បាតុកម្មប្រឆាំងរដ្ឋាភិបាល នៅក្រោយការចាប់ខ្លួនសមាជិកព្រឹទ្ធសភានៅហ្វីលីពីន
ប្រជាជនហ្វីលីពីនរាប់ម៉ឺននាក់ នៅថ្ងៃសៅរ៍ ម្សិលមិញ បានចូលរួមក្នុងក្បួនបាតុកម្ម ដឹកនាំដោយ លោកអតីតប្រធានាធិបតី អាគីណូ ដើម្បីប្រឆាំងនឹងសង្រ្គាមសម្លាប់មនុស្សដ៏ហិង្សារបស់លោកប្រធានាធិបតីឌុយទែរតេ។ បាតុកម្មរបស់ប្រជាជនធ្វើឡើងនៅមួយថ្ងៃក្រោយ សមាជិកព្រឹទ្ធសភា លោកស្រី ឡីឡា ដឺ លីម៉ា ដែលជាអ្នកចេញមុខប្រឆាំងខ្លាំងនឹងលោក ប្រធានាធិបតី ឌុយទែរតេ ត្រូវបានប៉ូលិសចាប់ឃុំខ្លួន ទៅតាមដីការរបស់តុលាការ។
ចុះផ្សាយនៅថ្ងៃ៖
តើបាតុកម្មនៅថ្ងៃសៅរ៍ ជាចម្លើយតបទៅនឹងការអំពាវនាវរបស់លោកស្រីឡីឡា ដឺ លីម៉ាឬយ៉ាងណា? លោកស្រី សមាជិកព្រឹទ្ធសភា ហ្វីលីពីនទើបត្រូវបានប៉ូលិសចាប់ឃុំខ្លួន នៅថ្ងៃសុក្រ ទៅ តាមដីកាចាប់ខ្លួនរបស់តុលាការ ក្នុងបទ ជាប់ពាក់ព័ន្ធនឹងការជួញដូរគ្រឿងញៀន។ នៅមុនត្រូវ ប៉ូលិសចាប់ខ្លួន លោកស្រី ឡីឡា ដឺ លីម៉ា ដែលរិះគន់ខ្លាំងសង្រ្គាមប្រឆាំងគ្រឿងញៀនរបស់លោកឌុយទែរតេ បានសុំឲ្យចលនាប្រជាជនងើបឡើងធ្វើបដិវត្ត ដូចដែលគេធ្លាប់បានធ្វើម្តង នៅឆ្នាំ ១៩៨៩ ដើម្បីផ្តួលរំលំ មេដឹកនាំអំណាចផ្តាច់ការ ម៉ារកូស។ ថ្ងៃសៅរ៍ទី ២៥ កុម្ភៈ ក៏ថ្ងៃរំលឹកដល់ជ័យជំនះរបស់ចលនាបដិវត្តមហាជន ទៅលើរបបផ្តាច់ការម៉ារកូសនេះដែរ។
នៅថ្ងៃសៅរ៍ ក្រុមបាតុករ ដែលរួមគ្នាតវ៉ានៅមុខទីស្នាក់ការប៉ូលិសហ្វីលីពីន បានបរិហារការសម្លាប់ក្រៅច្បាប់ នៅក្នុងយុទ្ធនាការប្រយុទ្ធប្រឆាំងគ្រឿងញៀនរបស់លោកប្រធានាធិបតីឌុយទែរតេ។ ពួកគេមួយចំនួនបានព្រមានផងដែរពីការដែលហ្វីលីពីនអាចត្រលប់ទៅដឹកនាំដោយមេអំណាចផ្តាច់ការ។ លោកអាគីណូ អតីតប្រធានាធិបតីហ្វីលីពីន ដែលស្ថិតនៅក្នុងក្បួនបាតុកម្មបានថ្កោលទោសការចាប់ខ្លួន លោកស្រីឡីឡា ដឺលីម៉ា ដែលធ្លាប់ធ្វើជារដ្ឋមន្រ្តីយុត្តធម៌ក្នុងអាណត្តិរបស់លោក។ លោក អាគីណូបានរុញច្រានចោលការចោទប្រកាន់របស់អ្នកនាំពាក្យរបស់ប្រធានាធិបតី ដែលថា អតីតមន្រ្តីរបស់លោក កំពុងឃុបឃិតរួមគ្នា ចង់ផ្តួលរំលំអំណាចរបស់លោកឌុយទែរតេ។ “តើយើងអាចបង្កអស្ថិរភាពយ៉ាងម៉េច បើយើងកំពុងស្នើចង់ជួយរដ្ឋាភិបាលនោះ ?” នេះជាប្រសាសន៍របស់លោកអាគីណូ។
លោកឌុយទែរតេដែលឈ្នះឆ្នោត ចូលកាន់តំណែងជាប្រធានាធិបតីហ្វីលីពីនបានបើកធ្វើសង្រ្គាមប្រយុទ្ធប្រឆាំង នឹងក្រុមជួញដូរ និងប្រើប្រាស់គ្រឿងញៀន។ លោកឌុយទែរតេដែលបានកោតសរសើរម៉ារកូសថា ជាប្រធានាធិបតីដ៏ល្អជាងគេ បានព្រមានផងដែរថា នឹងអាចប្រើច្បាប់អាជ្ញាសឹក ដើម្បីបញ្ជៀសហ្វីលីពីនកុំឲ្យធ្លាក់លង់ខ្លួនជាប្រទេសគ្រឿងញៀន។ សង្រ្គាមប្រឆាំងគ្រឿងញៀនបានទទួលការគាំទ្រខ្លាំងពីប្រជាជនក្នុងស្រុក ដែលនៅថ្ងៃសៅរ៍ ម្សិលមិញ បាន ដង្ហែរក្បួន ដាច់ដោយឡែកមួយ ដើម្បី គាំទ្រលោកប្រធានាធិបតីឌុយទែរតេ។
យ៉ាងណាក៏ដោយ យុទ្ធនាការប្រឆាំងបណ្តាញគ្រឿងញៀន នៅហ្វីលីពី របស់លោកប្រធានាធិបតីឌុយទែរតេ បានរងការរិះគន់ច្រើន ពីក្រុមអ្នកច្បាប់ ក្នុងស្រុក ហើយនិងអង្គការការពារសិទ្ធិមនុស្ស អន្តរជាតិ ដែលវាយតម្លៃថា កំពុងបើកផ្លូវ លើកទឹកចិត្តឲ្យមានការសម្លាប់ក្រៅផ្លូវច្បាប់។ សង្រ្គាមប្រឆាំងគ្រឿងញៀន រយៈពេល៨ខែបានធ្វើឲ្យមនុស្សស្លាប់ជាង៦ពាន់នាក់ ដែលនៅក្នុងនោះ ជនសង្ស័យ ជាង ២ពាន់នាក់ ត្រូវបានប៉ូលិសបាញ់សម្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ