ទ្រព្យសម្បត្តិសរុបរបស់សមាជិកសភាចិនមានតម្លៃស្មើGDPរបស់ប្រទេសអឺរុបមួយ
មហាសេដ្ឋីចិន ជាង១០០នាក់ ដែលម្នាក់ៗមានទ្រព្យសម្បត្តិ ច្រើនជាង១ពាន់លានដុល្លារ ជាសមាជិករបស់សភាសភាចិន។ តាមការចុះផ្សាយរបស់ទស្សនាវដ្តីHurun របស់ចិន នៅថ្ងៃសុក្រ ម្សិលមិញ ទ្រព្យសម្បត្តិបូករួមគ្នារបស់មហាសេដ្ឋីចិន ជាង ២០០នាក់ មានតម្លៃប្រមាណ ៥០០ពាន់លានដុល្លារ គឺស្មើនឹងផលិតផលក្នុងស្រុកសរុបរបស់ប្រទេសមួយ ដូចជាបែលហ្ស៊ិក ស៊ុយអែត ឬប៉ូឡូញជាដើម។ ការចុះផ្សាយរបស់ទស្សនាវដ្តីធ្វើឡើងនៅចំថ្ងៃដែលគណបក្សកុម្មុយនិស្តចិន ត្រៀមបើកកិច្ចប្រជុំសភា ប្រចាំឆ្នាំ នៅថ្ងៃអាទិត្យស្អែក។
ចុះផ្សាយនៅថ្ងៃ៖ កែប្រែថ្ងៃទី៖
សភាចិនមានអ្នកធ្វើច្បាប់ ប្រមាណ២០០នាក់ ដែលមានទ្រព្យសម្បត្តិសរុប៥០០ពាន់លានដុល្លារអាមេរិក។ តាមការចុះផ្សាយរបស់ទស្សនាវដ្តីចិន Hurun នៅថ្ងៃសុក្រ នៅក្នុងចំណោមមហាសេដ្ឋី ចិន ដែលមានទ្រព្យសម្បត្តិច្រើន២៩០លានដុល្លារ អាមេរិក មានមហាសេដ្ឋី ជាង១០០នាក់ ជាសមាជិករបស់សភា ចំណែក៩៧នាក់ផ្សេងទៀត ជាសមាជិករបស់សន្និសីទពិគ្រោះនយោបាយប្រជាជនចិន ដែលប្រមូលផ្តុំដោយថ្នាក់ដឹកនាំធំរបស់បក្សកុម្មុយនិស្តចិន។
តាមការស្រង់ស្ថិតិរបស់ទស្សនាវដ្តី ទ្រព្យសម្បត្តិបូករួមគ្នារបស់សមាជិកសភា ដែលជាមហាសេដ្ឋីនេះ មានតម្លៃជាង ៥០០ពាន់លានដុល្លារ ស្មើនឹងផលិតផលក្នុងស្រុកសរុប ប្រចាំឆ្នាំរបស់ប្រទេសមួយ ដូចជា បែលហ្ស៊ិក ឬប៉ូឡូញជាដើម។
ទស្សនាវដ្តីHurun បានចេញផ្សាយរបាយការណ៍ រកឃើញរបស់ខ្លួន នៅចំពេលដែលសភាចិនកំពុងត្រៀមរៀបចំបើកកិច្ចប្រជុំប្រចាំឆ្នាំ នៅថ្ងៃអាទិត្យ ដែលនៅក្នុងនោះ មានការចូលរួមពីគណៈប្រតិភូចិនជាង៥ពាន់នាក់។ យ៉ាងណាក៏ដោយ របាយការណ៍ របស់Hurun ដែលមានទីតាំងក្នុងក្រុងសៀងហៃបានបង្ហាញថា សមាជិកសភាដែលមានទ្រព្យសម្បត្តិរាប់រយលានដុល្លារ ភាគច្រើនគឺក្រុមអ្នកធ្វើជំនួញ ប៉ុន្តែ មិនមែន ជាអ្នកធ្វើនយោបាយចាស់ឆ្នាំនោះទេ។
នៅឆ្នាំ ២០០២ រដ្ឋាភិបាលចិន ដែលចង់ផ្តល់សន្ទុះដល់សេដ្ឋកិច្ចចិន បានទាក់ទាញ បញ្ចូលក្រុមអ្នកជំនួញ ឲ្យទទួលសមាជិកភាពរបស់សភាចិន។ តំណែងដែលក្រុមពាណិជ្ជករ និងម្ចាស់ក្រុមហ៊ុនឯកជនចិនទទួលយក ដើម្បីសំដែងពីភាពស្មោះត្រង់ជូនបក្ស។ ការចូលរួមរបស់ក្រុមអ្នកជំនួញ ក្នុងស្ថាប័ននិតិប្រតិបត្តិ បានជួយអូសទាញសេដ្ឋកិច្ចចិន មកដល់ចំណាត់ថ្នាក់លេខ២ ក្នុងពិភពលោក។ ប៉ុន្តែ ជាមួយគ្នានោះ គេរកឃើញថា វាក៏បានអនុញ្ញាតផងដែរ បើកផ្លូវឲ្យអ្នកជំនួញចិនកាន់តែមានទ្រព្យសម្បត្តិច្រើនឡើង។ តាមទស្សនាវដ្តី អ្នកជំនួញដែលជាសមាជិកសភាជាង ១០០នាក់ បានបង្កើនទ្រព្យសម្បត្តិរបស់ខ្លួន ប្រមាណ ៦៤% ចាប់តាំងពីឆ្នាំ ២០១៣មក។
កិច្ចប្រជុំសភាប្រចាំឆ្នាំ ឆ្នាំនេះ នឹងផ្តោតទៅលើការកាត់បន្ថយភាពក្រីក្រ ហើយនិងការជំរុញឲ្យមានការរីកចំរើន ក្នុងសង្គម។ ផែនការដែលលោកប្រធានាធិបតីចិន ស៊ី ជីនពីងចាត់ទុកថា អាទិភាពសម្រាប់ចិន ដែលកំពុងប្រឈមនឹងគម្លាតកាន់តែធំ រវាងអ្នកមាន ហើយនិងអ្នកក្រ។ លោកស៊ី ជីនពីងធ្លាប់បានសន្យាជួយស្រង់ប្រជាជនចិនជាង ៤៥លាននាក់ ឲ្យរួចផុតពីភាពក្រីក្រ ឲ្យបាននៅឆ្នាំ ២០២០ ប៉ុន្តែ នៅក្នុងអាណត្តិរបស់លោក គេឃើញចំនួនអ្នកនយោបាយ កាន់តែច្រើន បានក្លាយជាមហាសេដ្ឋីមានទ្រព្យសម្បត្តិ ប្រាក់ពាន់ លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ