ហូតតំណែងប្រធានាធិបតី ជាមេរៀននៃការឃុបឃិតគ្នារវាងអ្នកនយោបាយនិងឧស្សាហកម្ម ?
ចុះផ្សាយនៅថ្ងៃ៖
លោកស្រី ប៉ាក់ គុនហេ បានក្លាយជាប្រធានាធិបតីកូរ៉េខាងត្បូងប្រសូតចេញពីបោះឆ្នោតដំបូងគេបង្អស់ ដែលត្រូវដកហូតតំណែងដោយតុលាការ ! អស់អភ័យឯកសិទ្ធ ក្លាយជាជនសាមញ្ញា ថ្ងៃនេះលោកស្រី ទំនងជាត្រូវបានតុលាការកោះហៅមកសួរចម្លើយ ក្នុងនាមជាជនសង្ស័យ ពាក់ព័ន្ធនឹងរឿងអាស្រូវពុករលួយថ្នាក់ជាតិ។ រឿងអាស្រូវ បាននឹងកំពុងអង្រួញប្រព័ន្ធកាន់អំណាច ដែលឈរលើទន្ទល់នៃឃុបឃិតគ្នារវាងអ្នកនយោបាយនិងក្រុមហ៊ុនឧស្សាហកម្ម។ ប្រធានាធិបតីក៏ធ្លាក់អំពីអំណាច និងកូនថៅកែក្រុមហ៊ុនយក្សសាំស៊ុង ក៏ជាប់ពន្ធនាគារ ក្នុងពេលទន្ទឹមគ្នា ! ជាមួយរឿងអាស្រូវបែបនេះ តើកូរ៉េខាងត្បូង នឹងមានសំណាងអាចធ្វើការសើរើ និង ប្តូរផ្លាស់ឬ ?
ប្រជាធិបតេយ្យដ៏ក្មេងខ្ចីរបស់កូរ៉េខាងត្បូង កំពុងបោះជំហានចូលក្នុងភាពចាស់ទុំ។ ក្រោមគំនាបនៃបាតកម្មដោយសន្តិវិធី ផ្ទុះឡើងនៅពេលឮរឿងអាស្រូវពុករលួយ និងភាពធ្វេសប្រហែសឱ្យមិត្តសម្លាញ់ចូលជ្រៀតជ្រែកកិច្ចការរដ្ឋ តុលាការកូរ៉េខាងត្បូងបានបង្ហាញខ្លួនជាអ្នកមានឯករាជ្យពេញលេញ។ សភា និងតុលាការធម្មនុញ្ញបានទម្លាក់លោកស្រី ប៉ាក់ គុនហេ ពីតំណែង បន្តដោយការចាប់ខ្លួនអគ្គនាយករងក្រុមហ៊ុនសាំស៊ុងលោក Lee Jae-Yong ពីបទពុករលួយ !
កើតឡើងក្នុងគម្លាតគ្នាតែមួយខែ ហេតុការណ៍ពីរនេះ បានច្របាច់អង្រួន ប្រព័ន្ធកាន់អំណាចកូរ៉េខាងត្បូង ដែលមានការឃុបឃិតគ្នាជារហូតមករវាងអ្នកនយោបាយនិងអ្នកឧស្សាហកម្ម។ ប្រព័ន្ធនេះត្រូវបានឪពុកលោកស្រីប៉ាក់គុនហេ នាំមកដាំដុះក្នុងប្រទេសកូរ៉េខាងត្បូងតាំងពីទសវត្សរ៍ឆ្នាំ១៩៦១មក រហូតនាំប្រទេសឱ្យក្លាយជាមហាអំណាចសេដ្ឋកិច្ចទី៤ប្រចាំអាស៊ី តែក៏បានធ្វើឱ្យបក្សកាន់អំណាចរងទុក្ខស្ទើរមិនអាចទទួលយកបាននៅថ្ងៃនេះ។
ប្រធានក្រុមហ៊ុនឧស្សាហកម្មជាប់ចោទ ប្រធានាធិបតីអស់អំណាចអាចនឹងត្រូវតុលាការចោទប្រកាន់ដែរ កូរ៉េខាងត្បូងពិតជាមានឆន្ទៈចង់ផ្តាច់មរតកដឹកនាំបន្សល់ទុកដោយ អតីតប្រធានាធិបតីលោក ប៉ាក់ ជុងអ៊ី ហើយ។ នេះតាមការវិភាគរបស់អ្នកជំនាញនយោបាយនៅក្រុងសេអ៊ូល។ លោកស្រី ប៉ាកី គុនហេ ជាកូនស្រី របស់ប៉ាក់ ជុងអ៊ី ជាតំណាងរបបចាស់ដែលភ្លេចគិតថាប្រទេសបានប្តូរផ្លាស់ហើយ !
ក្រោយពីបានធ្វើរដ្ឋប្រហារឡើងកាន់អំណាច នៅឆ្នាំ១៩៦១ ឧត្តមសេនីយ៍ប៉ាក់ ជុងអ៊ី បានត្រួសត្រាយនយោបាយឧស្សាហកម្ម គិតគូរខ្លាំងដល់ក្រុមហ៊ុនវិនិយោគនិងគាបសហជីព។ សន្ទុះក្លាយជាអធិរាជឧស្សាហកម្មប្រចាំតំបន់បានដាស់ពួកអ្នកអភិរក្សជំនាន់មុនឱ្យងើបមកទម្លាក់លោកស្រីប៉ាក់ គុនហេ ជាកូនស្រី។ ម្យ៉ាងទៀតមនុស្សជំនាន់ក្រោយ និងជំនាន់ជាមួយ នៅចងចាំតែអនុស្សាវរីយ៍អាក្រក់ ថាលោក ប៉ាក់ ជុងអ៊ី ជាមេដឹកនាំផ្តាច់ការ បង្ក្រាបធ្វើបាបបក្សប្រឆាំង។ លោក ប៉ាក់ ជុងអ៊ី ត្រូវបានភ្នាក់ងារសំងាត់ខ្លួនឯងលបធ្វើឃាត ឧត្តមសេនីយ៍ផ្តាច់ការ មួយទៀតបានឡើងបន្ត និងប្រើអំពើហិង្សាសាបព្រោះការកាប់សម្លាប់ ... ដំបៅនេះមិនទាន់ជាសះស្បើយទេក្នុងព្រលឹងជាតិ។
របបផ្តាច់ការបានរលត់នៅឆ្នាំនៅ១៩៨៧ លទ្ធិប្រជាធិបតេយ្យបានចាប់ឬស ប៉ុន្តែការដឹកនាំនយោបាយដោយត្រូវរ៉ូវជាមួយអ្នកឧស្សាហកម្ម មិនត្រូវបានលុបបំបាត់ចោលទាំងស្រុងទេ ! ប្រធានាធិបតីកូរ៉េ ពីឆ្នាំ១៩៩៨-២០០៣ និងពី២០០៣-២០០៨ ដែលជាអ្នកចម្រើននិយម ក៏គេចមិនផុតពីនិន្នការនយោបាយស៊ុមគ្រលំជាមួយឧស្សាហកម្មនេះដែរ។
ក្រុមហ៊ុនឧស្សាហកម្មដែលបានទទួលភាពអនុគ្រោះពិសេសពីរដ្ឋាភិបាល តែងផ្តល់ជាសំណងឱ្យអ្នកនយោបាយវិញ ជាប្រាក់ជំនួយមូលនិធិ។ មានអ្នកដឹកនាំប្រទេសជាច្រើនរូបណាស់ ដែលជាប់អង្កេតពីបទគេចពន្ធឬពុករលួយ តែតែងបានការអភ័យទោសពីប្រធានាធិបតី។ លោកស្រីប៉ាក់ គុនហេ ក៏ធ្លាប់លាងទោសឱ្យប្រធានក្រុមហ៊ុនឧស្សាហកម្មធំៗ ដូចជា SL CJ ដែរកាលនៅកាន់អំណាច។ នេះសបញ្ជាក់ឱ្យឃើញថា អំពីពុករលួយជាជំងឺដ៏រ៉ាំរ៉ៃ។
ចុះបើពេលនេះ ប្រធានាធិបតីខ្លួនឯងត្រូវជាប់ចោទដែរ ? តើនរណាជួយនរណា ? នេះពិតជាដូចសុភាសិតបូរាណដែលថា ទឹកអាចបណ្តែតនាវាឱ្យទៅមុខ តែក៏អាចពន្លិចនៅនឹងកន្លែងបានដែរ ! កាំបិតកំពុងតែចិតដងឯង ! ដល់វេលាដែលកូរ៉េខាងត្បូងត្រូវបង្កើតប្រជាធិបតេយ្យដោយពិតៗហើយ ! នេះជាសំដីរបស់បេក្ខជនប្រធានាធិបតីបក្សប្រឆាំងឆ្វេងនិយម លោក លី ជែម្យ៉ុង។
មិនថាបេក្ខជនឆ្វេងនិយមនេះដែល មានប្រជាប្រិយភាពខ្លាំងក្នុងចំណោមយុវវ័យកូរ៉េខាងត្បូង ឬបេក្ខជនណាផ្សេងទេ ពួកគេត្រូវតែបង្ខំចិត្តត្រូវតែអនុគ្រោះដល់អ្នកឧស្សាហកម្ម ព្រោះក្រុមហ៊ុនឧស្សាហកម្មកូរ៉េខាងត្បូង មានឈ្មោះបោះសំឡេងនិងជាតំណាងភាពល្បីរន្ទឺរបស់កូរ៉េខាងត្បូងលើឆាកអន្តរជាតិ។ ប៉ុន្តែត្រូវគិតថា ឥទ្ធិពលនិងការត្រូវរ៉ូវជាមួយអំណាចនយោបាយរបស់ក្រុមឧស្សាហកម្ម គឺជាបន្ទុកមួយ មិនមែនជាគុណប្រយោជន៍ដែលរដ្ឋាភិបាលអង្គុយស្ងៀមចាំទាញយកឡើយ។
អ្នកនយោបាយត្រូវយល់អំពីការប្តូរផ្លាស់នេះប្រសិនបើចង់មានអភិបាលកិច្ចល្អប្រសើរ។ ហើយវិបត្តិនៅកូរ៉េខាងត្បូងពេលនេះ គឺឱកាសនិងដំណាក់កាលដ៏សំខាន់នៃការប្តូរផ្លាស់ ប៉ុន្តែសំណាងនេះអាចសម្រេចបានល្គិកណាតែបេក្ខជនប្រធានាធិបតីចេះធ្វើឱ្យមានការប្តូរផ្លាស់ និងចេះដាក់មានដំណើរការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ