លោកប្រមុខរដ្ឋាភិបាលបារាំងស្នើឲ្យចិនបើកទីផ្សារបន្ថែមសម្រាប់ផលិតផលបារាំង
នៅថ្ងៃអង្គារ ទី២១ កុម្ភៈនេះ លោកនាយករដ្ឋមន្រ្តីបារាំង Bernard Cazeneuve បានផ្តើមទស្សនកិច្ចផ្លូវការរយៈពេល ៣ថ្ងៃនៅក្នុងប្រទេសចិន។ ថ្លែងក្នុងថ្ងៃទី១ នៃទស្សនកិច្ចថ្ងៃនេះ លោក Cazeneuve បានស្នើចិនឲ្យបើកទីផ្សារបន្ថែមទៀតសម្រាប់ផលិតផលបារាំង និងអឺរ៉ុប។ ទន្ទឹមគ្នានេះ លោក Cazeneuve បានបរិហារលើនយោបាយការពារប្រយោជន៍សេដ្ឋកិច្ចផ្ទាល់ខ្លួន និងបញ្ជាក់ពីអត្ថប្រយោជន៍របស់សកលភាវូបនីយកម្ម។
ចុះផ្សាយនៅថ្ងៃ៖
នៅក្នុងថ្ងៃទី១ នៃទស្សនកិច្ច លោក Cazeneuve បានថ្លែងនៅចំពោះមុខវត្តមានសិស្សនិស្សិតចិនប្រមាណជា ៣០០នាក់នៅក្នុងសាកលវិទ្យាល័យ Beida ក្នុងទីក្រុងប៉េកាំង។ នាឱកាសនោះ លោក Cazeneuve បានថ្លែងការពារអត្ថប្រយោជន៍សកលភាវូបនីយកម្ម និងតម្រូវការឲ្យមានសមភាពនៃការដោះដូរពាណិជ្ជកម្មដោយសេរីជាមួយចិន។ លោក Cazeneuve បានអះអាងថា បើគេមិនចង់ឃើញនយោបាយការពារប្រយោជន៍ផ្ទាល់ខ្លួនឆ្លងរាលដាលនៅទូទាំងពិភពលោកទេ ប្រទេសមហាអំណាចដូចយ៉ាងបារាំងត្រូវតែចេះកសាងទំនាក់ទំនងពាណិជ្ជកម្មស្មើភាពជាមួយប្រទេសផ្សេង។
លោក Cazeneuve បានបន្ថែមថា សកលភាវូបនីយកម្មបានហុចប្រយោជន៍ដល់យើងច្រើនជាផលវិបាក និងថា គេត្រូវតែហ៊ានទទួលស្គាល់ការពិត។ នៅក្នុងន័យនេះ លោក Cazeneuve បានបញ្ជាក់ថា បារាំងទទួលស្វាគមន៍ចំពោះអ្នកវិនិយោគចិន អ្នកទេសចរណ៍ចិន និងនិស្សិតចិន។ សូមជម្រាបជូនថា សហភាពអឺរ៉ុបជាដៃគូពាណិជ្ជកម្មទី១ របស់មហាយ័ក្សចិន បន្តដោយសហរដ្ឋអាមេរិក។ តែតាំងពីលោកដូណាល់ ត្រាំក្លាយជាប្រធានាធិបតីអាមេរិកមក ចិនកំពុងបារម្ភពីនយោបាយការពារប្រយោជន៍ផ្ទាល់ខ្លួនរបស់លោកដូណាល់ ត្រាំដែលធ្លាប់បាននិយាយវាយប្រហារសំដៅទំនិញចិនក្នុងសម័យឃោសនាបោះឆ្នោត។
តាមមន្រ្តីការទូតឲ្យដឹងថា ចិនបានប្រើយុទ្ធសាស្រ្តថ្មីទប់នឹងហានិភ័យជាយថាហេតុរបស់អាមេរិកដោយងាកទៅពង្រឹងកិច្ចសហប្រតិបត្តិការសេដ្ឋកិច្ចជាមួយអឺរ៉ុបវិញ។ ទាក់ទងនឹងដំណើរកំសាន្តរបស់អ្នកទេសចរណ៍ចិនក្នុងប្រទេសបារាំង លោក Cazeneuve បាននិយាយធានាថា រដ្ឋាភិបាលបានចាត់វិធានការគ្រប់បែបយ៉ាងដើម្បីទទួល និងធានាសន្តិសុខចំពោះការដំណើរកំសាន្ត និងការស្នាក់នៅ។ បន្ទាប់ពីទទួលជួបដោយសមភាគីចិនលោកលី ខឺជាំងនាថ្ងៃអង្គារ ទី២១ កុម្ភៈ លោក Cazeneuve នឹងទទួលជួបដោយលោកប្រធានាធិបតីចិនស៊ី ជីនពីងនៅថ្ងៃពុធ ទី២២ កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ