ភូមា៖មេធាវីកាន់សាសនាអ៊ីស្លាមម្នាក់ស្និទ្ធនឹងគណបក្សលោកស្រីអ៊ុង សានស៊ូជីត្រូវគេបាញ់សម្លាប់
នៅក្នុងប្រទេសភូមា លោកកូ នី មេធាវីល្បីឈ្មោះម្នាក់កាន់សាសនាអ៊ីស្លាមត្រូវបានបុរសខ្មាន់កំាភ្លើងបាញ់សម្លាប់នៅព្រលានយន្តហោះក្រុងរ៉ង់ហ្គូនកាលពីយប់ថ្ងៃអាទិត្យ ទី២៩ មករា។ លោកកូ នីជាទីប្រឹក្សាច្បាប់ឲ្យគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជី និងជាមេធារីម្នាក់ដែលគ្មានការរើសអើងក្នុងផ្នែកសាសនា។ តែអង្គការក្រៅរដ្ឋាភិបាលជាច្រើនគិតថា ឃាតកម្មលើលោកកូ នីជាឃាតកម្មនយោបាយ និងស្នើឲ្យមានការស៊ើបអង្កេតឯករាជ្យមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
លោកមេធាវីកូ នីត្រូវបានបុរសខ្មាន់កាំភ្លើងម្នាក់បាញ់សម្លាញ់នៅខាងក្រៅព្រលានយន្តហោះក្រុងរ៉ង់ហ្គូនក្នុងពេលដែលលោកកំពុងតៀមឡើងឡានតាក់ស៊ីទៅផ្ទះ។ ក្រៅពីបាញ់សម្លាប់លោក កូ នី រូបបុរសខ្មាន់កាំភ្លើងដដែលក៏បានបាញ់សម្លាញ់បុរសអ្នកបើកតាក់ស៊ី មុននឹងត្រូវកម្លាំងប៉ូលិសក្របួច ក ជាប់។ អ្នកនាំពាក្យប្រធានាធិបតីភូមាបានប្រាប់ AFP នៅថ្ងៃចន្ទ ទី៣០ មករានេះថា លោកកូ នីទើបត្រឡប់ពីបេសកកម្មជាមួយគណៈប្រតិភូរដ្ឋាភិបាលនៅបរទេស។ ពិធីបុណ្យសពលោកកូ នីបានរៀបចំធ្វើនៅគេហដ្ឋានរបស់លោកក្នុងថ្ងៃចន្ទ ទី៣០ មករានេះដោយមានមនុស្សជិតឆ្ងាយចូលរួមយ៉ាងច្រើនកុះករ។
សូមជម្រាបជូនថាមានអាយុ ៦៣ឆ្នាំ មេធាវីកូ នីអ្នកកាន់សាសនាអ៊ីស្លាមជាសមាជិកម្នាក់ល្បីឈ្មោះនៅក្នុងសហគមន៍អ្នកកាន់សាសនាអ៊ីស្លាម។ លោកកូ នីជាមេធាវីបម្រើការនៅតុលាការកំពូល ជាមេធាវីរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជី និងក៏ជាទីប្រឹក្សាច្បាប់របស់លោកស្រីអ៊ុង សានស៊ូជីដែរ។ ក្នុងឆ្នាំ ១៩៩៥ លោកកូ នីបានបង្កើតការិយាល័យមេធាវីជាមួយមិត្តរួមការងារចំនួន ២នាក់ផ្សេងទៀត និងបានទទួលការងារជាង ៩០០សំណុំរឿងព្រហ្មទ័ណ្ឌ និងជាង ១ ៤០០សំណុំរឿងស៊ីវិល។
នៅក្នុងសេចក្តីប្រកាសព័ត៌មានមួយ គណបក្សសម្ព័ន្ធជាតិដើម្បីលទ្ធិប្រជាធិបតេយ្យបានថ្កោលទោសលើឃាតកម្មសម្លាប់លោកកូ នីដោយបានចាត់ទុកជាទង្វើភេរវកម្មប្រឆាំងនឹងនយោបាយរបស់គណបក្ស។ សេចក្តីប្រកាសព័ត៌មានដដែលបានបន្ថែម ការបាត់បង់លោកកូ នីជាការបាត់បង់មួយធំធេងណាស់សម្រាប់លោកស្រីអ៊ុង សានស៊ូជី និងគណបក្សសម្ព័ន្ធជាតិដើម្បីលទ្ធិប្រជាធិបតេយ្យដែលលោកកូ នីបានគាំទ្រគ្រប់ពេលវេលា។ គួរបញ្ជាក់ថា លោកកូ នីជាអ្នកកាន់សាសនាអ៊ីស្លាមមែន តែលោកតែងមានជំហរអធ្យាស្រ័យ និងគ្មានការរើសអើងក្នុងរឿងសាសនាទេ។
យ៉ាងណាក៏ដោយ ឃាតកម្មសម្លាប់លោកកូ នីពេលនេះបានធ្វើឡើង ចំពេលដែលភាពតានតឹងរវាងសហគមន៍សាសនាអ៊ីស្លាម និងសហគមន៍សាសនាព្រះពុទ្ធកំពុងបន្តមានយ៉ាងក្តៅគគុកក្នុងប្រទេសភូមា។ ក្រុមអង្គការក្រៅរដ្ឋាភិបាលបានបរិហារលើទង្វើគួរឲ្យស្អប់ខ្ពើម និងគិតថា ឃាតកម្មសម្លាប់លោកកូ នីមានលក្ខណៈនយោបាយ ព្រមទាំងស្នើឲ្យរដ្ឋាភិបាលបើកការស៊ើបអង្កេតបន្ទាន់មួយដើម្បីស្វែងរកការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ