តើសង្រ្គាមពាណិជ្ជកម្ម ចិន អាមេរិកនឹងអាចផ្ទុះឡើងដែរឬទេ?
តើចិនជាសត្រូវរបស់អាមេរិក? ទំនាក់ទំនងចិន និងអាមេរិកដែលស្គាល់រកាំរកូសគ្នារួចហើយ នៅក្នុងអាណត្តិដឹកនាំរបស់លោកអូបាម៉ា ទំនងនឹងមិនប្រសើរឡើងដោយ នៅក្នុងអាណត្តិរបស់លោក លោកដូណាល់ ត្រាំ ដែលបានស្បថចូលកាន់តំណែងជាប្រធានាធិបតីថ្មីរបស់អាមេរិក កាលពីថ្ងៃសុក្រម្សិលមិញ។ នៅមុនជាប់ឆ្នោត លោកដូណាល់ ត្រាំធ្លាប់បានសន្យាហើយថា នឹងដាក់ប្រទេសចិន ក្នុងបញ្ជីស្បែកខ្មៅរបស់ប្រទេសដែលធ្វើជំនួញមិនស្មោះត្រង់ ដោយទម្លាក់តម្លៃលុយយ័ន ដើម្បីជំរុញការនាំចេញផលិតផលចិនទៅបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ប៉េកាំងតាមដានជាប់ជានិច្ច ពិធីស្បថចូលកាន់តំណែងប្រធានាធិបតីរបស់លោកដូណាល់ ត្រាំ។ រដ្ឋាភិបាលចិនចង់ដឹងថា តើនៅពេលក្លាយជាប្រធានាធិបតីអាមេរិកពេញផ្លូវច្បាប់ហើយនោះ លោកដូណាល់ ត្រាំ នឹងចាត់វិធានការអនុវត្តគោលនយោបាយប្រឆាំងចិន ដូចដែលលោកធ្លាប់បានលើកឡើង ទាំងនៅពេលថ្មីៗនេះ និងនៅក្នុងពេលឃោសនារកសំឡេងឆ្នោតដែរឬទេ។
នៅក្នុងពេលឃោសនារកសំឡេងឆ្នោត បេក្ខជន ដូណាល់ ត្រាំបានចង្អុលចោទប្រកាន់ ចិនថា ជាអ្នកលួចការងារប្រជាជនអាមេរិកាំង និងលួចលុយអាមេរិក។ សម្រាប់លោកត្រាំ ចិនបានធ្វើជំនួញមិនស្មោះត្រង់ ដោយបានទម្លាក់លុយយ័ន រហូតធ្វើឲ្យក្រុមហ៊ុនអាមេរិកាំងរងគ្រោះមិនអាចប្រកួតប្រជែងជាមួយក្រុមហ៊ុនចិនបាន។ នៅក្នុងកាសែតអាមេរិកាំង Newyork Timesលោកដូណាល់ ត្រាំធ្លាប់បាននិយាយថា លោកនឹងដំឡើងពន្ធដល់៤៥%លើរាល់ផលិតផលនាំចូលមកពីចិន។ ក្នុងក្រុមការងាររបស់លោកដូណាល់ ត្រាំ លោកPeter Navarro ទីប្រឹក្សាផ្នែកពាណិជ្ជកម្មរបស់លោកដូណាល់ ត្រាំ ធ្លាប់បានអំពាវនាវឲ្យគេឈប់ទិញផលិតផលចិន។ ការសិក្សាថ្មីៗនេះបានបង្ហាញថា អាមេរិកបានបាត់បង់ការងារប្រមាណ២លាន ចាប់តាំងពីចិនបានចូលជាសមាជិករបស់អង្គការពាណិជ្ជកម្មមពិភពលោក ឆ្នាំ ២០០១។
កាសែតចិនGlobal Times ដែលជាឧបករណ៍ឃោសនារបស់បក្សកុម្មុយនិស្តធ្លាប់បានសរសេរថា ប្រទេសចិននឹងវាយបកវិញ បើសិនលោកដូណាល់ ត្រាំធ្វើសង្រ្កាមពាណិជ្ជកម្មប្រឆាំងចិន។ ចិន មានមធ្យោបាយដាក់គំនាបលើអាមេរិក ព្រោះថា ចិនជាប្រទេសទី១ ដែលមានកាន់ក្នុងដៃ ប្រាក់បំណុលអាមេរិកច្រើនជាងគេ គឺ១០០០ពាន់ លានដុល្លារអាមេរិក។ តាមកាសែត Global Times ចិនអាចគំរាមសងសឹកអាមេរិកវិញ ដោយនឹងផ្អាកព្យួរការបញ្ជារទិញយន្តហោះរបស់ក្រុមហ៊ុនប៊ូអ៊ីងអាមេរិក។ តើអ្នកណាខាត ហើយអ្នកណានឹងចំណេញពីសង្រ្គាមពាណិជ្ជកម្ម? ប្រធានាធិបតីចិនលោកស៊ី ជីនពីងបាននិយាយនៅក្នុងវេទិការសេដ្ឋកិច្ច នៅដាវ៉ូសប្រទេសស្វ៊ីសថា គ្មានភាគីណាឈ្នះដាច់ នៅក្នុងសង្រ្គាមពានីជ្ជកម្មនោះទេ។
ប៉ុន្តែ សម្រាប់អ្នកសេដ្ឋកិច្ចមួយចំនួន ចិនដែលមានផលិតផលពឹងអាស្រ័យលើទីផ្សារអាមេរិកអាចរងគ្រោះភ្លាមដោយសារនយោបាយដំឡើងពន្ធអាកររបស់លោកដូណាល់ ត្រាំ។ ត្រូវដឹងថា ផលិតផលចិន នាំចូលទៅអាមេរិក នៅឆ្នាំ ២០១៦មានតម្លៃដល់ទៅ ៣៨៥ពាន់លានដុល្លារ។ បើសិនអាមេរិកដែលជាទីផ្សារធំបំផុតរបស់ចិន រឹតបន្តឹង ដោយនឹងដំឡើងតម្លៃពន្ធដល់៤៥ភាគរយលើផលិតផលនាំចូលមកពីចិន នោះផលិតផលចិននាំចូលទៅអាមេរិកនឹងធ្លាក់ចុះពីរដង ឬច្រើនជាងនេះក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ