អូស្ត្រាលី និងឥណ្ឌូណេស៊ីស្តារឡើងវិញ កិច្ចសហប្រតិបត្តិការយោធា
នាយករដ្ឋមន្រ្តីអូស្ត្រាលី លោកម៉ាល់ខុម ធើនប៊ុល បានប្រកាស នៅថ្ងៃអាទិត្យនេះថា លោក ហើយនិងលោកប្រធានាធិបតីឥណ្ឌូណេស៊ីបានព្រមព្រៀងគ្នាក្នុងការស្តារឡើងវិញ ទំនាក់ទំនងយោធារវាងប្រទេសទាំងពីរ។ នៅដើមខែមករា ឥណ្ឌូណេស៊ីបានប្រកាសជាផ្លូវការ ផ្អាកព្យួរសហប្រតិបត្តិការយោធាជាមួយអូស្ត្រាលី បន្ទាប់ពីភាគីឥណ្ឌូណេស៊ីប្រទះរកឃើញ ខ្លឹមសារជេរប្រមាថឥណ្ឌូណេស៊ី នៅក្នុងឯកសារហ្វឹកហ្វឺនមួយ របស់អូស្ត្រាលី។
ចុះផ្សាយនៅថ្ងៃ៖
នៅក្នុងដំណើរទស្សនកិច្ចជាលើកទី១ ទៅអូស្ត្រាលី ក្នុងនាមជាប្រមុខរដ្ឋឥណ្ឌូណេស៊ី លោកប្រធានាធិបតីហ្សូកូ វីដូដូ បានយល់ព្រមព្រៀងឲ្យមានការស្តារឡើងវិញ សហប្រតិបត្តិការយោធាជាមួយ អូស្ត្រាលី ដែលឥណ្ឌូណេស៊ីសម្រេចផ្អាកព្យួរជិតពីរខែមកហើយ។ គឺនាយករដ្ឋមន្រ្តីអូស្ត្រាលី ម៉ាល់ខុម ធើនប៊ុលដែលបានប្រកាសព័ត៌មាននេះ នៅក្រោយជំនួប ពិភាក្សារយៈពេល២ម៉ោងជាមួយប្រធានាធិបតីឥណ្ឌូណេស៊ី។
អូស្ត្រាលី និងឥណ្ឌូណេស៊ីជាប្រទេសជិតខាង ប៉ុន្តែ កម្រនឹងមានទំនាក់ទំនងរលូននឹងគ្នាណាស់។ អូស្ត្រាលីខឹងនឹងឥណ្ឌូណេស៊ី ដែលកាត់ទោសប្រហារជីវិតជនជាតិអូស្ត្រាលី ដោយសារគ្រឿងញៀន ចំណែកឥណ្ឌូណេស៊ីអន់ចិត្តនឹងអូស្ត្រាលីដែលចេះតែចាប់បង្វែរទូកដឹកជនអន្តោប្រវេសន៍ខុសច្បាប់ ទៅឥណ្ឌូណេស៊ី។
ចំណុចរកាំរកូសចុងក្រោយគឺ ឥណ្ឌូណេស៊ីបានប្រកាស នៅខែមករា ផ្អាកសហប្រតិបត្តិការយោធា រវាងប្រទេសទាំងពីរ បន្ទាប់ពីមន្ត្រីយោធាជាន់ខ្ពស់របស់ឥណ្ឌូណេស៊ី បានរកឃើញថា ឯកសារហ្វឹកហ្វឺនមួយរបស់អូស្ត្រាលីមានខ្លឹមសារប្រមាថ ប៉ះពាល់ដល់មូលដ្ឋានគ្រឹះនៃប្រជាជាតិឥណ្ឌូណេស៊ី។ ក្នុងឯកសារយោធា ដែលឥណ្ឌូណេស៊ី រកឃើញនៅក្នុងមូលដ្ឋានទ័ពអូស្ត្រាលី នៅទីក្រុងPerth ប្រទេសអូស្ត្រាលី គេបានសរសេរថា ខេត្តប៉ាពូអាស៊ី របស់ឥណ្ឌូណេស៊ី គួរតែទទួលឯករាជ្យ។ សៀវភៅហ្វឹកហាត់របស់អូស្ត្រាលីបានសរសេរចំអកផងដែរ មនោគមវិជ្ជាដឹកនាំរបស់ឥណ្ឌូណេស៊ី។ ភ្លាមៗ ប្រមុខយោធាអូស្ត្រាលីបានសំដែងការសុំទោស ប៉ុន្តែ គេត្រូវរង់ចាំដំណើរទស្សនកិច្ចរបស់លោកប្រធានាធិបតីឥណ្ឌូណេស៊ី នៅអូស្រ្តាលី ដើម្បីកែលំអឲ្យប្រសើរឡើងវិញ ទំនាក់ទំនងយោធារវាងប្រទេសទាំងពីរ។
កន្លងមក យោធាអូស្ត្រាលី និងឥណ្ឌូណេស៊ីបានសហការគ្នា ក្នុងផ្នែកប្រយុទ្ធប្រឆាំងភេរវកម្ម ហើយនិងការវាយប្រហាររបស់ចោរអ៊ីនធ័រនែត។ នៅមុន ដំណើរទស្សនកិច្ចទៅអូស្ត្រាលី ប្រធានាធិបតីហ្សូកូ វីដូដូធ្លាប់បានបញ្ជាក់ទៅកាសែតអូស្រ្តាលី ថា លោកចង់ឲ្យកប៉ាល់ទឹកអូស្ត្រាលី និងឥណ្ឌូណេស៊ី រួមគ្នាល្បាតនៅសមុទ្រចិនខាងត្បូង។ ខុសពីម៉ាឡេស៊ី ហ្វីលីពីន និងវៀតណាម ឥណ្ឌូណេស៊ីគ្មានជាប់ក្នុងជម្លោះ សមុទ្រចិនខាងត្បូង នោះទេ ប៉ុន្តែ ឥណ្ឌូណេស៊ីបានតវ៉ាជាច្រើន បន្ទាប់ពីកប៉ាល់ចិនបើកចូលទៅរំលោភដែនទឹក កោះ Natunas របស់ឥណ្ឌូណេស៊ី ដែលស្ថិតនៅក្បែរទឹកដីម៉ាឡេស៊ី ក្នុងសមុទ្រចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ