កូរ៉េខាងជើងរិះគន់ចិនថា កំពុងរាំតាមចង្វាក់ភ្លេងរបស់អាមេរិក
ជាឥរិយាបថដែលគេកម្រនឹងឃើញ។ ទីក្រុងព្យុងយ៉ាង នៅថ្ងៃសុក្រនេះបានចេញមុខចោទប្រកាន់ប្រទេសជិតខាងរបស់ខ្លួន ថា កំពុងធ្វើតាមខ្សែញាក់របស់អាមេរិក។ កូរ៉េខាងជើងទំនងចង់និយាយដល់ចិន សម្ព័ន្ធមិត្ត ដែលកាលពីសប្តាហ៍មុន បានប្រកាសផ្អាក លែងនាំចូលធ្យូងថ្មពីកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
កូរ៉េខាងជើងបានប្រើពាក្យធ្ងន់ៗ រិះគន់ចិន ដែលជាសម្ព័ន្ធមិត្តដ៏សំខាន់ និងដែលធ្លាប់តែការពារខ្លួនរហូតមក។ នៅក្នុងអត្ថបទវិចារណកថា ចេញផ្សាយ នៅថ្ងៃសុក្រនេះ ដោយទីភ្នាក់ងារព័ត៌មានKCNA ទីក្រុងព្យុងយ៉ាង (ដោយមិនបញ្ចេញឈ្មោះ) បានចោទប្រកាន់ ថា ប្រទេសជិតខាងរបស់ខ្លួនបានរាំតាមចង្វាក់ភ្លេងរបស់អាមេរិក។ តាមកូរ៉េខាងជើង ប្រទេសជិតខាងមួយនេះចង់ធ្វើជាមហាអំណាចអស្ចារ្យ ប៉ុន្តែ បែរជាមករាំតាមចង្វាក់ភ្លេងរបស់អាំមេរិកទៅវិញ។ នៅថ្ងៃព្រហស្បតិ៍ម្សិលមិញ ប្រធានាធិបតី អាមេរិកាំង លោកដូណាល់ ត្រាំ បានបញ្ជាក់ជាថ្មីថា ចិនអាចប្រើឥទ្ធិពលរបស់ខ្លួន ដើម្បីទប់ស្កាត់សកម្មភាពញុះញង់របស់កូរ៉េខាងជើង។
ទីក្រុងព្យុងយ៉ាងវិញ វាយតម្លៃថា ប្រទេសជិតខាងរបស់ខ្លួន មិនបានអល់អែកនឹងចាត់វិធានការមួយដែលគ្មានលក្ខណៈមនុស្សធម៌នោះទេ។ គេបានបញ្ឈប់ភ្លាមៗ រាល់ពាណិជ្ជកម្មក្រៅប្រទេស ដែលកន្លងមក បានជួយលើកស្ទួយជីវភាពរស់នៅរបស់ប្រជាជន។
ទោះ ជាមិននិយាយចំឈ្មោះ ក៏ គេដឹងថា កូរ៉េខាងជើងចង់សំដៅដល់ប្រទេសចិន ដែលបានប្រកាសផ្អាក ឈប់ទិញធ្យូងថ្ម ពីកូរ៉េខាងជើង។ នៅថ្ងៃសៅរ៍សប្តាហ៍មុន រដ្ឋមន្រ្តីក្រសួងពាណិជ្ជកម្មចិនបានលើកឡើងថា ពេញមួយឆ្នាំ ២០១៧ ចិននឹងផ្អាក ឈប់នាំចូលធ្យូងថ្មពីកូរ៉េខាងជើង។ តាមទីក្រុងប៉េកាំង វិធានការនេះត្រូវបានអនុវត្ត ទៅតាមសេចក្តីសម្រេចចិត្តរបស់ក្រុមប្រឹក្សាសន្តិសុខ ដែលកាលពីខែវិច្ឆិកាឆ្នាំ មុន បានដាក់ទណ្ឌកម្មសេដ្ឋកិច្ចទៅលើកូរ៉េខាងជើង ក្នុងរឿងបាញ់សាកល្បងគ្រាប់បែកនុយក្លេអ៊ែរ។
នៅក្នុងអត្ថបទចុះផ្សាយរបស់KCNA កូរ៉េខាងជើងនៅបានប្រើពាក្យធ្ងន់មួយទៀត ដូចជាថា គឺជាការគិតបែបកូនក្មេងសុទ្ធសាធ ដែលគេជឿថា ការបិទខ្ទប់ប្រភពចំណូល នឹងធ្វើឲ្យកូរ៉េខាងជើងលះបង់ចោលកម្មវិធីនុយក្លេអ៊ែរ និងមីស៊ីលនោះ។
កូរ៉េខាងជើង រិះគន់ចិន ដែលជាសម្ព័ន្ធមិត្ត និងជាអ្នកការពាររបស់ខ្លួន នៅក្នុងឆាកអន្តរជាតិ។ នេះជារឿងដែលគេកម្រឃើញ នៅក្នុងទំនាក់ទំនងស្អិតល្មួត ចិន កូរ៉េខាងជើង។ ទំនាក់ទំនងរវាងសម្ព័ន្ធមិត្តទាំងពីរចាប់ផ្អើមចុះស្រអាប់ ចាប់តាំងពីកូរ៉េខាងជើងចូលដឹកនាំដោយលោកគីម ជុងអ៊ុន ដែលចេះតែផ្គើនសហគមន៍អន្តរជាតិ ដោយបានបាញ់សាកល្បងម្តងហើយ ម្តងទៀត គ្រាប់បែកនុយក្លេអ៊ែរ ហើយនិងមីស៊ីលបាលីស្ទីក។ តាមអ្នកជំនាញ ទីក្រុងប៉េកាំងសម្រេចចិត្តឈប់ទិញនាំចូលធ្យូងថ្មពីកូរ៉េខាងជើង ដោយសារតែរឿងបាញ់សាកល្បងនុយក្លេអ៊ែរផង និងដោយសារតែចិនអាចខឹងនឹងកូរ៉េខាងជើង ដែល គេជឿថា ជាអ្នកនៅពីក្រោយឃាតកម្ម សម្លាប់បងប្រុសរបស់គីម ជុងអ៊ុន គឺគីម ជុងណាម ដែលធ្លាប់ស្ថិតក្រោមការការពាររបស់ទីក្រុងប៉េកាំង។
នៅសប្តាហ៍នេះ មន្រ្តីកូរ៉េខាងជើង ម្នាក់បាននិយាយថា វិធានការរបស់ចិន ឈប់ទិញធ្យូងថ្មពីកូរ៉េខាងជើងនឹងមិនប៉ះពាល់ដល់សេដ្ឋកិច្ចរបស់កូរ៉េខាងជើង ដែលសព្វថ្ងៃ កំពុងរៀនរស់ ដោយមិនពឹងជំនួយ និងការនាំចូលពីបរទេស។ ប៉ុន្តែ អ្នកជំនាញមួយចំនួនវាយតម្លៃថា ប្រតិកម្មរិះគន់ចិន នៅថ្ងៃនេះ សបញ្ជាក់ឲ្យឃើញ ទណ្ឌកម្មរបស់ចិន ប៉ះពាល់ខ្លាំងដល់ច្រកដង្ហើមរបស់កូរ៉េខាងជើង ដែលរហូតមកចង់បានសាច់ប្រាក់សុទ្ធពីការលក់ធ្យូងថ្មទៅឲ្យចិន។ គយចិនបានបង្ហាញថា ក្នុងឆ្នាំ ២០១៦ ចិនបានចំណាយលុយជាង១ពាន់លានដុល្លារអាមេរិក ដើម្បីទិញ នាំចូលធ្យូងថ្ម ជាង២២លានតោន ពីកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ