អធិរាជជប៉ុនបំពេញទស្សនកិច្ចជាប្រវត្តិសាស្ត្រនៅវៀតណាម
ព្រះចៅអធិរាជជប៉ុន អាគីហ៊ីតូ ត្រូវផ្តើមបំពេញទស្សនកិច្ច នៅថ្ងៃទី ២៨កុម្ភៈនេះ នៅប្រទេសវៀតណាម។ ជាដំណើរទស្សនកិច្ចលើកដំបូងបង្អស់របស់អធិរាជជប៉ុន ! ដំណើរទស្សនកិច្ចជាប្រវត្តិសាស្ត្រនេះ បានស្តែងឱ្យឃើញកាន់តែច្បាស់អំពីការខិតចូលជិតគ្នាកាន់ខ្លាំង រវាងក្រុងហាណូយ និងជប៉ុន ដែលចាប់ផ្តើមរឹតចំណងគ្នាតាំងពីឆ្នាំ២០០០មក និងដែលកាន់តែរឹងមាំឡើងៗ ជាលំដាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ព្រះចៅអធិរាជ ព្រះជន្ម៨៣វស្សា និងអធិរាជនី ដែលប្រសិទ្ធនាមរជ្ជកាលសោយរាជ្យរបស់ព្រះអង្គ ថារជ្ជកាលសន្តិភាព ធ្លាប់យាងធ្វើទស្សនកិច្ចបែបគោរពវិញ្ញាណក្ខន្ធ នៅតាមកន្លែងជប៉ុនធ្លាប់ឈ្លានពានជាច្រើនមកហើយនៅតំបន់ប៉ាស៊ីហ្វិក។ នៅថ្ងៃនេះ ព្រះចៅអធិរាជ អាគីហ៊ីតូ និងអធិរាជនី មីឈីកូ បានយាងមកបំពេញទស្សនកិច្ចជាប្រវត្តិសាស្ត្រ និងប្រកបដោយនិម្មិត្តរូបបំផុត នៅវៀតណាម។
ក្រៅអំពីការទស្សនាក្រុងហាណូយ និងក្រុងចាស់ HUE ព្រះចៅអធិរាជនឹងយាងទៅជួបជាមួយនឹងគ្រួសារអតីតទាហានជប៉ុន ដើម្បីផ្សះផ្សារបួសស្នាមទាំងឡាយដែលបន្សល់ទុកដោយការឈ្លានពាន និងត្រួតត្រារបស់ជប៉ុន ក្នុងសម័យសង្គ្រាមលោកលើកទីពីរ ពីឆ្នាំ១៩៤០-១៩៤៥ ឱ្យជាដាច់។
ក្រោយសង្គ្រាមលោកបានបិទបញ្ចប់ មានទាហានជប៉ុនប្រមាណជាង៧០០នាក់ បានសម្រេចចិត្តបន្តរស់នៅក្នុងប្រទេសវៀតណាម។ នៅពេលវៀតណាមបានទទួលឯករាជ្យ នៅឆ្នាំ១៩៥៤ ទាហានជប៉ុន បានទទួលបញ្ជាពីរដ្ឋាភិបាលឱ្យត្រលប់ចូលស្រុកវិញ ប៉ុន្តែទាហានខ្លះមិនអាចយកកូនប្រពន្ធមកជាមួយបានឡើយ។ ហើយពួកគេត្រូវបោះបង់ឱ្យរស់ក្នុងភាពក្រីក្រ និងការរើសអើង។
ជប៉ុននិងវៀតណាម បានភ្ជាប់ទំនាក់ទំនងការទូតនឹងគ្នាឡើងវិញ តាំងពីឆ្នាំ១៩៧៣។ ជាទំនាក់ទំនង ម្តងឡើងម្តងចុះ ប៉ុន្តែចាប់ពីឆ្នាំ២០០០មក ចំណងមេត្រីភាពបានរឹតបន្តឹងជារៀងរាល់ថ្ងៃ និងបានឈានដល់ការចុះហត្ថលេខាចាត់ទុកគ្នាជាដៃគូប្រកបដោយការជឿជាក់និងមានស្ថិរភាព នៅឆ្នាំ២០០២។
ជប៉ុន ពេលនេះគឺជាប្រទេសអ្នកផ្តល់មូលនិធិកម្ចីទីមួយនៅវៀតណាម ក្នុងផ្នែកជំនួយសហប្រតិបត្តិការ និងជាប្រទេសអ្នកវិនិយោគដោយផ្ទាល់ទីពីរ បន្ទាប់ពីកូរ៉េខាងត្បូង។ ក្នុងរយៈពេលប៉ុន្មានឆ្នាំចុងក្រោយនេះ ប្រទេសទាំងពីរ ក៏បានពង្រឹងចំណងលើវិស័យយុទ្ធសាស្ត្រ ដើម្បីប្រឈមរួមគ្នាទល់នឹងមហិច្ឆតាយោធាចិន នៅសមុទ្ទចិនខាងត្បូង។ កាលពីមករា នាយករដ្ឋមន្ត្រីជប៉ុន លោក ស្ហ៊ីនហ្សូ អាបេ បានផ្តល់ថវិកា១ពាន់លានដុល្លារដល់វៀតណាម ដើម្បីពង្រឹងសន្តិសុខផ្លូវទឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ