក ដើម្បីគោរពវិញ្ញាណក្ខន្ធ ទាហានដែលបានបាត់បង់ជីវិតក្នុងការវាយប្រហាររបស់ជប៉ុន។ កាយវិការនេះ បានកើតឡើងក្រោយតែប៉ុន្មានខែ ពីលោកអូបាម៉ា ប្រធានាធិបតីអាមេរិក បានអញ្ជើញទៅហ៊ីរ៉ូស្ហ៊ីម៉ា។
គោរពវិញ្ញណក្ខន្ធ តែមិន “សុំទោស” !
គ្មានទេ ពាក្យថា "សុំទោស” ! សហរដ្ឋអាមេរិកក៏ហាក់បីដូចជាមិនទាមទារ និងចង់បានឬចង់ឮពាក្យសុំទោស ដែរទេ។ ត្រឹមបានគោរពវិញ្ញណាក្ខន្ធជនរងគ្រោះបាត់បង់ជីវិតក្នុងសង្គ្រាម ដល់កន្លែងដ៏ឈឺចាប់ ម្តងម្នាក់ អាចចាត់ទុកបានថាជានិម្មិត្តរូបខ្ពស់បំផុតទៅហើយ សម្រាប់បង្ហាញពិភពលោក អំពីអំណាចនៃការផ្សះផ្សាគ្នា។ ប្រធានាធិបតីអាមេរិកអញ្ជើញទៅហ៊ីរ៉ូស្ហ៊ីម៉ា ប្រមុខរដ្ឋាភិបាលជប៉ុន មកPearl Harbor តើរូបភាពនេះមិនមែនជាគំរូល្អសម្រាប់ពិភពលោកទេឬ ?!
ជប៉ុនបានចូលទៅវាយប្រហារអាមេរិកដល់មូលដ្ឋានកងទ័ព ហើយអាមេរិកតបស្នងមកវិញ ជាសង្គ្រាមនុយក្លេអ៊ែរនៅហ៊ីរ៉ូស្ហ៊ីម៉ា និងណាវ៉ាហ្សាគី សម្លាប់ជនស៊ីវិល ! ជាទង្វើពីរដែលមិនអាចប្រៀបធៀបនឹងគ្នាបានទេ ! ទាំងអាមេរិក ទាំងជប៉ុន សុទ្ធតែមានហេតុផលសំអាងរបស់ខ្លួនរៀងៗខ្លួន ប៉ុន្តែអតីតគូសត្រូវស៊ីសាច់ហុតឈាមគ្នានេះ ចេះប្រែក្លាយចំណុចចាប់ផ្តើមនៃសង្គ្រាម Pearl Harbor និងចំណុចបញ្ចប់សង្គ្រាមហ៊ីរ៉ូស្ហ៊ីម៉ា ឱ្យទៅជាកន្លែងសម្រាប់ពង្រឹងសម្ព័ន្ធភាព ជប៉ុន-អាមេរិក និងការពឹងពំនាក់គ្នា។
សូមរំលឹកថា ក្រៅអំពីតម្លៃប្រវត្តិសាស្ត្រនិងនិម្មិត្តរូប ទស្សនកិច្ចរបស់លោកអាបេ នៅហាវៃក៏មានបង្កប់ទៅដោយអត្ថន័យជាយុទ្ធសាស្ត្រខ្លាំងណាស់ ក្នុងការធ្វើតេស្តសាកល្បងលើភាពរឹងមាំនៃចំណងសម្ព័ន្ធភាពអាមេរិក-ជប៉ុន ! លោកអាបេ ត្រូវជួបពិភាក្សាជាមួយប្រធានាធិបតីអាមេរិកផុតអាណត្តិ ក្នុងបរិបទមិនប្រាកដប្រជា នៅតំបន់អាស៊ី តាំងពីលោកដូណាល់ ត្រាំ បានជាប់ឆ្នោតមក។ ស្ថិរភាពអាស៊ី ត្រូវរំពឹងលើកំណើនរបស់ក្រុមសមាគមប្រជាជាតិនៅអាស៊ីអាគ្នេយ៍ លើចិន លើការពឹងពំនាក់គ្នាទៅវិញទៅមកនៃសេដ្ឋកិច្ចតំបន់ និងលើអំណាចយោធារបស់អាមេរិក។ សម្រាប់ប្រទេសមួយចំនួននៅក្នុងតំបន់ ដូចយ៉ាងជប៉ុន គឺមានអាមេរិកជាអ្នកការពារ។ តែលោកដូណាល់ ត្រាំ នៅក្នុងពេលឃោសនាបោះឆ្នោត បានបង្ហាញឆន្ទៈមិនចង់ធ្វើជាអ្នកមើលការខុសត្រូវនៅអាស៊ីទេ។
ទស្សនកិច្ចដើម្បីពង្រឹងសម្ព័ន្ធភាពជប៉ុន-អាមេរិក
តាំងពីដើមមក រហូតមកដល់មុនពេលបោះឆ្នោតប្រធានាធិបតីអាមេរិក ជប៉ុនជឿស៊ុបលើសម្ព័ន្ធភាពជាមួយអាមេរិក ! ក្នុងសម័យសង្គ្រាមត្រជាក់ ក៏ជប៉ុនហាក់មានការធានារ៉ាប់រងខ្ពស់ដែរ... ប៉ុន្តែសំណួរ ថាតើអាមេរិកអាចជួយការពារជប៉ុនដល់កំរិតណា និងពេលណា ទើបតែត្រូវចោទឡើងនៅពេលលោកដូណាល់ត្រាំ បានបន្ទោសកូរ៉េខាងត្បូងនិងជប៉ុនឱ្យចេះត្រូវទទួលខុសត្រូវចាយថវិកាខ្លះ អាមេរិកសព្វថ្ងៃបង់ឱ្យច្រើនជ្រុល។
អញ្ចឹងហើយបានជាជប៉ុនរបស់លោក អាបេ ត្រូវតែធ្វើគ្រប់យ៉ាង ដើម្បីរឹតចំណងមិត្តភាពជាមួយអាមេរិក បើទោះបីជាត្រូវធ្វើដំណើរមកPearl Harbor គោរពវិញ្ញាណក្ខន្ធជនរងគ្រោះសង្គ្រាម ក៏មិនថ្វី។ លោក អាបេ នឹងត្រូវវិលមកជួបអនាគតប្រធានាធិបតីអាមេរិក ដូណាល់ ត្រាំជាថ្មី នៅខែក្រោយទៀត។ មានតែសម្ព័ន្ធភាពរឹងមាំជប៉ុន-អាមេរិកទេ ដែលជាគ្រឹះ ជាមូលដ្ឋាននៃស្ថិរភាពសម្រាប់តំបន់អាស៊ីទាំងមូលផង និងសម្រាប់ប្រទេសជប៉ុនផ្ទាល់ផង។ ទង្វើរបស់លោកអាបេ បែបនេះ ត្រូវបានអ្នកវិភាគខ្លះចាត់ទុក ថា អ្នកជាតិនិយមបំផុតអាបេ កំពុងធ្វើជាខ្លួន ជាអ្នកការពារសិ្ថរភាពពិភពលោកដ៏មុះមុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ