តើសារធាតុពុល VX ដែលគេប្រើសម្រាប់សម្លាប់ គីម ជុងណាម ជាអ្វី ?
ចុះផ្សាយនៅថ្ងៃ៖
ស្តាប់ - ០៦:២៤
បើតាមលទ្ធផលវិភាគបឋម ដែលប៉ូលិសម៉ាឡេស៊ី បានផ្សព្វផ្សាយនៅថ្ងៃសុក្រទី ២៤កុម្ភៈ គីម ជុងណាម បងប្រុសម្តាយទីទៃរបស់ប្រមុខដឹកនាំកូរ៉េខាងជើង គីម ជុងអ៊ុន បានស្លាប់ ដោយពុលសារធាតុគីមី មហាពុលបំផុតឈ្មោះ VX ដែលជាពពួកអាវុធគីមីមួយដ៏សាហាវ។ អាវុធគីមួយនេះ មានកម្លាំងពុលខ្លាំង គ្មានប្រៀបឡើយ ខ្លាំងលើអាវុធគីមី ដែលរបបដឹកនាំស៊ីរីធ្លាប់ប្រើកាលពីឆ្នាំ២០១៣ទៅទៀត។
បើតាមប៉ូលិសម៉ាឡេស៊ី លទ្ធផលនៃការវិភាគកោសល្យវិច័យ បានបង្ហាញវត្តមានដានសារធាតុគីមី VX នៅលើផ្ទៃមុខនិងក្នុងភ្នែករបស់ សព គីម ជុងណាម។ VX ជាសារធាតុពុលគីមី ដែលត្រូវបានចាត់បញ្ចូលក្នុងក្រុមអាវុធគីមី ដូចឧស្ម័ន Sarin ដែលរបបដឹកនាំអាសាដ នៅស៊ីរី បានប្រើដើម្បីសម្លាប់ពួកឧទ្ទាមបះបោរប្រឆាំង កាលពីឆ្នាំ២០១៣។ ប៉ុន្តែ VX មានកម្លាំងពុលស្លាប់១០ដងលើសSarinទៀត។
VX អាវុធគីមី គ្មានក្លិន គ្មានពណ៌
សារធាតុគីមីនេះ ត្រូវបានរកឃើញឱ្យអ្នកវិទ្យាសាស្ត្រអង់គ្លេស កាលពីឆ្នាំ១៩៥២។ មានប្រទេសជាច្រើនបានទិញ ឬយកទៅបំផ្លែងប្រើប្រាស់ ក្នុងជម្លោះ។ នៅឆ្នាំ១៩៩៤និង១៩៩៥ ក្រុមនិកាយAun Shinrikyo ជប៉ុន ធ្លាប់បានយកសារធាតុVX នេះទៅប្រើដើម្បីប៉ុនប៉ងធ្វើឃាតមនុស្ស។ អង្គការសហប្រជាជាតិ បានចាត់បញ្ចូល VX ជាអាវុធគីមីប្រល័យមនុស្សលោកជាទ្រង់ទ្រាយធំ។ គ្រប់ប្រទេសជាសមាជិកត្រូវតែធ្វើសេចក្តីប្រកាសរាយការណ៍អំពី បរិមាណរក្សាទុកVX ក្នុងឃ្លាំង និងត្រូវតែកម្ចាត់វាចោលបន្តិចម្តងៗ។ នេះបើតាមសន្ធិសញ្ញាអន្តរជាតិស្តីពីការហាមឃាត់អាវុធគីមី។ សហរដ្ឋអាមេរិកដែលធ្លាប់មានស្តុកសារធាតុគីមីច្រើនក្នុងសម័យសង្គ្រាមលោក បានបំផ្លាញចោលទាំងស្រុង នៅចុងទសវត្សឆ្នាំ១៩៨០ ពេលសង្គ្រាមត្រជាក់ត្រូវបិទបញ្ចប់។
ប៉ុន្តែកូរ៉េខាងជើង មិនចុះហត្ថលេខាលើសន្ធិសញ្ញាអន្តរជាតិនេះទេ ដូច្នេះវាគ្មានអ្វីគួរឱ្យភ្ញាក់ផ្អើលដែលថា កូរ៉េខាងជើង ដែលមានភ្នាក់ងារចារកិច្ចសកម្មខ្លាំងនៅថៃ ម៉ាឡេស៊ី និងឥណ្ឌូណេស៊ី ទំនងជាមានស្តុកអាវុធគីមីVX ដ៏ច្រើនតោននោះ។
ស្រួលផលិត និងតម្លៃថោក VX ជាសារធាតុ គ្មានពណ៌ គ្មានក្លិន និងមានលំនឹងគីមីខ្លាំងណាស់។ ក្នុងទម្រង់ជាឧស្ម័នរាវ សារធាតុគីមីពុលមួយនេះ អាចជ្រាបចូលក្នុងសព៌ាង្គកាយ បានយ៉ាងលឿន តាមការស្រូបដង្ហើម ឬដោយជ្រាបតាមស្បែក ទៅវាយលុកប្រព័ន្ធប្រសាទ និងសាច់ដុំ និងបង្កឱ្យស្លាប់ភ្លាមៗ ក្នុងរវាងតែប៉ុន្មាននាទីប៉ុណ្ណោះ បើគ្មានថ្នាំបន្សាបទាន់ពេលវេលាទេ។
បន្ថែមពីលើវត្តមានដានសារធាតុVX លើសព បើតាមសាក្សីជាបុគ្គលិកពេទ្យនៅព្រលានយន្តហោះ អាការៈរោគសញ្ញាធ្វើទុក្ខរបស់គីមជុងណាម មានទម្រង់ដូចបេះបិទទៅនឹងអ្វីដែលបង្កឡើងសារធាតុគីមី VX ៖ ឈឺក្បាល វិលមុខ ដង្ហក់ រួចដាច់ខ្យល់មួយរំពេញ កណ្តាលផ្លូវ នៅក្នុងរថយន្តសង្គ្រោះ ទាំងមិនទាន់ដល់មន្ទីរពេទ្យផង។
ចំណែកស្ត្រីពីរនាក់ ដែលជាប់សង្ស័យថាជាអ្នកជះអាវុធគីមីលើ គីមជុងណាម នៅព្រលានយន្តហោះកូឡាឡាំពួរ ដឹងច្បាស់លាស់អំពីទង្វើប្រើថ្នាំពុលរបស់ខ្លួន មិនមែនលុងតាមសំដីអូសទាញថតវីដេអូឡើយ។ មេប៉ូលិសម៉ាឡេស៊ីបានគូសបញ្ជាក់ថា ស្ត្រីទាំងពីរបានទៅបន្ទប់ទឹក ព្រោះដឹងថាបានកាន់ជាតិពុល រួចត្រូវលាងសម្អាតដៃ ជាក្រោយ។
VX ធ្វើដំណើរមកម៉ាឡេស៊ីតាមកញ្ចប់ទូត ?
ថ្វីបើអាជ្ញាធរម៉ាឡេស៊ី មិនចេញស្តីអ្វីជាផ្លូវការ ចោទនរណាធ្វើឃាតលោកគីម ជុងណាមមែន តែការរកឃើញសារធាតុគីមីVX លើសាកសព បញ្ជាក់ថាការសង្ស័យពីមុនខុសទេ ! ឃាតកម្មលើរូបគីមជុងណាម ទំនងជាគំនិតនិងទង្វើដោយផ្ទាល់របស់ពួកចារកិច្ចព្យុងយ៉ាង។
លោក Khalid Abu bakak មេប៉ូលិសម៉ាឡេស៊ី បានប្រកាសថា VX ជាសារធាតុគីមី ខុសច្បាប់ ! ជាអាវុធគីមី ! ក្រុមអ្នកអង្កេតនឹងសាកល្បងស្វែងរកដាន និងកំណត់ថាតើអាវុធមួយនេះ អាចចូលមកដល់ប្រទេសម៉ាឡេស៊ីបានយ៉ាងដូចម្តេច ?! តាមកញ្ចប់ការទូត ? កាលពីថ្ងៃអង្គារទី ២១ កុម្ភៈ មេប៉ូលិសម៉ាឡេស៊ី បានប្រកាសថា មានមនុស្ស៤នាក់ ជាប់ពាក់ព័ន្ធនឹងឃាតកម្មសម្លាប់គីម ជុងណាមក្នុងនោះម្នាក់ជាតំណាងការទូតជាន់ខ្ពស់ម្នាក់ និងចង់ហៅមកសាកសួរចម្លើយ។
ហេតុដូច្នេះហើយបានជា ក្រុមអ្នកជំនាញ ផ្នែកសន្តិសុខ ជឿជាក់ថា អាវុធគីមីប្រភេទនេះ ត្រូវបាននាំចូលមកពីកូរ៉េខាងជើង។ ព្រោះតាមការពិតទៅ ការយកអាវុធគីមី VX ចូល ម៉ាឡេស៊ី គ្មានអ្វីលំបាកសោះ ! ក្នុងនាមជាអ្នកការទូត គេអាចកាន់សារធាតុគីមីមួយនេះ ក្នុងវ៉ាលី ក្នុងកាបូប ជិះយន្តហោះបានដោយស្រួល ដោយគ្មានឆ្លងកាត់ការត្រួតពិនិត្យអ្វីទាំងអស់។ កូរ៉េខាងជើង ធ្លាប់មានប្រវត្តិផលិតអាវុធគីម VX នេះផង និងធ្លាប់មានប្រវត្តិដឹកជញ្ជូនវត្ថុខុសច្បាប់ ចេញចូល តាមរយៈផ្លាកការទូតផង។ ជាមួយនឹងវិធានការសន្តិសុខតាមអាកាសយានដ្ឋាននាពេលបច្ចុប្បន្ន គេអាចចាប់ជនសាមញ្ញជាអ្នកកាន់ សារធាតុគីមី VXនេះបានយ៉ាងស្រួលណាស់ តែបើអ្នកការទូតជាអ្នកកាន់ ភ្នាក់ងារមានសមត្ថកិច្ចពិតជាមិនអាចធ្វើអ្វីបានទាំងអស់។ ហើយនៅពេលសង្ស័យ ដូចករណីប៉ូលិសម៉ាឡេស៊ីចង់សាកសួរតំណាងការទូតកូរ៉េខាងជើង ក៏គេមិនអាចកោះហៅមកតំណាងនោះមកសួរចម្លើយបានឡើយ ដោយពួកគេមានអភ័យឯកសិទ្ធិការទូត។
ស្ថានទូតកូរ៉េខាងជើង ប្រចាំទីក្រុងកូឡាឡាំពួរ មិនទាន់បាន់ចេញប្រតិកម្មអ្វីនៅឡើយទេ មកទល់នឹងរសៀលថ្ងៃសុក្រនេះ។ ប៉ុន្តែតាំងពីដើមសប្តាហ៍មក ប្រមុខការទូតកូរ៉េខាងជើង បានប្រកាសរិះគន់ការងាររបស់ប៉ូលិសម៉ាឡេស៊ី ថាធ្វើអ្វីជាឯកតោភាគី ដែលមិនអាចទទួលយកបាន និងចោទរដ្ឋាភិបាលម៉ាឡេស៊ី ត្រូវរ៉ូវជាមួយកូរ៉េខាងត្បូងបង្កើតរឿងទម្លាក់កំហុសដាក់ព្យុងយ៉ាង។ ហើយកាលពីថ្ងៃព្រហស្បតិ៍ ជាលើកទីមួយ សារព័ត៌មានផ្លូវការកូរ៉េខាងជើង បានចេញផ្សាយដំណឹងបង្ខំម៉ាឡេស៊ី ឱ្យប្រគល់សាកសព ជនជាតិកូរ៉េជើងស្លាប់នៅកូឡាឡាំពួរ ដោយរោគគាំងបេះដូង មកឱ្យអាជ្ញាធរព្យុងយ៉ាង។
តែប្រតិកម្មថ្កោលទោសមានធ្លាក់មកច្រើន មុនគេ តែពីខាងកូរ៉េខាងត្បូងទេ។ សេអ៊ូលយល់ថាកូរ៉េខាងជើង រំលោភច្បាប់គ្រប់បែបយ៉ាង គ្រប់សន្ធិសញ្ញាអន្តរជាតិ និងអំពាវនាវឱ្យសហគមន៍អន្តរជាតិកុំកន្តើយនឹងចាត់វិធានការប្រឆាំងកូរ៉េខាងជើង ប្រសិនបើរបបនេះជាអ្នកនៅ ពីក្រោយឃាតកម្មសម្លាប់ គីម ជុងណាមមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ