ជប៉ុនប្រមូលទូតនៅសេអ៊ូលចូលស្រុកវិញ ដើម្បីប្រឆាំងនឹងរូបសំណាកទាសករផ្លូវភេទ
ចុះផ្សាយនៅថ្ងៃ៖
ស្តាប់ - ០៥:៥៦
ភាពតានតឹងរវាងកូរ៉េខាងត្បូង និងជប៉ុន បានឡើងតានតឹងជាថ្មី នៅថ្ងៃសុក្រនេះ ដោយជប៉ុនបានប្រកាសហៅឯកអគ្គរដ្ឋទូតខ្លួនប្រចាំក្រុងសេអ៊ូលឱ្យត្រលប់មកស្រុកវិញ និងដោយប្រកាសផ្អាកកិច្ចចរចាពាណិជ្ជកម្មជាន់ខ្ពស់ទ្វេភាគីមួយចំនួនធំទៀត។ ជប៉ុនធ្វើបែបនេះ ដើម្បីសម្តែងការប្រឆាំង នឹងការដាក់តាំងរូបចម្លាក់ស្ត្រីកូរ៉េជាទាសករផ្លូវភេទរបស់ពួកទាហានជប៉ុនក្នុងសម័យសង្គ្រាមលោកលើកទីពីរ នៅមុខស្ថានកុងស៊ុលជប៉ុននាក្រុងប៊ូសាន់ ភាគខាងត្បូងប្រទេសកូរ៉េខាងត្បូង។
រូបសំណាកស្ត្រី ធ្វើអំពីសំរិទ្ធ អង្គុយ មានបក្សីមួយទំលើស្មា ជាចម្លាក់ដ៏ពេញនិយម នៅកូរ៉េខាងត្បូង និងមានដាក់តាំងនៅជាច្រើនកន្លែង ពេញផ្ទៃប្រទេស ប្រមាណជាង២០ រូបសំណាក និងជាង១០ នៅលើពិភពលោក ជាក់ស្តែងនៅអាមេរិកនិងនៅកាណាដា។
រូបសំណាកបែបនេះ ត្រូវបានសាងសង់ឡើងដើម្បីឧទ្ទិសដល់ស្ត្រីជាជនរងគ្រោះ ដែលទាហានជប៉ុនចាប់បង្ខំ យកទៅបំរើផ្លូវភេទ ក្នុងសម័យសង្គ្រាមលោកលើកទីពីរ។ បើតាមប្រវត្តិវិទូ គេរាប់ឃើញថា ក្នុងអំឡុងពីឆ្នាំ១៩១០-១៩៤៥ មានយុវតីរងគ្រោះ ប្រមាណ២០ម៉ឺននាក់ បានធ្លាក់ខ្លួនជាស្រីពេស្យា ជាទាសករផ្លូវភេទរបស់ទាហានអធិរាជ្យជប៉ុន។ ពួកគេ ភាគច្រើនជាស្ត្រីកូរ៉េខាងត្បូង និងក៏មានដែរចិន ឥណ្ឌូណេស៊ី ហ្វីលីពីន ព្រមទាំងស្ត្រីអាស៊ីនៅក្នុងតំបន់ជាច្រើននាក់ផ្សេងទៀត។
ផលវិបាកធ្ងន់ធ្ងរ
សំណុំរឿងទាសករផ្លូវភេទ ជាប្រភពបំពុលទំនាក់ទំនងការទូតរវាងជប៉ុននិងកូរ៉េខាងត្បូង តាំងពីរាប់ទសវត្សរ៍មកហើយ។ ហើយប្រទេសទាំងពីរទើបតែនឹងបានព្រមព្រៀងគ្នា ឈប់សើរើរឿងនេះកាលពី២០១៥។ ប៉ុន្តែ ភាពតានតឹងបានផ្ទុះឡើង បន្ទាប់ពីកូរ៉េខាងត្បូង បានសម្រេចដាក់តាំងឡើងវិញនូវរូបសំណាកស្ត្រីជាតំណាងទាសករផ្លូវភេទមួយ នៅមុខស្ថានកុងស៊ុលជប៉ុនប្រចាំក្រុងប៊ូសាន់ កាលពីថ្ងៃទី ២៨ធ្នូ។
ជាសារប្រឆាំង ជប៉ុនប្រកាសកោះហៅឯកអគ្គរដ្ឋទូតជប៉ុនប្រចាំក្រុងសេអ៊ូល និងកុងស៊ុលប្រចាំក្រុងប៊ូសាន់ ឱ្យត្រលប់ចូលស្រុកវិញ ជាបណ្តោះអាសន្ន ព្រមទាំងប្រកាសព្យួរការចរចាពាណិជ្ជកម្មជាន់ខ្ពស់និងការចរចាដោះប្តូររូបិយបណ្ណ ជាមួយកូរ៉េខាងត្បូង។ រដ្ឋាភិបាលជប៉ុន បានថែមទាំងសម្តែងការខកចិត្តយ៉ាងខ្លាំង និងទាមទារឱ្យកូរ៉េខាងត្បូង ដករូបសំណាកនេះចេញវិញ ព្រោះការសម្ពោធរូបសំណាកនេះប៉ះពាល់យ៉ាងខ្លាំងដល់កិច្ចព្រមព្រៀងជប៉ុន-កូរ៉េខាងត្បូង។ លោកនាយករដ្ឋមន្ត្រីជប៉ុន ស្ហ៊ីនហ្សូ អាបេ បានថែមទាំងពាំពាក្យទៅប្រាប់អនុប្រធានាធិបតីអាមេរិក ដែលបញ្ចេញប្រតិកម្មដូចគ្នាឱ្យមហាអំណាចនៅអាស៊ីទាំងពីរ គោរពកិច្ចព្រមព្រៀង ដើម្បីឱ្យសម្ព័ន្ធមិត្តទាំងពីររក្សាទំនាក់ទំនងទ្វេភាគីល្អ ទើបងាយទប់ទល់នឹងចិន និងកូរ៉េខាងជើង។
ទាសករផ្លូវភេទ និង យ៉ាស៊ូគូនី
សម្រាប់ សេអ៊ូល កូរ៉េខាងត្បូងមិនបានល្មើសលើកិច្ចព្រមព្រៀងទេ ! រូបសំណាកស្រ្តីទាសករផ្លូវភេទនេះ ជារូបចម្លងពីចម្លាក់ដែលកូរ៉េខាងត្បូងដាក់តាំងនៅមុខស្ថានទូតជប៉ុនប្រចាំទីក្រុងសេអ៊ូល។ រូបនេះពិតជាបានដកចេញម្តងហើយ តាំងពីមានកិច្ចព្រមព្រៀងនឹងគ្នាមក ប៉ុន្តែអាជ្ញាធរតំបន់ បានសម្រេចអនុញ្ញាតឱ្យក្រុមសកម្មជនយកទៅដាក់តាំង ជាថ្មីឡើងវិញ នៅថ្ងៃទី ២៨ធ្នូ ក៏ព្រោះតែទង្វើរបស់ជប៉ុនប៉ុណ្ណោះ។ កាលពីថ្ងៃទី ២៩ធ្នូ រដ្ឋមន្ត្រីក្រសួងការពារជាតិជប៉ុន បានធ្វើដំណើរទៅកាន់វិហារ យ៉ាស៊ូគូនី ដែលមានកប់សពឧក្រិដ្ឋជនសង្គ្រាមដែរ។ ដូច្នេះសម្រាប់ក្រសែភ្នែកកូរ៉េខាងត្បូង និងចិន ជាជនរងគ្រោះ ការធ្វើដំណើរទៅវិហារយ៉ាស៊ូគូនី គឺជាការផ្តល់កិត្តិយសដល់ឧក្រិដ្ឋជន ដែលជាទង្វើបង្កហេតុមិនអាចទ្រាំបានឡើយ។
ម្យ៉ាងវិញទៀត ថ្វីបើជប៉ុនបានស្នើសុំឱ្យមានការដករូបសំណាកនេះចេញ ក្រោយកិច្ចព្រមព្រៀងកាលពីចុងឆ្នាំ២០១៥មែន ប៉ុន្តែសេអ៊ូលបានត្រឹមទទួលយល់ព្រមសិក្សាអំពីលទ្ធភាពនៃការដករូបសំណាកប៉ុណ្ណោះ មិនបានសន្យាដកចេញទេ។ ហេតុដូច្នេះហើយបានជារដ្ឋាភិបាលកូរ៉េខាងត្បូង សោកស្តាយណាស់ចំពោះសេចក្តីសម្រេចចិត្តរបស់រដ្ឋាភិបាលតូក្យូថ្ងៃនេះ។ អ្នកនាំពាក្យរដ្ឋាភិបាលកូរ៉េខាងត្បូង បានអះអាងថារដ្ឋាភិបាលខ្លួន នៅតែបន្តអភិវឌ្ឍន៍ទំនាក់ទំនងទ្វេភាគីជប៉ុន-កូរ៉េខាងត្បូង ឱ្យល្អប្រសើរ និងប្រកបដោយទំនុកចិត្តនឹងគ្នារហូត។
កូរ៉េខាងត្បូង និងជប៉ុន បានចុះកិច្ចព្រមព្រៀង “បិទបញ្ចប់ទាំងស្រុង និងគ្មានត្រលប់ក្រោយ” សើរើសំណុំរឿងទាសភាពផ្លូវភេទ កាលពីឆ្នាំ២០១៥ បន្ទាប់ពីជប៉ុនបានធ្វើការសុំទោសដោយស្មោះត្រង់ និងបានបង្កើតមូលនិធិ ៨,៨លានអឺរ៉ូ ជាសំណងជំងឺចិត្ត សម្រាប់ជួយដល់ស្រ្តីរងគ្រោះដែលនៅមានជីវិត។ តាំងពីមានការចុះកិច្ចព្រមព្រៀងភ្លាម សកម្មជនកូរ៉េខាងត្បូង បានផ្លាស់វេនគ្នាទៅយាមកន្លែងសាងសងរូបសំណាកនោះ ដើម្បីការពារមិនឱ្យរដ្ឋាភិបាលដករូបសំណាកស្ត្រីទាសករផ្លូវភេទបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ