ឃាតកម្មសម្លាប់លោកគីម ជុនណាម៖ម៉ាឡេស៊ីបានចេញដីការចាប់ខ្លួនជនជាតិកូរ៉េខាងជើងម្នាក់
នៅក្នុងប្រទេសម៉ាឡេស៊ី សំណុំរឿងឃាតកម្មសម្លាប់លោកគីម ជុនណាមដែលជាបងប្រុសម្តាយទីទៃលោកគីម ជុនអ៊ុនកំពុងបន្តបំពុលទំនាក់ទំនងរវាងទីក្រុងគូឡាឡាំពួ និងទីក្រុងព្យុងយ៉ាង។ នៅថ្ងៃសុក្រុ ទី៣ មីនានេះ តុលាការម៉ាឡេស៊ីបានចេញដីការចាប់ខ្លួនជនជាតិកូរ៉េខាងជើងម្នាក់។ ទន្ទឹមគ្នានេះ ប៉ូលិសម៉ាឡេស៊ីក៏បានស្នើជាថ្មីម្តងទៀតឲ្យលេខាទី២នៅស្ថានទូតកូរ៉េខាងជើងរួមសហការណ៍នៅក្នុងដំណើរការស៊ើបអង្កេត។ ដីការចាប់ខ្លួននេះបានធ្លាក់មក បន្ទាប់ពីរដ្ឋអាជ្ញាបានដោះលែង និងបណ្តេញជនជាតិកូរ៉េខាងជើងម្នាក់។
ចុះផ្សាយនៅថ្ងៃ៖
ស្តាប់ - ០២:០៣
គេនៅមិនទាន់ដឹងថា តើជនជាតិកូរ៉េខាងជើងដែលរដ្ឋអាជ្ញាចេញដីការចាប់ខ្លួនពេលនេះ ជាជនសង្ស័យម្នាក់ក្នុងចំណោមជនសង្ស័យទាំង ៨នាក់នៅក្នុងឃាតកម្មសម្លាប់លោកគីម ជុងណាមកាលពីថ្ងៃទី១៣ កុម្ភៈនៅព្រលានយន្តហោះគូឡាឡាំពួរ ឬអត់ទេ។ អ្វីដែលគេដឹង ជនជាតិកូរ៉េខាងជើងរូបនោះជាបុគ្គលិកបម្រើការងារនៅក្នុងក្រុមហ៊ុនអាកាសចរណ៍កូរ៉េខាងជើងនៅម៉ាឡេស៊ី។ សូមជម្រាបជូនថា ក្រោយឃាតកម្មសម្លាប់លោកគីម ជុងណាមដែលជាបងប្រុសម្តាយទីទៃរបស់លោកគីម ជុងអ៊ុន រដ្ឋអំណាចម៉ាឡេស៊ីបានសង្ស័យលើជនជាតិកូរ៉េខាងជើងចំនួន ៨នាក់ ក្នុងនោះក៏មានលេខាទី២ នៃស្ថានទូតកូរ៉េខាងជើងប្រចាំម៉ាឡេស៊ីម្នាក់ដែរ។
តែមកទល់ថ្ងៃនេះ រូបលេខាទី២ នោះកំពុងបន្តគេចខ្លួនមិនព្រមចូលឆ្លើយបំភ្លឺតាមការអំពាវនាវរបស់ប៉ូលិសម៉ាឡេស៊ីទេ។ មួយវិញទៀត ក្នុងចំណោមជនសង្ស័យទាំង ៨នាក់ មានម្នាក់គត់ឈ្មោះរី ជុងចុល អាយុ ៤៧ឆ្នាំដែលបានចាប់ខ្លួន តែទីបំផុតរដ្ឋអាជ្ញាបានសម្រេចដោះលែង រួចបណ្តេញចេញពីទឹកដីម៉ាឡេស៊ីក្នុងថ្ងៃសុក្រ ទី៣ មីនានេះ។ រដ្ឋអាជ្ញាបានលើកយកហេតុផលទៅពន្យល់ថា ការដោះលែងលោករី ជុងចុលក៏ដោយសារតែតុលាការរកមិនឃើញភស្តុតាងអ្វីដែលបញ្ជាក់ពីការចូលរួម និងរួមគំនិតនៅក្នុងឃាតកម្មសម្លាប់លោកគីម ជុងណាមទេ។
ក៏ប៉ុន្តែ មេប៉ូលិសម៉ាឡេស៊ីលោកខាលីដ អាប៊ូបាកាបានសម្តែងការសោកស្តាយជាពន់ពេកចំពោះការដោះលែងលោករី ជុងចុល។ ពីប្រទេសអារ៉ាប៊ីសាអូឌីតដែលលោកកំពុងចូលរួមក្នុងពិធីស្វែងបុណ្យសាសនាអ៊ីស្លាម លោកអាប៊ូបាកាបានថ្លែងដោយគិតថា លោករី ជុងចុលបានដើរតួនាទីនៅក្នុងឃាតកម្មសម្លាប់លោកគីម ជុងណាម តែគួរឲ្យស្តាយដែលគ្មានភស្តុតាងដើម្បីចោទប្រកាន់លោករី ជុងចុល។ ទន្ទឹមគ្នានេះ រូបមេប៉ូលិសដដែលបានបន្ថែមថា ការដោះលែងរូបលោករី ជុងចុលមិនមែនដោយសារម៉ាឡេស៊ីទទួលគំនាបនយោបាយ ឬការទូតពីនរណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ