អ្នកចេញមុខប្រឆាំងលោកឌុយទែរតេ ប្រឈមនឹងដីកាចាប់ខ្លួន
តុលាការទីក្រុងម៉ានីល នៅថ្ងៃព្រហស្បតិ៍ទី ២៣កុម្ភៈ បានចេញដីកាចាប់ខ្លួន សមាជិកព្រឹទ្ធសភា ហ្វីលីពីន លោកស្រី ឡីឡា ដឺ លីម៉ា ក្នុងបទចោទប្រកាន់ជួញដូរគ្រឿងញៀន។ ទាំងគណបក្ស និងអ្នកគាំទ្រ ជឿថា ដីកាចាប់ខ្លួន លោកស្រី លីម៉ា ជាយុទ្ធសាស្រ្ត របស់រដ្ឋាភិបាល ដើម្បីបំបិទមាត់អ្នកប្រឆាំង នឹងលោកប្រធានាធិបតី ឌុយទែរតេ។
ចុះផ្សាយនៅថ្ងៃ៖
លោកស្រីឡីឡា ដឺ លីម៉ា ត្រូវបានគេស្គាល់ថា ជាសមាជិកព្រឹទ្ធសភាដែលចេញមុខរិះគន់យ៉ាងចាស់ដៃ ចំណាត់ការរបស់លោកប្រធានាធិបតីហ្វីលីពីន ក្នុងការប្រយុទ្ធប្រឆាំងនឹងក្រុមគ្រឿងញៀន។ នៅសប្តាហ៍នេះ លោកស្រីបានដាក់ឈ្មោះលោកប្រធានាធិបតីឌុយទែរតេ ថា ជាឃាតករ វិកលចរិក សម្លាប់មនុស្សជាខ្សែ។ លោកស្រីនៅបានអំពាវនាវឲ្យប្រជាជនហ្វីលីពីនងើបឡើង ជាមួយ លោកស្រី ដើម្បីប្រឆាំងនឹងសង្រ្គាមប្រឆាំងគ្រឿងញៀនរបស់លោកឌុយទែរតេ។ សម្រាប់លោកស្រីលីម៉ា លោកឌុយទែរតេមានបញ្ហាខួរក្បាល ដែលមិនអាចធ្វើជាប្រធានាធិបតីបាន។ លោកស្រីបានសុំឲ្យមន្រ្តីរដ្ឋាភិបាលងើបឈរឡើង ផ្តួលរំលំអំណាចលោកឌុយទែរតេ ដូចដែលកម្លាំងមហាជនធ្លាប់ធ្វើបដិវត្តបណ្តេញមេដឹកនាំផ្តាច់ការ ម៉ារកូស កាលឆ្នាំ ១៩៨៦។
នៅឆ្នាំមុនសោះ លោកស្រីលីម៉ាបានចូលរួមបង្កើតគណៈកម្មការស៊ើបអង្កេតមួយ នៅព្រឹទ្ធសភា ដើម្បី ស៊ើបអង្កេតលើការសម្លាប់ក្រៅច្បាប់ នៅក្នុងយុទ្ធនាការប្រឆាំងគ្រឿងញៀនរបស់លោកប្រធានាធិបតី ឌុយទែរតេ ដែលក្នុងរយៈពេល ៨ខែ បានធ្វើឲ្យមនុស្សស្លាប់ជាង ៦ពាន់នាក់។
ប៉ុន្តែ នៅថ្ងៃព្រហស្បតិ៍ តុលាការទីក្រុងម៉ានីលបានចេញដីកាចាប់ខ្លួនលោកស្រី លីម៉ាទៅវិញ នៅក្នុងបទចោទប្រកាន់ថា លោកស្រីបានរៀបចំ ឲ្យមានបណ្តាញជួញដូរគ្រឿងញៀន នៅក្នុងអំឡុងពេលលោកស្រីធ្វើជារដ្ឋមន្រ្តីក្រសួងយុត្តិធម៌ ក្នុងអាណត្តិរបស់លោកអាគីណូ។ ប៉ុន្តែ ទាំងលោកស្រីលីម៉ា និងអ្នកគាំទ្រលោកស្រីបានអះអាងថា លោកស្រីស្មោះត្រង់ គ្មានប្រព្រឹត្តទោសកំហុសអ្វីនោះទេ។ នៅក្នុងសន្និសីទកាសែតនៅព្រឹទ្ធសភា នៅក្រោយតុលាការចេញដីកាចាប់ខ្លួន លោកស្រី លីម៉ា បាននិយាយទាំងទឹកភ្នែកថា លោកស្រី គ្មានផែនការនឹងរត់គេចខ្លួននោះទេ។ លោកស្រីនឹងត្រលប់ទៅព្រឹទ្ធសភា នៅថ្ងៃសុក្រ ថ្ងៃដែលលោកស្រីនឹងត្រូវប៉ូលិសចាប់ខ្លួន។ លោកស្រីលីម៉ា សន្យាចេញមុខប្រឈមនឹងការបទចោទប្រកាន់ ដែល លោកស្រី តវ៉ាថា ជាផែនការរបស់លោកប្រធានាធិបតីឌុយទែរតេ សម្រាប់បំបិទមាត់រិះគន់លោកស្រី។
ក្នុងអាយុ ៥៧ឆ្នាំ លោកស្រី ឡីឡា ដឺ លីម៉ា ជាអ្នកច្បាប់ ដែលបានតស៊ូ អស់ជាង ១០ឆ្នាំ ដើម្បីរកភស្តុតាងចោទប្រកាន់លោកឌុយទែរតេ ក្នុងរឿងសម្លាប់មនុស្សរង្គាល កាលលោកនៅធ្វើជាចៅហ្វាយក្រុងដាវ៉ៅ។ ទាំងលោកស្រីលីម៉ា ហើយនិងគណបក្សសេរី របស់លោកស្រីបានសំដែងការបារម្ភខ្លាំងពីសុវត្ថិភាពរបស់លោកស្រីនៅ ក្នុងពន្ធនាគារ។ គណបក្សសេរី បានលើកយកករណីរបស់អ្នកនយោបាយម្នាក់ ដែលត្រូវបានចោទប្រកាន់ក្នុងរឿងគ្រឿងញៀននេះដែរ ត្រូវបានប៉ូលិសបាញ់សម្លាប់ នៅខែសីហាឆ្នាំមុន នៅក្នុងពន្ធនាគារ។ អង្គការការពារសិទ្ធិមនុស្សAmnesty Intenationalធ្លាប់បានព្រមានថា សកម្មភាពឃោឃៅជ្រុល របស់ប៉ូលិស ក្នុងការប្រយុទ្ធប្រឆាំងនឹងគ្រឿងញៀន អាចនឹងត្រូវគេចាត់ទុកជាឧក្រិដ្ឋកម្មប្រឆាំងមនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ