ចិនបានអំពាវនាវបារាំងឲ្យធានាសន្តិសុខ និងសិទ្ធិរបស់ជនជាតិចិនរស់ក្នុងទឹកដីបារាំង
នៅថ្ងៃអង្គារ ទី២៨ មីនា រដ្ឋាភិបាលនៃប្រទេសចិនបានបញ្ចេញប្រតិកម្មនឹងការដែលប៉ូលិសបារាំងបានបាញ់សម្លាប់បុរសជនជាតិចិនមា្នក់អាយុ ៥៦ឆ្នាំក្នុងទីក្រុងប៉ារីសកាលពីយប់ថ្ងៃអាទិត្យ ទី២៦ មីនា។ ចិនបានសុំការបំភ្លឺពីរដ្ឋាភិបាលបារាំង ព្រមទាំងអំពាវនាវឲ្យធានាសន្តិសុខ និងសិទ្ធិរបស់ជនជាតិចិនដែលកំពុងរស់នៅក្នុងទឹកដីបារាំង។ សូមជម្រាបជូនថាក្រោយព្រឹត្តិការណ៍បាញ់សម្លាប់រូបបុរសជនជាតិចិន ប្រជាជនអាស៊ី ពិសេសជនជាតិចិនរស់ក្នុងទីក្រុងប៉ារីសបាននាំគ្នាដង្ហែក្បួនប្រឆាំងនឹងអំពើហិង្សារបស់ប៉ូលិស។ ពិធីដង្ហែក្បួនបានបណ្តាលឲ្យផ្ទុះអំពើហិង្សាដោយមានការដុតឡាន និងការចាប់ខ្លួនបាតុករចំនួន ៣៥នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ប្រតិកម្មរបស់ចិនត្រូវបានធ្វើឡើងតាមរយៈការកោះហៅឯកអគ្គកុងស៊ុលបារាំងប្រចាំទីក្រុងប៉េកាំងទៅសួរនាំ បន្ទាប់មក អ្នកនាំពាក្យក្រសួងការបរទេសលោកស្រីហួរ ជុនយីងបានទាមទារឲ្យបារាំងបើកការស៊ើបអង្កេតជាបន្ទាន់មួយ និងធានាសន្តិសុខ ព្រមទាំងសិទ្ធិរបស់ជនជាតិចិនទាំងអស់ដែលកំពុងរស់នៅក្នុងប្រទេសបារាំង។ ទន្ទឹមគ្នានេះ លោកស្រីហួរ ជុនយីងក៏បានអំពាវនាវពលរដ្ឋចិនទាំងអស់ដែលរស់ក្នុងទឹកដីបារាំងឲ្យសម្តែងកំហឹងរបស់ខ្លួនដោយសន្តិវិធី និងដោយហេតុផលត្រឹមត្រូវ។
ប្រតិកម្មរបស់ចិនពេលនេះបានធ្លាក់មក បន្ទាប់ពីមានផ្ទុះអំពើហិង្សានៅក្នុងក្បួនបាតុកម្មរបស់សហគមន៍ចិនក្នុងទីក្រុងប៉ារីសក្នុងយប់ថ្ងៃចន្ទ ទី២៧ មីនា។ នៅក្នុងក្បួនបាតុកម្មនោះ ក្រុមបាតុករបានដុតឡានប៉ូលិសមួយគ្រឿង រថយន្តចំនួន ៣គ្រឿង ហើយកម្លាំងប៉ូលិសបានចាប់ឃុំខ្លួនបាតុករចំនួន ៣៥នាក់។ បាតុកម្មរបស់សហគមន៍ចិន គឺដើម្បីប្រឆាំងនឹងអំពើហិង្សារបស់ប៉ូលិសដែលបានបាញ់សម្លាប់បុរសជនជាតិចិនម្នាក់អាយុ ៥៦ឆ្នាំរស់ក្នុងទីក្រុងប៉ារីសសង្កាត់ទី១៩ កាលពីយប់ថ្ងៃអាទិត្យ ទី២៦ មីនា។
ចម្លើយពីរដ្ឋាភិបាលបារាំងតបនឹងប្រតិកម្មរបស់ចិនវិញ ក្រសួងការបរទេសបារាំងបានបញ្ជាក់ថា សន្តិសុខ និងសុវត្ថិភាពរបស់ពលរដ្ឋចិនរស់ក្នុងទឹកដីបារាំងជាអាទិភាពទី១ របស់រដ្ឋាភិបាលបារាំង។ សូមជម្រាបជូនថាមកទល់ពេលនេះ មានព័ត៌មានពីរផ្ទុយគ្នាដែលបញ្ជាក់ពីការដែលប៉ូលិសដកកាំភ្លើងបាញ់សម្លាប់រូបបុរសជនជាតិចិន។ តាមព័ត៌មានពីប៉ូលិស បុរសរូបនោះបានយកកន្ត្រៃចាក់លើប៉ូលិសម្នាក់ក្នុងចំណោម ៣នាក់ដែលទៅគោះទ្វារគេហដ្ឋានរបស់គាត់ដែលកំពុងមានជម្លោះក្នុងគ្រួសារ ហើយពេលនោះ ប៉ូលិសរួមការងារក៏បានដកកាំភ្លើងបាញ់លើរូបបុរសជនជាតិចិន។
តែក្រុមគ្រួសារជនរងគ្រោះបានបដិសេធ និងអះអាងថា គ្មានទង្វើហិង្សាណាមួយលើប៉ូលិសទេ តែប៉ូលិសបានដកកាំភ្លើងបាញ់ឆៅៗតែម្តង។ យ៉ាងណាក៏ដោយ រដ្ឋអំណាចបារាំងបានបើកការស៊ើបអង្កេតដើម្បីស្វែងរកការពិតចំពោះរឿងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ