អាមេរិកផ្តើមពង្រាយខែលមីស៊ីលប្រឆាំងមីស៊ីល នៅកូរ៉េខាងត្បូង
ចុះផ្សាយនៅថ្ងៃ៖
ស្តាប់ - ០៦:២៧
ក្រោយការបាញ់សាកល្បងនុយក្លេអ៊ែរបួនគ្រាប់ជាថ្មី កាលពីម្សិលមិញរបស់កូរ៉េខាងជើង សហរដ្ឋអាមេរិកបានសម្រេចពន្លឿនសកម្មភាពពង្រាយខែលមីស៊ីលប្រឆាំងមីស៊ីលThaad ដ៏ចម្រូងចម្រាសនៅលើទឹកដីកូរ៉េខាងត្បូង។ យានយន្តផ្ទុកខែលមីស៊ីលពីរគ្រឿងបានចុះចតលើទឹកដីកូរ៉េខាងត្បូងហើយ នៅព្រឹកថ្ងៃអង្គារនេះ ក្រោមក្រសែភ្នែកនិងប្រតិកម្មក្តៅក្រហាយបំផុតរបស់ក្រុងប៉េកាំង។ ចិនបានប្រកាសប្តេជ្ញាការពារសន្តិសុខជាតិយ៉ាងដាច់ខាត។
ប៉ុន្មានម៉ោងក្រោយការបាញ់សាកល្បងមីស៊ីលរបស់កូរ៉េខាងជើង សហរដ្ឋអាមេរិកបានចាប់ ពង្រាយខែលមីស៊ីលប្រឆាំងមីស៊ីលThaad ហើយ នៅថ្ងៃនេះ នៅលើទឹកដីកូរ៉េខាងត្បូង។
ទង្វើបង្កហេតុម្តងហើយម្តងទៀតរបស់កូរ៉េខាងជើង អាចបញ្ជាក់បានថាអាមេរិកបានសម្រេចចិត្តត្រូវក្នុងការដាក់ពង្រាយខែលមីស៊ីល នៅកូរ៉េខាងត្បូង។ សកម្មភាពថ្ងៃនេះគ្រាន់តែជាការពន្លឿនគម្រោង ដែលអាមេរិកនិងកូរ៉េខាងត្បូងបានព្រមព្រៀងនឹងរួចជាច្រើន ទៅហើយកាលពីឆ្នាំទៅប៉ុណ្ណោះ។
សូមបញ្ជាក់ថា កូរ៉េខាងជើងបានធ្វើការសាកល្បងមីស៊ីលជាថ្មីទៀត នៅថ្ងៃចន្ទទី ៦មីនា។ សម្រាប់កូរ៉េខាងជើង ការសាកល្បងមីស៊ីលនេះ គឺធ្វើឡើងដើម្បីប្រឆាំងនឹងសមយុទ្ធទ្វេភាគីរវាងកូរ៉េខាងត្បូងនិងអាមេរិក ដែលចាប់ផ្តើមតាំងពីថ្ងៃពុធសប្តាហ៍មុន។ នៅថ្ងៃនេះ ព្យុងយ៉ាងបានស្រែកឡូងៗទៀត ថាការសាកល្បងម្សិលមិញ ជាការធ្វើលំហាត់សម ត្រៀមវាយប្រហារមូលដ្ឋានអាមេរិកនៅលើទឹកដីជប៉ុនផង។
ថ្វីបើជាទូទៅ អ្នកឯកទេសគ្រប់រូបសុទ្ធតែយល់ថាកូរ៉េខាងជើង បានធ្វើការអភិវឌ្ឍន៍ច្រើនក្នុងវិស័យនុយក្លេអ៊ែរ។ មីស៊ីលបួនគ្រាប់ដែលព្យុងយ៉ាងបានបាញ់សាកល្បងនៅព្រឹកថ្ងៃចន្ទម្សិលមិញ សំដៅជប៉ុន មិនមែនជាមីស៊ីលប្រភេទថ្មី ហើយទំនងជាមិនមែនមីស៊ីលប៉ាលីស្ទីកអន្តរទ្វីបឡើយ និងមានតែមួយគ្រាប់ទេដែលបានសម្រេច ទៅធ្លាក់នៅក្នុងសមុទ្ទជប៉ុន។ អាចជាមីស៊ីលរយៈខ្លី (៥០០-៧០០គីឡូម៉ែត្រ) និងមធ្យម (១៣០០ទៅ ១៥០០គ.ម.) ច្រើនជាង នេះបើតាមក្រសួងការពារជាតិកូរ៉េខាងត្បូង។ ខ្លីឬមធ្យមដែលសមល្មមនឹងវាយដល់ជប៉ុន។
ហេតុអ្វីចិនប្រឆាំងនឹងការពង្រាយខែលមីស៊ីសនៅកូរ៉េខាងត្បូង ?
ខែលមីស៊ីលប្រឆាំងនឹងមីស៊ីលThaad នេះ ជាប្រព័ន្ធខែលសម្រាប់ចាប់និងបំផ្លាញមីស៊ីលប៉ាលីស្ទិក ដែលត្រូវដាក់ពង្រាយនៅក្នុងប្រទេសកូរ៉េខាត្បូង។ កម្មវត្ថុជាផ្លូវការ គឺដើម្បីបង្កើនសុវត្ថិភាពឱ្យកូរ៉េខាងត្បូង បន្ថែមពីខែលមីស៊ីលដែលមានស្រាប់ និងសម្រាប់តាមដានទប់ទល់នឹងមីស៊ីស ព្រមទាំងការគំរាមនុយក្លេអ៊ែររបស់កូរ៉េខាងជើង តែមួយទេ។ ខែលមីស៊ីលនេះអាចការពារប្រទេសកូរ៉េខាងត្បូងបានពីរភាគបី។ ប៉ុន្តែសូម្បីតែពលរដ្ឋកូរ៉េខាងត្បូងក៏មួយភាគធំក៏មិនពេញចិត្តដែរ ដោយយល់ថាអាចមានគ្រោះថា្នក់ចំពោះសុខភាព។
ចំណែកចិនប្រឆាំងដាច់ខាតនឹងគម្រោងដាក់ខែលមីស៊ីល ព្រោះយល់ថាការដាក់ពង្រាយខែលមីស៊ីលបានត្រឹមតែបំប៉ោងភាពតានតឹងយោធា និងស្ថានភាពទូទៅក្នុងឧបទ្វីបកូរ៉េតែប៉ុណ្ណោះ។ ម្យ៉ាងទៀត ចិនខឹងសម្បារខ្លាំងក៏ព្រោះប៉េកាំងព្រួយបារម្ភថាសន្តិសុខជាតិត្រូវរងការគំរាមកំហែង ដោយរ៉ាដារបស់ប្រព័ន្ធខែលមីស៊ីលនេះ អាចគ្របដណ្តប់ដល់ទឹកដីចិនមួយភាគធំ។ មានន័យថាប្រព័ន្ធខែលមីស៊ីលប្រឆាំងមីស៊ីលរបស់ចិនខ្លួនឯង នឹងត្រូវកាត់បន្ថយប្រសិទ្ធភាព។
តាំងពីប៉ុន្មានខែមកហើយដែលប៉េកាំងបានចាប់ផ្តើមចាត់វិធានាការ ប្រឆាំងការដាក់ពង្រាយខែលមីស៊ីលដែលកូរ៉េខាងត្បូងយល់ថាជាទណ្ឌកម្មសេដ្ឋកិច្ច។ ហាងទំនិញធំៗរបស់កូរ៉េខាងត្បូង ដែលជាម្ចាស់កម្មសិទ្ធិដីដាក់ខែលមីស៊ីល នៅចិនត្រូវបានអាជ្ញាធរបង្ខំឱ្យបិទទ្វារមួយហើយមួយទៀត ជាបន្តបន្ទាប់។ នៅថ្ងៃនេះរដ្ឋមន្ត្រីការបរទេសចិន បានប្រកាសប្តេជ្ញាការពារសន្តិសុខជាតិ និងព្រមានជាថ្មី ថាកូរ៉េខាងត្បូងនិងអាមេរិកជល់ក្បាលគ្នាដើរផ្លូវខុស ដោយត្រូវទទួលខុសត្រូវចំពោះផលវិបាកដ៏ធ្ងន់ធ្ងរថ្ងៃក្រោយ។ សេអ៊ូលក៏កំពុងត្រៀមជាស្រេចនឹងប្តឹងទៅអង្គការពាណិជ្ជកម្មពិភពលោក ក្នុងករណីដែលចិនផ្តើមដាក់ទណ្ឌកម្មសេដ្ឋកិច្ចជាផ្លូវការមែន។
ក្រៅអំពីចិន រុស្ស៊ីក៏បានបញ្ចេញប្រតិកម្មថ្កោលទោសដូចគ្នាតាមរយៈប្រសាសន៍របស់រដ្ឋមន្ត្រីការបរទេស ថាការដាក់ខែលមីស៊ីលកំពុងនាំឧបទ្វីបកូរ៉េឱ្យធ្លាក់ក្នុងភាពទ័លច្រក។ ចិននិងរុស្ស៊ីពិតជាមិនត្រូវការឃើញ អាមេរិកពង្រីកសាច់ដុំនៅកៀកខ្លួនឡើយ។
លោកត្រាំមាននយោបាយចំពោះកូរ៉េខាងជើងយ៉ាងណា ?
ពេលនេះឧបទ្វីបកូរ៉េ បាននិងកំពុងស្ថិតក្នុងភាពតានតឹងខ្លាំងណាស់ ! ក្រុមប្រឹក្សាសន្តិសុខអង្គការសហប្រជាជាតិ នឹងកោះប្រជុំបន្ទាន់នៅថ្ងៃពុធស្អែក។ ឯលោកដូណាល់ ត្រាំ ដែល កាលពីនៅជាបេក្ខជនប្រធានាធិបតី លោក ដូណាល់ ត្រាំ បានប្រកាសយ៉ាងក្តែងៗថាចង់ទៅនិយាយជាមួយគីមជុងអ៊ុន ដើម្បីដោះស្រាយវិបត្តនុយក្លេអ៊ែរ ប្រសិនបើចាំបាច់ បានទទួលស្គាល់ថា កូរ៉េខាងជើង ជាបញ្ហាដ៏ធំ ! ប៉ុន្តែនៅចំពោះមុខ គីមជុងអ៊ុន ប្រមុខដឹកនាំរបស់ព្យុងយ៉ាង ដែលកំពុងជ្រលរចិត្តលោកត្រាំ តាមរយៈការសាកល្បងមីស៊ីលឥតឈប់យ៉ាងដូច្នេះ លោក ត្រាំ ពិតជាមិនដឹងចាប់ផ្តើមតាមច្រកណាឡើយ។
នៅពេលកូរ៉េខាងជើងបានបាញ់សាកល្បងនុយក្លេអ៊ែរ កាលពីខែកុម្ភៈ លោក ដូណាល់ ត្រាំ បានសន្យាថានឹងតបវិញ ខ្លាំងៗ ! ប៉ុន្តែបញ្ហានៅត្រង់ថា រដ្ឋបាលថ្មីថ្មោងរបស់លោក មានរឿងសំខាន់ៗច្រើនត្រូវដោះស្រាយនៅក្នុងផ្ទៃប្រទេស។ មិនដឹងថាតើលោកត្រាំ អាចធ្វើអ្វីបានខ្លះទេ! រហូតមកទល់ពេលនេះ គេនៅមិនទាន់បានដឹងអំពីផែនការលម្អិតរបស់អាមេរិកថ្មីចំពោះកូរ៉េខាងជើងឡើយផង។
នៅយប់មិញ លោកដូណាល់ ត្រាំ បានត្រឹមទូរស័ព្ទ ទៅប្រធានាធិបតីស្តីទី កូរ៉េខាងត្បូង និងនាយករដ្ឋមន្ត្រីជប៉ុន ស្ហ៊ីនហ្សូ អាបេ ដើម្បីធានាអះអាងអំពីការគាំទ្រអាមេរិកចំពោះទាំងពីរ និងពន្លឿនការដាក់ពង្រាយខែលមីស៊ីលប្រឆាំងមីស៊ីល ឱ្យបានចប់សព្វគ្រប់ នៅរវាងពីរខែទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ