មន្ទីរពេទ្យយោធាក្រុងកាប៊ូលត្រូវរងការវាយប្រហារនៅព្រឹកមិញដោយជនប្រដាប់អាវុធមួយក្រុម
នៅអាហ្វហ្កានីស្ថាន ក្រុមប្រដាប់អាវុធមួយក្រុមក្នុងសម្លៀកបំពាក់បន្លំជាគ្រូពេទ្យ បានបើកការវាយប្រហារតាំងពីព្រលឹមស្រាងៗនៅថ្ងៃពុធនេះទៅលើមន្ទីរពេទ្យយោធាមួយនៅទីក្រុងកាប៊ូលជិតគ្នានឹងស្ថានទូតអាមេរិក។ពួកភេរវជន បានប្រឈមមុខជាមួយកងកម្លាំងសន្តិសុខដែលអាជ្ញាធរ បានបញ្ជូនជាបន្ទាន់ទៅកាន់កន្លែងកើតហេតុ។ យោងតាមតួលេខចុងក្រោយរបស់ក្រសួងសុខាភិបាល មានអ្នកស្លាប់យ៉ាងតិច៣០នាក់ដែលភាគច្រើនជាអ្នកជម្ងឺ គ្រូពេទ្យនិងគិលានុប្បដ្ឋាកក៏ព្រមទាំងអ្នករងរបួសជាង៦០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ការវាយប្រហារបានចាប់ផ្តើមនៅខណៈពេលដែលភេរវជនអត្តឃាតមួយរូប បានបំផ្ទុះគ្រាប់បែកដែលពាក់ជាប់ខ្លួននៅពីខាងក្រោយមន្ទីរពេទ្យយោធាដែលមានគ្រែអ្នកជម្ងឺចំនួន៤០០កន្លែង។ ភេរវជនចំនួន៣នាក់បាននាំគ្នាសម្រុកចូលទៅក្នុងអគារពេទ្យជាមួយនឹងអាវុធស្វ័យប្រវត្តិនិងគ្រាប់បែកដៃ-នេះបើយោងតាមអ្នកទទួលខុសត្រូវផ្នែកសន្តិសុខជាតិ។
ពួកភេរវជន បានរត់សំដៅទៅជាន់លើបំផុតនៃអគារពេទ្យដើម្បីធ្វើជាទីតាំងបើកការវាយប្រហារប្រឈមតទល់ ជាមួយកងកម្លាំងសន្តិសុខពិសេសអាហ្វហ្កានីស្ថានដែលត្រូវបានបញ្ជូនជាបន្ទាន់ទៅកាន់កន្លែងកើតហេតុណ៍។ នៅខណៈការប្រឈមមុខគ្នាកំពុងតែនៅបន្ត នោះ គេបានឮសូរការផ្ទុះលើកទីពីរទៀតនៅក្នុងមន្ទីរពេទ្យ។
យោងតាមអ្នកនាំពាក្យក្រសួងការពារជាតិ នៅក្នុងការវាយប្រហារតទល់គ្នានេះ ពួកភេរវជនមានស្លាប់ម្នាក់ ហើយពីរនាក់ទៀតកំពុងតែនៅលាក់ខ្លួនក្នុងមន្ទីរពេទ្យ។ចំណែកខាងទាហានវិញ មានស្លាប់ម្នាក់និង៣នាក់ទៀតត្រូវរងរបួស។
ចំណែក លោកAshraf Ghaniប្រធានាធិបតីអាហ្វហ្កានីស្ថានវិញ បានផ្អាកសន្ទរកថារបស់លោកថ្លែងនៅឱកាសទិវានារីអន្តរជាតិនាថ្ងៃនេះ ដើម្បីថ្លែងប្រាប់ថា ការវាយប្រហាររបស់ពួកភេរវជនកំពុងតែនៅបន្ត។
ជាការវាយប្រហារដែលនៅពុំទាន់មានចលនាណាមួយប្រកាសជាស្នាដៃរបស់ពួកគេនៅឡើយទេ តែអ្នកនាំពាក្យរបស់ពួកអ៊ីស្លាមតាលីបង់ បានបញ្ជាក់ថា ពួកគេពុំបានដឹងពីព័ត៌មាននេះឡើយ។
គួររំលឹកថា កាលពីមួយសប្តាហ៍មុន មានការវាយប្រហារភេរវកម្មជាច្រើនប្រឆាំងទៅលើស្នងការប៉ូលីសមួយនិងអគារនៃសេវាស៊ើបការសម្ងាត់អាហ្វហ្កានីស្ថាន។ ការវាយប្រហារកាលនោះ បានសម្លាប់មនុស្សជាច្រើននាក់នៅក្រុងកាប៊ូល។ជាការវាយប្រហារដែលពួកតាលីបង់ប្រកាសថាជាស្នាដៃរបស់ពួកគេដើម្បីបណ្តេញជនបរទេសចេញពីប្រទេសនិងប៉ុនប៉ងធ្វើការទម្លាក់រដ្ឋាភិបាលអាហ្វហ្កានីស្ថានដែលគាំទ្រដោយទីក្រុងវ៉ាស៊ីនតោន។
ព័ត៌មានចុងក្រោយបានឲ្យដឹងថា ការវាយប្រហារនៅមន្ទីរពេទ្យយោធាអាហ្វហ្កានីស្ថាន បានចប់សព្វគ្រប់ហើយក្រោយពីប្រយុទ្ធតទល់គ្នាអស់រយៈ ៦ម៉ោងរួចមកហើយពួកភេរវជនបានស្លាប់ទាំងអស់-នេះបើយោងតាមការបញ្ជាក់របស់អ្នកនាំពាក្យក្រសួងមហាផ្ទៃអាហ្វហ្កានីស្ថានជូនដល់ទីភ្នាក់ព័តមានបារាំង AFP៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ