អង្គការសហប្រជាជាតិថ្កោលទោសជាឯកច្ឆ័ន្ទកូរ៉េខាងជើង តែចង្អុលមុខចិន
ក្រុមប្រឹក្សាសន្តិសុខអង្គការសហប្រជាជាតិ ដែលបានជួបប្រជុំគ្នាជាបន្ទាន់ នៅយប់ថ្ងៃចន្ទ ទី ១៣ កុម្ភៈ តាមសំណើរបស់អាមេរិក ជប៉ុននិងកូរ៉េខាងត្បូង បានសម្រេចជាឯកច្ឆ័ន្ទ ថ្កោលទោសការបាញ់សាកល្បងមីស៊ីលរបស់កូរ៉េខាងជើង និងបានស្នើសុំឱ្យសមាជិកក្រុមប្រឹក្សាទាំងអស់ បង្កើនកិច្ចខិតខំប្រឹងប្រែងអនុវត្តទណ្ឌកម្មលើព្យុងយ៉ាង។ នេះទំនងជាសារដែលក្រុមប្រឹក្សា ចង់កើនរំលឹកចិន សម្ព័ន្ធមិត្តជាប្រពៃណីតែមួយគត់របស់ព្យុងយ៉ាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
គ្មានអ្វីសង្ស័យទេ នៅលើកនេះ សមាជិកក្រុមប្រឹក្សាសន្តិសុខអង្គការសហប្រជាជាតិ ទាំងអស់ រាប់ទាំងចិន រុស្ស៊ីផង បានមូលមតិគ្នាជាឯកច្ឆ័ន្ទ ចេញសេចក្តីថ្លែងការណ៍ ថ្កោលទោសរបបព្យុងយ៉ាងដែលបានបាញ់សាកល្បងមីស៊ីលជាថ្មី កាលពីថ្ងៃអាទិត្យទី ១២កុម្ភៈ។ ប៉ុន្តែក្រុមប្រឹក្សាកំពុងចោទសួរថាតើទណ្ឌកម្មដែលបានសម្រេចដាក់លើកូរ៉េខាងជើង តាំងពីឆ្នាំ២០០៦មក អនុវត្តបានត្រឹមត្រូវដែរឬទេ ?!
ពេលនេះ គ្រប់ចក្ខុកំពុងសំឡឹងទៅមើលចិន ក្រោយកិច្ចប្រជុំភ្លាម តំណាងទូតអាមេរិក បានសេចក្តីថ្លែងការវាយប្រហារខ្លាំងៗ ថាដល់ពេលដែលត្រូវតម្រង់កូរ៉េខាងជើង! មិនមែនត្រឹមជាពាក្យទេ តែត្រូវធ្វើ ! ដើម្បីប្រាប់ ព្យុងយ៉ាងនិងអ្នកគាំទ្រថាមិនអាចសាកល្បងមីស៊ីលបានទៀតទេ។
ប៉េកាំងសម្ព័ន្ធមិត្តនិងដៃគូពាណិជ្ជកម្មរបស់ព្យុងយ៉ាងតែមួយគត់ មានបន្ទាត់នយោបាយផ្លូវការ ថ្កោលទោសការបាញ់មីស៊ីល ប៉ុន្តែមិនចង់ឱ្យស្ថានការណ៍ក្នុងឧបទ្វីបធ្លាក់ដុនដាបទេ។ របាយការណ៍វាយតម្លៃការអនុវត្តទណ្ឌកម្មលើកូរ៉េខាងជើង នឹងចេញនៅពេលឆាប់ៗនេះ។ ហើយពេលនោះ គេនឹងបានដឹងច្បាស់ថាតើចិនអនុវត្តទណ្ឌកម្មលើរបបព្យុងយ៉ាងប៉ុណ្ណា។
ជប៉ុនបានអបអរសេចក្តីសម្រេចរបស់ក្រុមប្រឹក្សា តែសង្ឃឹមជានិច្ចលើឥរិយាបថរបស់អាមេរិកចំពោះព្យុងយ៉ាង។ ហេតុដូច្នេះហើយបានជា តាំងពីមុននិងក្រៅជំនួបប្រជុំក្រុមប្រឹក្សា លោកប្រធានាធិបតីអាមេរិក ដូណាល់ ត្រាំ បានប្រកាសសន្យា ជាមុនទៅហើយ ថា នឹងបកលើកូរ៉េខាងជើងឱ្យចាស់ដៃតែម្តង ដែលព្រហើនហ៊ានធ្វើការសាកល្បងមីស៊ីលទៀត។
វ៉ាស៊ីនតោន ក៏បានធានារ៉ាប់រងដែរថាអាមេរិក ជប៉ុនកូរ៉េខាងត្បូង មានមធ្យោបាយគ្រប់គ្រាន់ ក្នុងការចាប់មីស៊ីលកូរ៉េខាងជើង ប្រសិនបើមានការបាញ់ទៀត។ ប្រព័ន្ធខែលមីស៊ីលអាមេរិកនឹងត្រូវដាក់ពង្រាយ នៅកូរ៉េខាងត្បូង នៅក្នុងអំឡុងពេលសមយុទ្ធប្រចាំឆ្នាំអាមេរិកកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ