នាវាដឹកយន្តហោះចម្បាំងចិននៅក្បែរកោះតៃវ៉ាន់
ចុះផ្សាយនៅថ្ងៃ៖
ស្តាប់ - ០៦:៤៧
កោះតៃវ៉ាន់បានបញ្ជូនយន្តហោះចម្បាំង ហើយនិងកប៉ាល់ល្បាតរបស់ខ្លួន ទៅតាមដានមើលសកម្មភាពនាវាដឹកយន្តហោះចម្បាំងចិន ដែលក្រសួងការពារជាតិតៃវ៉ាន់បានចោទថា បានបើកឆ្លងចូលក្នុងតំបន់ការពារដែនអាកាសរបស់តៃវ៉ាន់ នៅព្រឹកថ្ងៃពុធ ទី ១១ មករា។ វត្តមានរបស់នាវាផ្ទុកយន្តហោះចម្បាំងរបស់ចិន ក្បែរកោះតៃវ៉ាន់ កើតមានឡើង នៅបន្ទាប់ពីចិនបរិហារថ្កោលទោសលោកស្រីប្រធានាធិបតីតៃវ៉ាន់ ត្សៃ អ៊ីងវេន ដែលបានជួបពិភាក្សាជាមួយ សមាជិកព្រឹទ្ធសភាអាមេរិក លោកថេត គ្រូស កាលពីថ្ងៃអាទិត្យ នៅរដ្ឋតិចសាស់។
អនុរដ្ឋមន្រ្តីការបរទេសចិន លីវ ចិនមីន បាននិយាយនៅថ្ងៃព្រហស្បតិ៍ថា វាជារឿងធម្មតា ដែលនាវាដឹកយន្តហោះចម្បាំងចិន បើកក្នុងសមុទ្រក្បែរកោះតៃវ៉ាន់ ដែលស្ថិតនៅ ក្នុងតំបន់ទឹកអន្តរជាតិ។
តាមក្រសួងការពារជាតិតៃវ៉ាន់ នាវាដឹកយន្តហោះចម្បាំងរបស់ចិន មិនបានបើកចូលក្នុងដែនទឹករបស់តៃវ៉ាន់ទេ នៅថ្ងៃពុធ ប៉ុន្តែវាបានស្ថិតនៅក្នុងតំបន់ការពារដែនអាកាសរបស់តៃវ៉ាន់។ នៅក្នុងសេចក្តីប្រកាសព័ត៌មានរបស់ខ្លួន ក្រសួងការពារជាតិតៃវ៉ាន់ បានអះអាងថា នាវាដឹកយន្តហោះចម្បាំងរបស់ចិន មិនបានបង្កគ្រោះថ្នាក់ គំរាមកំហែងដល់តៃវ៉ាន់នោះទេ។ ក្រសួងការពារជាតិតៃវ៉ាន់បានអំពាវនាវផងដែរពលរដ្ឋកុំឲ្យភ័យខ្លាច ចលាចល ដោយសារវត្តមាននាវាចម្បាំងរបស់ចិន នៅក្បែរកោះតៃវ៉ាន់។
នាវាដឹកយន្តហោះចម្បាំង “លាវនីង” ដែលចិនទិញបន្តពីសហភាពសូវៀត យកមកជួសជុលប្រើជាផ្លូវការនៅឆ្នាំ ២០១២ ធ្លាប់បានបើកឆ្លងកាត់សមុទ្រភាគខាងត្បូងកោះតៃវ៉ាន់ កាលពីខែធ្នូ នៅពេលត្រូវទៅចូលរួម ក្នុងសមយុទ្ធយោធារបស់ចិន នៅក្នុងមហាសមុទ្រប៉ាស៊ីហ្វិក។ រាល់លើក ចិនឧស្សាហ៍យកផ្លូវទឹក ដែលស្ថិតនៅចន្លោះចិន និងកោះតៃវ៉ាន់ មកធ្វើជាកន្លែងឆ្លងកាត់ ដើម្បីចេញទៅធ្វើសមយុទ្ធនៅសមុទ្រចិនខាងកើត ឬសមុទ្រចិនខាងត្បូងជាដើម។
តាមអ្នកជំនាញ នាវាដឹកយន្តហោះចម្បាំងចិន មានវត្តមាននៅប៉ែកខាងលិចតៃវ៉ាន់ គឺជារឿងធម្មតា ព្រោះវាត្រូវធ្វើដំណើរត្រឡប់ចូលទឹកដីចិន។ ប៉ុន្តែ បើនាវាចម្បាំងចិន មានវត្តមាននៅប៉ែកខាងកើតតៃវ៉ាន់ ទើបអាចជាគ្រោះថ្នាក់។ លើកនេះ នាវាដឹកយន្តហោះចម្បាំងរបស់ចិន មិនគ្រោះថ្នាក់ គំរាមកំហែងដល់សន្តិសុខរបស់តៃវ៉ាន់ ប៉ុន្តែ វាជាសញ្ញាដែលចិនចង់បញ្ជូនទៅថ្នាក់ដឹកនាំថ្មីរបស់តៃវ៉ាន់ ជាពិសេស លោកស្រីប្រធានាធិបតីត្សៃ អ៊ីងវេន ដែលចិនសង្ស័យថា កំពុងចង់រកកល ទាមទារឯករាជ្យឲ្យកោះតៃវ៉ាន់។
ម្យ៉ាងវិញទៀត ចិនបើកសំញ៉ែងនាវាដឹកយន្តហោះដ៏ធំរបស់ខ្លួន ដាក់កោះតៃវ៉ាន់ ក៏ព្រោះតែចិនចង់ធ្វើតេស្តសាកល្បង ចង់មើលប្រតិកម្មរបស់អាមេរិក ដែលនៅប៉ុន្មានថ្ងៃខាងមុខ នឹងមានប្រធានាធិបតីថ្មី ចូលមកដឹកនាំ គឺលោកដូណាល់ ត្រាំ។ ចិនចង់ដឹងថា តើលោកត្រាំ ដែលបានទទួលយកទូរស័ព្ទឆ្លើយឆ្លងជាមួយលោកស្រីប្រធានាធិបតីតៃវ៉ាន់ នឹងមានប្រតិកម្ម យ៉ាងណា នៅពេលនាវាចម្បាំងរបស់ចិន បើកទៅក្បែរតៃវ៉ាន់នោះ?
អាមេរិកធ្លាប់បានបញ្ជូននាវាដឹកយន្តហោះចម្បាំងរបស់ខ្លួន ឈ្មោះ Nimitzទៅកោះតៃវ៉ាន់ នៅឆ្នាំ ១៩៩៥ បន្ទាប់ពីមានភាពតានតឹង ក្រោយចិនធ្វើសមយុទ្ធ បាញ់មីស៊ីល នៅក្នុងសមុទ្រចិន។
លោកRex Tillerson៖អាមេរិកនៅតែជួយតៃវ៉ាន់ដូចមុន
នៅថ្ងៃពុធម្សិលមិញ Rex Tillerson ដែលលោកដូណាល់ត្រាំ បានជ្រើសរើសឲ្យធ្វើជារដ្ឋមន្រ្តីការបរទេសអាមេរិក បាននិយាយថា អាមេរិកនៅតែរក្សាជួយគាំទ្រតៃវ៉ាន់ដូចមុន។ នៅក្នុងសវនាការសួរដេញដោលរបស់គណៈកម្មការព្រឹទ្ធសភា កាលពីថ្ងៃពុធ អនាគតប្រមុខការបរទេសអាមេរិកបានអះអាងថា អាមេរិកនឹងនៅតែបន្តអនុវត្តកិច្ចព្រមព្រៀងចាស់ដែលបានចុះជាមួយតៃវ៉ាន់ កាលពីឆ្នាំ ១៩៨២។ ទៅតាមកិច្ចព្រមព្រៀង អាមេរិកយល់ព្រមលក់អាវុធឲ្យតៃវ៉ាន់ការពារខ្លួន ដោយគ្មានកំណត់ពេលបញ្ចប់។
អាមេរិកនៅតែគោរពគោលការណ៍ចិនតែមួយ
ចិនបញ្ជូននាវាដឹកយន្តហោះចូលទៅក្បែរតៃវ៉ាន់ នៅប៉ុន្មានថ្ងៃក្រោយទីក្រុងប៉េកាំងរិះគន់ ប្រធានាធិបតីតៃវ៉ាន់ លោកស្រីត្សៃ អ៊ីងវេន ដែលបានជួបសមាជិកព្រឹទ្ធសភាអាមេរិក លោកថេត គ្រូស នៅរដ្ឋតិចសាស់។ ទីក្រុងប៉េកាំងបានហៅជំនួបរវាងប្រមុខដឹកនាំតៃវ៉ាន់ជាមួយលោកថេត គ្រូស ថា ជាដើមហេតុអាចធ្វើឲ្យប៉ះពាល់ទំនាក់ទំនងចិន និងអាមេរិក។ ចិនធ្លាប់ឆេះដុំម្តងហើយ នៅពេលលោកស្រីប្រធានាធិបតីតៃវ៉ាន់ បាននិយាយទូរស័ព្ទជាមួយលោកដូណាល់ ត្រាំ នៅពេលលោកទើបជាប់ឆ្នោតថ្មី។ លោកដូណាល់ត្រាំ ដែលធ្លាប់និយាយថា លោកអាចមិនធ្វើដូចប្រធានាធិបតីអាមេរិកមុនៗ ក្នុងរឿងគោរពគោលការណ៍ចិនតែមួយ។
នៅឆ្នាំ ១៩៧៩ ដោយផ្លាស់ប្តូរជំហរ បានសុខចិត្តទទួលស្គាល់គោលការណ៍ចិនតែមួយ។ លោកដូណាល់ ត្រាំ ផ្ទាល់ធ្លាប់បាននិយាយថា លោកគ្មានហេតុផលអ្វីដែលត្រូវធ្វើតាមប្រធានាធិបតីមុន ដោយត្រូវគោរពគោលការណ៍ចិនតែមួយនោះទេ។ សំដីនេះបានធ្វើឲ្យចិនខឹងម្តងហើយ។ ចិន នៅមួយរយៈចុងក្រោយនេះ នៅមិនស្រណុកចិត្តទេ ជាពិសេស នៅក្រោយលោកស្រីប្រធានាធិបតីតៃវ៉ាន់ ត្សៃអ៊ីងវេន បដិសេធមមិនព្រមទទួលស្គាល់ថា តៃវ៉ាន់ជាដែនដីរបស់ចិន។ លើសពីនោះ លោកស្រីប្រធានាធិបតីតៃវ៉ាន់ នៅបានទាក់ទង ចងសម្ព័ន្ធជាមួយលោកត្រាំ ដែលមានគំនិតអវិជ្ជមានច្រើនជាមួយចិន។
ទីក្រុងប៉េកាំងសង្ស័យថា នៅក្នុងពេលចុះចតក្នុងទឹកដីអាមេរិក បន្ទាប់ពីដំណើរទស្សនកិច្ចនៅបណ្តាប្រទេសអាមេរិកកណ្តាល នៅថ្ងៃទី ១៣ និង១៤មករា លោកស្រីប្រធានាធិបតីតៃវ៉ាន់រៀបគំរោងចង់ជួបក្រុមការងាររបស់លោកដូណាល់ ត្រាំ។
លោកស្រីប្រធានាធិបតីតៃវ៉ាន់សង្ឃឹមទាក់ទាញចំណាប់អារម្មណ៍របស់ប្រធានាធិបតីថ្មីអាមេរិក។ លោកដូណាល់ ត្រាំ អាចមាត់ឆៅ និយាយដើម្បីកម្លាចិន ដើម្បីផលប្រយោជន៍ប្រជាប្រិយភាពរបស់ខ្លួន។ ប៉ុន្តែ នៅក្នុងការអនុវត្តជាក់ស្តែង អាមេរិកមិនអាចលាដៃចាប់តៃវ៉ាន់ ដោយបែរខ្នងដាក់ចិន ដែលជាមហាអំណាចនោះទេ។ អនាគតប្រមុខការបរទេសអាមេរិក លោកTillerson កាលពីថ្ងៃពុធ បានបញ្ជាក់ថា លោកមិនដែលបានលឺពាក្យថា អាមេរិកលែងចង់គោរពគោលការណ៍ចិនតែមួយនោះទេ។ នេះមានន័យថា ទំនាក់ទំនងអាមេរិក ជាមួយតៃវ៉ាន់ និងទំនាក់ទំនងអាមេរិកជាមួយចិន គឺនៅតែដដែល។អាមេរិកនៅតែចង់ រក្សាទំនាក់ទំនងល្អជាមួយចិន ដើម្បីប្រយោជន៍សេដ្ឋកិច្ច ពោលគឺមិនចង់ប្រឈមមុខនឹងចិន ដោយយកតៃវ៉ាន់ មកឱបក្នុងទ្រូងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ