អាមេរិក៖ចិនជិតបញ្ចប់ការសាងសង់កន្លែងដាក់តាំងគ្រាប់មីស៊ីលនៅ Spratleys
នៅសហរដ្ឋអាមេរិក អ្នកទទួលខុសត្រូវអាមេរិកពីររូបដែលមិនបញ្ចេញឈ្មោះបាននិយាយប្រាប់ទីភ្នាក់ងារព័ត៌មាន Reuters ថា ចិនកំពុងបញ្ចប់ការសាងសង់ទីកន្លែងដាក់តម្កល់គ្រាប់មីស៊ីលបាញ់ចម្ងាយឆ្ងាយនៅលើកោះសិប្បនិម្មិតដែលចិនបានកសាងនៅក្នុងសមុទ្រចិនខាងត្បូងម្តុំទីប្រជុំកោះ Spratleys។ ព័ត៌មានមួយនេះបានលេចមក ចំពេលដែលក្រសួងការបរទេសអាមេរិកបានប្រាប់ឲ្យដឹងពីកិច្ចសន្ទនារវាងលោករដ្ឋមន្រ្តីការបរទេសអាមេរិក Rex Tillerson និងមន្រ្តីការទូតជាន់ខ្ពស់ចិនម្នាក់កាលពីថ្ងៃអង្គារ ទី២១ កុម្ភៈ។
ចុះផ្សាយនៅថ្ងៃ៖
ស្តាប់ - ០១:៥៩
មានទីតាំងសម្រាប់តម្កល់គ្រាប់មីស៊ីលជាង២០កន្លែងដែលចិនបានសាងសង់នៅលើកោះសិប្បនិម្មិតស្ថិតក្នុងតំបន់ទីប្រជុំកោះស្ព្រែតលីនៅសមុទ្រចិនខាងត្បូង នេះបើតាមការអះអាងរបស់អ្នកទទួលខុសត្រូវអាមេរិកពីររូបមិនបញ្ចេញឈ្មោះ។ នេះជាព្រឹត្តិការណ៍ថ្មីមួយទៀតដែលក្រុមអ្នកសង្កេតការណ៍កំពុងរង់ចាំមើលប្រតិកម្មផ្លូវការពីរដ្ឋបាលអាមេរិករបស់លោកដូណាល់ ត្រាំ។ លោកត្រាំដែលធ្លាប់បានបង្ហាញជំហរម៉ឹងម៉ាត់ទល់នឹងចិនទាក់ទងនឹងសំណុំរឿងនៅសមុទ្រចិនខាងត្បូង។
សំណុំរឿងនៅសមុទ្រចិនខាងត្បូងដែលចិនកំពុងមានជម្លោះប្រទាញប្រទង់គ្នាជាមួយនឹងប្រទេសអាស៊ីមួយចំនួន ពិសេសប្រទេសសមាជិកអាស៊ាន គឺហ្វីលីពីន ព្រុយណេ ម៉ាឡេស៊ី និងប្រទេសវៀតណាម។ អ៊ីចឹងហើយបានជានាឱកាសកិច្ចប្រជុំថ្នាក់រដ្ឋមន្រ្តីការបរទេសអាស៊ាននៅហ្វីលីពីន លោកប្រមុខការទូតហ្វីលីពីនបានថ្លែងសង្ឃឹមថា លោកដូណាល់ ត្រាំនឹងបង្ហាញនាពេលឆាប់ៗខាងមុខនូវគោលនយោបាយអាមេរិកពិតប្រាកដចំពោះតំបន់ ពិសេសទល់នឹងចិន។
ដោយឡែក ក្រសួងការបរទេសអាមេរិកបានប្រាប់ឲ្យដឹងពីកិច្ចសន្ទនារវាងលោកប្រមុខការទូតអាមេរិក Rex Tillerson និងមន្រ្តីការទូតជាន់ខ្ពស់ចិនកាលពីថ្ងៃអង្គារ ទី២១ កុម្ភៈ។ នៅក្នុងកិច្ចសន្ទនានោះ លោក Tillerson បានបញ្ជាក់ពីសារៈសំខាន់នៃទំនាក់ទំនងបង្កប់ដោយសា្មរតីស្ថាបនារវាងចិន និងអាមេរិក។ សូមជម្រាបជូនថា លោកប្រធានាធិបតីអាមេរិកដូណាល់ ត្រាំបានចាត់ទុកការកសាងកោះសិប្បនិម្មិតរបស់ចិននៅសមុទ្រចិនខាងត្បូងថាជារឿងខុសច្បាប់។ ថ្មីៗកន្លងទៅនេះ អ្នកនាំពាក្យក្រសួងការពារជាតិអាមេរិកបានថ្លែងថា អាមេរិកបន្តរក្សាជំហរគ្មានយោធានៅក្នុងសមុទ្រចិនខាងត្បូង និងបានជំរុញឲ្យគ្រប់ភាគីពាក់ព័ន្ធគោរពច្បាប់អន្តរជាតិ។
រដ្ឋាភិបាលចិននៅមិនទាន់បានបញ្ចេញប្រតិកម្មអ្វីទេទាក់ទងនឹងព័ត៌មាននេះ ហើយឯកអគ្គរដ្ឋទូតចិនប្រចាំនៅអាមេរិកក៏បានបដិសេធមិនធ្វើអត្ថាធិប្បាយអ្វីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ