អូស្រ្តាលី-ជប៉ុន៖កិច្ចព្រមព្រៀងដោះដូរសេរីអន្តរប៉ាស៊ីហ្វិកមិនទាន់ស្លាប់ទេ
បន្ទាប់ពីប្រទេសហ្វីលីពីន លោកនាយករដ្ឋមន្រ្តីជប៉ុនស្ហ៊ីនហ្សូ អាបេកំពុងបំពេញទស្សនកិច្ចនៅក្នុងប្រទេសអូស្រ្តាលី។ លោកស្ហ៊ីហ្សូ អាបេ និងសមភាគីអូស្រា្តលីម៉ាល់ខូម ថឺនប៊ុលបានលើកយកប្រធានបទសំខាន់ៗជាច្រើនទៅជជែកនាឱកាសជំនួបទ្វេភាគីក្នុងទីក្រុង Sydney នាថ្ងៃសៅរ៍ ទី១៤ មករានេះ។ ទាក់ទងនឹងកិច្ចព្រមព្រៀងដោះដូរសេរីអន្តរប៉ាស៊ីហ្វិកត្រូវបានឥស្សរជនទាំងពីរបានយល់ឃើញដូចគ្នាថា មិនទាន់ស្លាប់ទេ និងបានអំពាវនាវឲ្យលោកប្រធានាធិបតីអាមេរិកជាប់ឆ្នោតថ្មីដូណាល់ ត្រាំរួសរាន់ឲ្យសច្ចាប័ន្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោកប្រមុខរដ្ឋាភិបាលជប៉ុនអាបេ និងសមភាគីអូស្រា្តលីថឺនប៊ុលបានបញ្ជាក់យ៉ាងច្បាស់ពីក្តីសង្ឃឹមរបស់ខ្លួនដែលចង់ឃើញឲ្យមានការអនុវត្តន៍នាពេលឆាប់ៗនូវកិច្ចព្រមព្រៀងដោះដូរសេរីអន្តរប៉ាស៊ីហ្វិក TPP ដែលបានចុះហត្ថលេខាដោយប្រទេសសមាជិកចំនួន ១២ កាលពីមួយឆ្នាំមុន។ លោកអាបេ និងលោកថឺនប៊ុលបានយល់ឃើញដូចគ្នាថា TPP មិនទាន់ស្លាប់ទេ និងថា TPP មានសក្តានុពលសេដ្ឋកិច្ចធំធេងខ្លាំងណាស់សម្រាប់ប្រទេសសមាជិក និងនៅក្នុងតំបន់ប៉ាស៊ីហ្វិកទាំងមូល។
ចំណាប់អារម្មណ៍លាយឡំនឹងក្តីបារម្ភលើ TPP របស់លោកអាបេ និងលោកថឺនប៊ុលពេលនេះបានធ្វើ ចំពេលដែលលោកប្រធានាធិបតីអាមេរិកថ្មីដូណាល់ ត្រាំមានបំណងសើរើឡើងវិញនូវរាល់កិច្ចព្រមព្រៀងសេដ្ឋកិច្ចជាលក្ខណៈទ្វេភាគី ឬពហុភាគីដែលអាមេរិកបានចុះហត្ថលេខា។ លោកត្រាំបានបញ្ជាក់ថា លោកគាំទ្រលើកិច្ចព្រមពៀង តែមានកិច្ចព្រមពៀងខ្លះមិនបានផ្តល់ផលចំណេញឲ្យអាមេរិកទេ តែបានធ្វើឲ្យអាមេរិកខាតបង់ និងផ្តល់ផលចំណេញឲ្យអ្នកផ្សេង។ ខុសពីលោកត្រាំ លោកប្រធានាធិបតីអាមេរិកអូបាម៉ាដែលនឹងអស់អាណត្តិនៅថ្ងៃទី២០ មករាបានចេញមុខការពារ TPP ដោយលោកយល់ថា កិច្ចព្រមព្រៀងពាណិជ្ជកម្មមួយដើម្បីប្រឈមទប់នឹងមហិច្ឆិតាសេដ្ឋកិច្ចរបស់ចិននៅក្នុងតំបន់។
ក្រៅពីបន្តឲ្យតម្លៃខ្លាំងលើ TPP លោកអាបេ និងលោកថឺនប៊ុលក៏បានឯកភាពគ្នាក្នុងការបន្តកិច្ចសហប្រតិបត្តិលើវិស័យការពាររវាងជប៉ុន និងអូស្រ្តាលីដែរ។ ទាក់ទងនឹងជម្លោះនៅក្នុងតំបន់ លោកអាបេ និងលោកថឺនប៊ុលបានថ្កោលទោសលើកូរ៉េខាងជើងពីការដែលរបបកុម្មុយនិស្តព្យុងយ៉ាងបន្តការសាកល្បងនុយក្លេអ៊ែរ និងគ្រាប់មីស៊ីល។ ចុងក្រោយ លោកអាបេ និងលោកថឺនប៊ុលបានសម្តែងក្តីបារម្ភចំពោះស្ថានការណ៍នៅក្នុងសមុទ្រខាងត្បូងដោយបានស្នើឲ្យមានភាពអត់ធ្មត់ពីគ្រប់ភាគីជម្លោះ។ បន្ទាប់ពីអូស្រា្តលី លោកអាបេនឹងបន្តទស្សនកិច្ចនៅក្នុងប្រទេសឥណ្ឌូណេស៊ី និងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ