ចិនសន្យាបើកទីផ្សារឲ្យទូលាយជាងមុន ដល់ក្រុមហ៊ុនវិនិយោគបរទេស
ចិន មហាអំណាចសេដ្ឋកិច្ចពិភពលោក ទី ២ នៅសប្តាហ៍នេះបានសន្យាបន្ធូរបន្ថយលក្ខខណ្ឌមួយចំនួន ដើម្បីបើកទូលាយ ទាក់ទាញក្រុមហ៊ុនបរទេសឲ្យចូលទៅវិនិយោគកាន់តែច្រើន ក្នុងប្រទេសចិន។ សេចក្តីប្រកាសរបស់ក្រុមប្រឹក្សារដ្ឋធ្វើឡើង នៅក្នុងកាលៈទេសៈដែលគម្រោងវិនិយោគ បរទេសបានធ្លាក់ចុះបើប្រៀបធៀបជាងមុន។
ចុះផ្សាយនៅថ្ងៃ៖ កែប្រែថ្ងៃទី៖
ទៅតាមសេចក្តី ប្រកាសព័ត៌មានរបស់ក្រុមប្រឹក្សារដ្ឋ ចេញផ្សាយ នៅល្ងាចថ្ងៃព្រហស្បតិ៍ នៅក្រោយកិច្ចប្រជុំជាមួយនាយករដ្ឋមន្រ្តីចិន លោកលី ឃឺឆាំង រដ្ឋាភិបាលចិនបានសន្យានឹងបន្ធូរបន្ថយគោលនយោបាយវិនិយោគសម្រាប់ក្រុមហ៊ុនបរទេស។ ចិន មហាយក្សសេដ្ឋកិច្ចអាស៊ី បានសន្យាបង្កើតបរិយាកាសល្អ ដើម្បីឲ្យក្រុមហ៊ុនបរទេសអាចប្រកួតប្រជែងដោយស្មើភាពជាមួយក្រុមហ៊ុនក្នុងស្រុកចិន។
ទៅតាមសេចក្តីប្រកាសរបស់ក្រុមប្រឹក្សារដ្ឋចិន អំណើះតទៅ ក្រុមហ៊ុនបរទេសនឹងត្រូវអនុញ្ញាតឲ្យគ្រប់គ្រងផ្តាច់មុខ ១០០%លើសាខារបស់ខ្លួន ក្នុងទឹកដីចិន គឺផ្ទុយស្រឡះ ពីគោលនយោបាយមុន ដែលតម្រូវឲ្យក្រុមហ៊ុនបរទេស ចាប់ដៃគូ សហការជាមួយក្រុមហ៊ុនក្នុងស្រុក បើសិនចង់វិនិយោគនៅក្នុងប្រទេសចិន។ ទៅតាមគោលនយោបាយបើកចំហររបស់រដ្ឋអំណាចចិន ក្រុមហ៊ុនបរទេសនឹងអាចវិនិយោគផ្តាច់មុខ ដោយមិនចាំបាច់មានភាគហ៊ុនរបស់ចិន នៅក្នុងឧស្សាហកម្មផលិតផ្លូវដែក ឬយានជំនិះជាដើម។
ម្យ៉ាងទៀត នេះជាលើកទី១ ដែលក្រុមហ៊ុនបរទេសនឹងត្រូវអាជ្ញាធរចិនអនុញ្ញាតឲ្យចូលទៅវិនិយោគក្នុងផ្នែកត្រួតពិនិត្យហិរញ្ញវត្ថុ ឬ សំណង់ស្ថាបត្យកម្ម ដែលរហូតមក ត្រូវបិទរក្សាទុកសម្រាប់តែក្រុមហ៊ុនក្នុងស្រុក។
អ្នកជំនាញសេដ្ឋកិច្ចបានវាយតម្លៃថា ការណ៍ដែលទីក្រុងប៉េកាំងប្រកាសបន្ធូរបន្ថយគោលនយោបាយ សេដ្ឋកិច្ច ក៏ដើម្បី ចង់បើកចំហរទីផ្សារ ទាក់ទាញក្រុមវិនិយោគបរទេស ដែលបានធ្លាក់ថយចុះ នៅប្រទេសចិន។ ក្រសួងសេដ្ឋកិច្ចចិន នៅថ្ងៃចន្ទដើមសប្តាហ៍នេះបានបង្ហាញថា ចំនួនវិនិយោគបរទេស បានថយចុះ មកនៅ ១១៣ពាន់លានដុល្លារ នៅឆ្នាំនេះ គឺតិចជាងឆ្នាំមុន ដែលមានប្រមាណ ១៣៦ពាន់លានដុល្លារ។
ទឹកប្រាក់វិនិយោគបរទេសមិនមែនជាចលករសំខាន់ សម្រាប់ជំរុញ សេដ្ឋកិច្ចចិន។ ប៉ុន្តែ ចិនមហាអំណាចសេដ្ឋកិច្ចពិភពលោកលេខពីរ នៅតែត្រូវការទឹកប្រាក់វិនិយោគបរទេសដើម្បីទៅបំពេញចន្លោះខ្វះខាត ដែលបណ្តាលមកពីលំហូរមូលធន ទុន ចេញទៅបរទេស ហើយនិងការដោះដូរទុនបម្រុងបរទេសដែលបានធ្លាក់ចុះ ប្រមាណ ៨%ចាប់តាំងពីដើមឆ្នាំ ២០១៦នេះ។
សម្រាប់អ្នកវិភាគមួយចំនួន ទោះចិនបន្ធូរគោលនយោបាយដើម្បីទាក់ទាញអ្នកវិនិយោគបរទេស ចិននៅមានផ្លូវដើរវែងឆ្ងាយ។ សភាពាណិជ្ជកម្មអឺរ៉ុបធ្លាប់បានរិះគន់អាជ្ញាធរចិន ដែលមានចេតនា ដាក់កំហិត មិនឲ្យក្រុមហ៊ុនបរទេសអាចធ្វើជំនួញដោយស្មើភាព យុត្តិធម៌នៅក្នុងទឹកដីចិន។ ទៅតាមចំណាត់ថ្នាក់របស់ធនាគារពិភពលោក ស្តីពីបរិយាកាសធ្វើជំនួញ ចិន ស្ថិតនៅលេខ ៨៤ គឺក្រោយអារ៉ាប៊ី សាអូឌីត និងអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ